ໃນໂອກາດ ໂອລົມຕໍ່ກອງປະຊຸມໃຫຍ່ອົງຄະນະພັກແຂວງ ສະຫວັນນະເຂດ ຄັ້ງທີ IX ທີ່ຈັດຂຶ້ນໃນລະຫວ່າງ ວັນທີ 20-21 ພະຈິກ 2020 ສະຫາຍ ທອງລຸນ ສີສຸລິດ ກຳມະ ການກົມການເມືອງສູນກາງພັກ ນາຍົກລັດຖະມົນຕີ ໄດ້ໃຫ້ທິດຊີ້ນໍາຕໍ່ຄະ ນະບໍລິຫານງານພັກແຂວງຊຸດໃໝ່ ໃຫ້ເອົາໃຈໃສ່ 8 ບັນຫາດັ່ງນີ້:

ໃຫ້ເອົາໃຈໃສ່ຢ່າງສຸດຂີດ ໃນການຊອກເຫັນ ແລະ ນໍາໃຊ້ທ່າແຮງບົ່ມຊ້ອນຂອງແຂວງຢ່າງມີການຄົ້ນຄວ້າ, ວິໄຈດຳເນີນການວາງແຜນຢ່າງຮັດກຸມ ແລະ ມີຫຼັກວິທະຍາສາດ ໂດຍຈັດວາງບູລິມະສິດ ໃນການດຳເນີນການຢ່າງຖືກຕ້ອງ, ມີປະສິດທິພາບຢ່າງແທ້ຈິງ (ທ່າແຮງ ແລະ ຄວາມບົ່ມຊ້ອນຂອງແຂວງສະຫວັນນະເຂດໄດ້ແກ່ ທີ່ດິນ, ນ້ຳ, ປ່າໄມ້, ບໍ່ແຮ່, ເສັ້ນທາງເຊື່ອມຈອດ, ຊັບພະຍາກອນມະນຸດ, ແຮງງານໜຸ່ມ..) ຢາກໃຫ້ການຂຸດຄົ້ນນຳໃຊ້ທ່າແຮງດັ່ງກ່າວໃຫ້ແກ່ການພັດທະນານັ້ນ, ກ່ອນອື່ນຕ້ອງມີການກຳນົດບູລິມະສິດ, ວາງແຜນຢ່າງຮັດກຸມ ແລະ ນຳໃຊ້ຢ່າງມີປະສິດທິຜົນ ແລະ ຍືນຍົງ, ປ້ອງກັນຄວາມເສຍຫາຍ, ປ້ອງກັນສະພາບແວດລ້ອມທີ່ເປັນຜິດ ເພື່ອໃຫ້ສາມາດເປັນກຳລັງແຮງຄ້ຳຈູນເສດຖະກິດຂອງແຂວງໃນໄລຍະສະເພາະໜ້າ ແລະ ຍາວນານ. ຂໍໃຫ້ແຂວງເລີ່ມແຕ່ຫົວທີ່ໃນການຫັນເປັນອຸດສາຫະກຳ ແລະ ຫັນເປັນທັນສະໄໝ ມີແຕ່ເຮັດແນວນັ້ນເທົ່ານັ້ນ ຈິ່ງສາມາດຍົກລະດັບປັບປຸງຄຸນນະພາບຂອງສິນຄ້າ, ຄຸນນະພາບຂອງການບໍລິການ, ສຳຄັນຕ້ອງຮູ້ເຮັດການຕະຫຼາດໃນຍຸກໃໝ່, ຕ້ອງເອົາຕົວເຂົ້າໃນສະໝໍລະພູມແຫ່ງການແຂ່ງຂັນໃຫ້ໄດ້ ເພາະແຂວງສະຫວັນນະເຂດແມ່ນຢູ່ໃນແລວເສດຖະກິດຕາເວັນອອກ-ຕາເວັນຕົກ ທັງແລວເສດຖະກິດເໜືອ-ໃຕ້ອີກດ້ວຍ.

ແຂວງສະຫວັນນະເຂດ ຕ້ອງຕັ້ງໜ້າປັບປຸງແປງວິທີການນໍາພາຂອງພັກ ແລະ ການບໍລິຫານລັດໄປພ້ອມໆກັນ, ໃຫ້ຖືອັນນີ້ຄືການກໍ່ສ້າງກັນ, ພັກຕ້ອງຮັກສາລັກສະນະນຳໜ້າ, ເປັນແບບຢ່າງໃນທຸກດ້ານຂອງການນຳທຸກຂັ້ນ, ການບໍລິຫານຂອງລັດ, ຂອງອຳນາດການປົກຄອງທຸກລະດັບ ກ້າຫັນເຂົ້າສູ່ຄວາມມີລະບຽບວິໄນ, ຕ້ານພະຍາດອາຍາສິດ, ບໍລິການປະຊາຊົນດ້ວຍຄວາມເຕັມໃຈ, ໂປ່ງໃສຕາມແນວທາງເອົາປະຊາຊົນເປັນກົກ, ເອົາຊົນນະບົດເປັນເປົ້າໝາຍ ໃຫ້ແກ່ການພັດທະນາ ຊ່ວຍປະຊາຊົນໃຫ້ຮຽນຮູ້ວິຖີຊີວິດໃໝ່, ວິທີທຳມາຫາກິນແບບໃໝ່, ໃຫ້ປະຊາຊົນເຂົ້າເຖິງທຶນ, ເຂົ້າເຖິງເຕັກໂນໂລຊີ, ເຂົ້າເຖິງຕະຫຼາດ, ເດັດດ່ຽວຕ້ານກັບການລ່ວງລະເມີດສິດປະຊາທິປະໄຕ ແລະ ສິດເປັນເຈົ້າຂອງປະຊາຊົນ, ພະນັກງານເຮົາຕ້ອງລັດທິເອກະຊົນຄັບແຄບ, ແນວຄິດພາກສ່ວນກຸ່ມກ້ອນຜົນປະໂຫຍດ ແລະ ບໍ່ເຄົາລົບລະບຽບວິໄນອອກຈາກຖັນແຖວພະນັກງານຢາກເຮັດໄດ້ແນວນັ້ນພັກເຮົາ, ອົງກາຈັດຕັ້ງຂອງພັກແຕ່ເທິງລົງລຸ່ມຕ້ອງປະຕິບັດຫຼັກການຕິຊົມຕົນເອງ, ຕິຊົມກັນ ກໍ່ສ້າງກັນ ໃນການດຳລົງຊີວິດພັກໃຫ້ເຂັ້ມງວດ ແລະ ເປັນປະຈຳ, ສືບຕໍ່ປັບປຸງກົງຈັກການຈັດຕັ້ງໃນທົ່ວອົງຄະນະພັກແຂວງ, ເມືອງໃຫ້ເຂັ້ມແຂງ, ເຄື່ອນໄຫວມີປະສິດທິພາບ, ເອົາໃຈໃສ່ບຳລຸງ, ຍົກລະດັບເລຂາໜ່ວຍພັກ, ນາຍບ້ານໃຫ້ຮູ້ນຳພາຢູ່ຮາກຖານ ໃຫ້ມີການປ່ຽນແປງທີ່ດີຂຶ້ນຢ່າງຈະແຈ້ງ.

ໃຫ້ເອົາໃຈໃສ່ວຽກງານວັດທະນະທໍາ-ສັງຄົມ, ລົບລ້າງຄວາມທຸກຍາກ ເພື່ອເຮັດໃຫ້ປະເທດເຮົາມີພື້ນຖານ ແລະ ເງື່ອນໄຂຫຼຸດພົ້ນອອກຈາກສະຖຽນລະພາບ ເປັນປະເທດດ້ອຍພັດທະນາ, ສ້າງຄົນ, ເອົາໃຈໃສ່ປັງປຸງລະບົບການສຶກສາ, ປັບປຸງໂຮງຮຽນ, ຍົກລະດັບວຽກງານສາທາລະນະສຸກໃຫ້ດີໃນເວລາມີໂຄວິດ-19 ຫຼື ພາຍຫຼັງນັ້ນ (ວຽກງານປີ່ນປົວ, ຈັນຍາບັນຂອງແພດໝໍ ແລະ ອື່ນໆ) ຕ້ອງໄດ້ຕັດສິນໃຈປັບປຸງໃຫ້ມີລັກສະນະຕັ້ງໜ້າ ແລະ ຮອບດ້ານແທ້, ເອົາໃຈໃສ່ເປັນພິເສດການສາທາລະນະສຸກຢູ່ເຂດຫ່າງໄກສອກຫຼີກ, ຈັນຍາບັນຂອງແພດໝໍ.

ດ້ານວັດທະນະທຳຍິ່ງຕ້ອງໄດ້ຊຸກຍູ້ສົ່ງເສີມ, ອະນຸລັກ ແລະ ພັດທະນາໂດຍສະເພາະໂຄວິດ-19 ວິຖີຊີວິດໃໝ່-ໃຫ້ຄວາມເປັນລາວຍັງຄົງຢູ່ ແຕ່ໃຫ້ດີກວ່າ, ປະຢັດກວ່າ, ຈົບງາມກວ່າ, ສົ່ງເສີມການທ່ອງທ່ຽວວັດທະນະທຳ-ທຳມະຊາດ, ວັດທະນະທຳແບບໃໝ່, ລົບລ້າງ ຫຼື ຈຳກັດຄວາມຊີນເຄີຍທີ່ຫຼ້າຫຼັງ (ມີ 5 ກິນ 10 ກວ່າເທື່ອຈຶ່ງວ່າພໍ, ໃຊ້ເວລາມົ້ວສຸມ ແທນທີ່ຈະໃຊ້ເວລາຮຽນ, ອ່ານ, ຊອກຫາຄວາມຮູ້ໃໝ່ໆ ແລະ ວິທີຄິດ, ວິທີທຳມາຫາກິນໃໝ່ໆທີ່ກ້າວໜ້າກວ່າ).

ຕ້ອງເພີ່ມທະວີຄວາມເອົາໃຈໃສ່ ປັບປຸງກອງກໍາລັງ ປກຊ-ປກສ ໃຫ້ເຂັ້ມແຂງ ແລະ ທັນສະ ໄໝ, ເພີ່ມທະວີການປຸກລະດົມ-ຂົນຂວາຍ ທົ່ວສັງຄົມໃຫ້ມີສະຕິຕື່ນຕົວສູງ ປະກອບສ່ວນເຂົ້າໃນການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກເຮົາ ແລະ ເຮັດໃຫ້ວຽກງານດັ່ງກ່າວນີ້ກາຍເປັນໜ້າທີ່ ແລະ ຄວາມຮັບຜິດຊອບລວມຂອງທົ່ວປວງຊົນຢ່າງແທ້ຈິງ, ເຮັດແນວນັ້ນຈຶ່ງສາມາດສ້າງພູມຕ້ານທານ ແລະ ສາມາດສູ້ຢັນໄດ້ກັບປະກົດການຫຍໍ້ທໍ້ ເປັນຕົ້ນການຄ້າຂາຍເຖື່ອນ, ບັນຫາຢາເສບຕິດ, ອາດສະຍາກຳຕ່າງໆ, ອຸບັດຕິເຫດ ແລະ ຄວາມບໍ່ເປັນລະບຽບຮຽບຮ້ອຍໃນສັງຄົມ, ທັງສາມາດປົກປັກຮັກສາອະທິປະໄຕຂອງຊາດໄດ້ຢ່າງເປັນເຈົ້າການ ຕ້ອງຮັບຮູ້ວ່າການປ້ອງກັນຊາດ-ປ້ອງກັນຄວາມສະຫງົບ ມັນຕິດພັນກັບການພັດທະນາສ້າງສາ ທີ່ໄປຄຽງຄູ່ກັນ ແລະ ຊ່ວຍຊູ່ຍູ້ໜູນເຊິ່ງກັນ ແລະ ກັນ.

ປັບປຸງກົງຈັກບໍລິຫານລັດແຕ່ລະຂັ້ນໃຫ້ໜັກແໜ້ນ, ເຂັ້ມແຂງ, ເຮັດຖືກຕາມທິດຊີ້ນຳຂອງລັດຖະບານ, ຈັດວາງ, ສັບຊ້ອນລັດຖະກອນເຂົ້າໃສ່ແຕ່ລະຕຳແໜ່ງງານໃຫ້ຖືກຕ້ອງຕາມຄວາມສາມາດ, ພ້ອມທັງເອົາໃຈໃສ່ຄຸ້ມຄອງພະນັກງານ-ລັດຖະກອນ ສ້າງໃຫ້ໄດ້ຄຸນນະພາບ, ແນໃສ່ເຮັດໃຫ້ກົງຈັກກະທັດຮັດ ແລະ ມີປະສິດທິພາບສູງ, ພ້ອມນັ້ນ ກໍ່ເອົາໃຈໃສ່ຕິດຕາມ, ກວດກາ ແລະ ເຄື່ອນໄຫວໂຄສະນາເຜີຍແຜ່ລະບຽບກົດໝາຍຕ່າງໆໃຫ້ທົ່ວເຖິງ, ເພີ່ມທະວີການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍຢ່າງເຂັ້ມງວດ.

ພາຍຫຼັງສໍາເລັດກອງປະຊຸມໃຫຍ່ຄັ້ງນີ້ແລ້ວ ໃຫ້ຮີບຮ້ອນແບ່ງວຽກ-ແບ່ງງານ, ແບ່ງຄວາມຮັບ ຜິດຊອບພາຍໃນຄະນະບໍລິຫານງານພັກແຂວງ, ຄະນະປະຈຳພັກແຂວງໃຫ້ລະອຽດ, ຈະແຈ້ງ, ບໍ່ວ່າຈະແມ່ນວຽກງານຢູ່ຂະແໜງການໃດ, ຂົງເຂດໃດ ເມື່ອໝູ່ຄະນະ, ການຈັດຕັ້ງ ກໍ່ຄືຂັ້ນເທິງໄດ້ໝອບໝາຍໃຫ້ໄປຮັບຜິດຊອບ ກໍຕ້ອງເອົາໃຈໃສ່ປະຕິບັດດ້ວຍຄວາມຮັບຜິດຊອບສູງ, ບໍ່ໃຫ້ເລືອກວຽກ, ຕ້ອງເຊີດຊູຄວາມເປັນເຈົ້າການຕໍ່ໜ້າທີ່ການເມືອງ, ທຸ້ມເທເຫື່ອແຮງ, ສະຕິປັນຍາ, ຄວາມຮູ້, ຄວາມສາມາດ, ມີຄວາມເສຍສະຫຼະ ເພື່ອເຮັດໃຫ້ສຳເລັດໜ້າທີ່, ພວກເຮົາຕ້ອງເຂົ້າໃຈນຳກັນຕື່ມອີກວ່າ ການເຂົ້າມາຢູ່ໃນຄະນະບໍລິຫານງານພັກແຂວງ ແມ່ນເຂົ້າມາເພື່ອຮັບໃຊ້ພາລະກິດປະຕິວັດອັນສູງສົ່ງຂອງພັກ ເຮັດທຸກສິ່ງທຸກຢ່າງ ເພື່ອຄວາມສົບບູນພູນສຸກຂອງປະຊາຊົນ ເພື່ອຄວາມຈະເລີນພັດທະນາຂອງປະເທດຊາດ.

ພ້ອມນັ້ນ, ໃຫ້ສືບຕໍ່ນຳພາ-ຊີ້ນຳ ການຈັດຕັ້ງຜັນຂະຫຍາຍເນື້ອໃນ ມະຕິກອງປະຊຸມໃຫຍ່ຄັ້ງນີ້ໃຫ້ເປັນແຜນງານ, ໂຄງການ ແລະ ສ້າງເປັນນິຕິກຳລະອຽດ ເລີ່ມຕັ້ງແຕ່ການຈັດຕັ້ງເຜີຍແຜ່, ເຊື່ອມຊຶມ ໃນຄະນະບໍລິຫານງານພັກແຂວງ ລົງໄປເຖິງຄະນະພັກແຕ່ລະຂັ້ນ, ສະມາຊິກພັກ, ພະນັກງານຢູ່ບັນດາເມືອງ, ຂະແໜງການ ແລະ ຮາກຖານຕ່າງໆກໍ່ຄືປະຊາຊົນບັນດາເຜົ່າ ໃຫ້ເລິກເຊິ່ງ ແລະ ທົ່ວເຖິງ ເພື່ອສ້າງຄວາມຮັບຮູ້ເຂົ້າໃຈ ແລະ ເປັນເອກະພາບກັນທາງດ້ານທັດສະນະ ແລະ ການກະທຳຕົວຈິງ, ໂດຍສະເພາະ ແມ່ນການເຊື່ອມຊຶມ, ກຳແໜ້ນຕໍ່ທິດທາງ, ແຜນນະໂຍບາຍ, ຄາດໝາຍສູ້ຊົນຕ່າງໆ ແລະ ມີຄວາມຕື່ນຕົວເປັນເຈົ້າການເຂົ້າຮ່ວມການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງນີ້ຢ່າງເປັນຂະບວນການທີ່ແຂງແຮງ, ຕໍ່ເນື່ອງ ແລະ ມີປະສິດທິພົນ.

ການແບ່ງງານ, ແບ່ງຄວາມຮັບຜິດຊອບຕ້ອງຈະແຈ້ງ, ບູລິມະສິດ, ມີກຳນົດເວລາໃຫ້ປະຕິບັດ, ຖ້າມອບໃຫ້ແລ້ວຕ້ອງກອດຮັດ ຕາມໜ້າທີ່ຖືກມອບຕາມກຳນົດເວລາ ທີ່ເອົາໃຫ້ໄປນັ້ນ, ຖ້າສຳເລັດຍ້ອງຍໍຊົມເຊີຍ, ຖ້າບໍ່ສຳເລັດບົກຜ່ອງ ຕ້ອງສຳຫຼວດກວດກາລົງວິໄນ.

ແຂວງສະຫວັນນະເຂດ ມີມູນເຊື້ອຮ່ວມມືກັບພາກເອກະຊົນ ແລະ ການດຶງດູດການລົງທຶນຈາກຕ່າງປະເທດ, ຄວນສືບຕໍ່ຊຸກຍູ້ໃຫ້ແຂງແຮງ ຖ້າຢາກໄດ້ການລົງທຶນຕ້ອງປັບປຸງກົນໄກ, ປັບປຸງລະບຽບການ, ປັບປຸງຄົນໃຫ້ເຂົ້າກັບສະພາບການ, ບໍ່ປະປ່ອຍໃຫ້ຄົນຈົ່ມວ່າ, ບໍ່ປະປ່ອຍໃຫ້ເສຍເວລາ, ເສຍໂອກາດ.

ສໍາລັບຄະນະປະຈໍາພັກຊຸດໃໝ່ ທີ່ໄດ້ຮັບການເລືອກຕັ້ງໃນກອງປະຊຸມໃຫຍ່ຄັ້ງນີ້ ຈະຕ້ອງໄດ້ສືບຕໍ່ເປັນຫຼັກແຫຼ່ງ, ຊີ້ນຳ-ນຳພາ, ເປັນແບບຢ່າງນຳໜ້າໃນການປະຕິບັດໜ້າທີ່ ກໍຄືການດຳລົງຊີວິດ ເພື່ອໃຫ້ສົມກັບຄວາມເຊື່ອໝັ້ນ ແລະ ຄວາມໄວ້ວາງໃຈຂອງມະຫາຊົນ, ຂອງຜູ້ແທນກອງປະຊຸມ ທີ່ໄດ້ເລືອກເອົາບັນດາສະຫາຍເປັນຄະນະພັກ, ເປັນຫົວຈັກຫຼັກແຫຼ່ງ, ເປັນແກ່ນນຳທີ່ແທ້ຈິງ ບັນດາສະຫາຍຕ້ອງຝືກຝົນຫຼໍ່ຫຼອມຕົນເອງ, ກໍ່ສ້າງຕົນເອງເຂົ້າໃນຂະບວນການ, ແຕ່ງຢ່າງໃດກໍ່ດີ ບັນດາສະຫາຍທັງໝົດນັບທັງຄະນະພັກຊຸດເກົ່າ ທີ່ອອກພັກຜ່ອນຮັບອຸດນູນບຳນານ ແລະ ຄະນະພັກຊຸດໃໝ່ຕະຫຼອດເຖິງສະມາຊິກພັກ, ພະນັກງານ, ກໍ່ຄືປະຊາຊົນບັນດາເຜົ່າ ຈົ່ງສືບຕໍ່ໃຫ້ການຊ່ວຍເຫຼືອສະໜັບສະໜູນ ແລະ ຮ່ວມມືກັບສະຫາຍເລຂາພັກແຂວງ ເພື່ອເຮັດສຳເລັດໜ້າທີ່ການເມືອງທີ່ກອງປະຊຸມຄັ້ງນີ້ມອບໝາຍໃຫ້.

---------------

ຢ່າລືມກົດຕິດຕາມເພຈ All in LAOS


------------------------------

LEAVE A REPLY

Please enter your comment!
Please enter your name here