ໃນວັນທີ 15 ຕຸລາ 2020 ທ່ານ ປະສົງສິນ ຈະເລີນສຸກ ເຈົ້າເມືອງອຸທຸມພອນ ແຂວງສະຫວັນນະເຂດ ພ້ອມດ້ວຍພາກສ່ວນທີ່ກ່ຽວຂ້ອງ ໄດ້ລົງໄປເບິ່ງສະພາບເສັ້ນທາງແຕ່ທາງແວ່ທາງເລກທີ 10 ເຂົ້າຫາບ້ານນາເກັງ ແລະ ບ້ານເອ້ ທີ່ພົບກັບຄວາມຫຍຸ້ງຍາກລໍາບາກຂອງປະຊາຊົນໃນການທ່ຽວໄປມາຄ້າຂາຍ,ຖ້າຫາກວ່າມື້ໃດຝົນຕົກສະພາບການສັນຈອນແຕ່ບ້ານນາເກັງ ຫາບ້ານເອ້ ລົດໃຫຍ່ແມ່ນໄປບໍ່ໄດ້ເລີຍ
ທ່ານ ພັນມະຫາ ແກ້ວນິນ ຫົວໜ້າຫ້ອງການໂຍທາທິການ-ຂົນສົ່ງເມືອງລາຍງານຕໍ່ນັກຂ່າວພວກເຮົາວ່າ: ຈາກການສໍາຫຼວດຕົວຈິງຂອງເສັ້ນທາງດັ່ງກ່າວນັບຕັ້ງແຕ່ທາງເລກທີ 10 ແວ່ເຂົ້າຫາບ້ານນາເກັງ ມີຄວາມຍາວ 2 ກິໂລແມັດ,ເຊິ່ງຈະໄດ້ມີການກວດແປຮູບ ແລະ ຖົມບາງຈຸດດ້ວຍວັດສະດຸທີ່ມີຄຸນະພາບ,ເສັ້ນທາງຈາກບານນາເກັງ ໄປຈົນຮອດບ້ານເອ້ ມີຄວາມຍາວ 3,5 ກິໂລແມັດ,ໂດຍຈະໄດ້ແປຮູບ ແລະ ຍົກລະດັບເພາະເປັນພື້ນທີ່ຂ້ອນຂ້າງຕໍ່າ,ເຊິ່ງຈະໄດ້ໃສ່ທໍ່ພີ 80 ຢູ່ 05 ຈຸດ ຮອດທາງແຍກບ້ານນາໂພ ແລະ ຖົມບາງຈຸດໄປຈົນຮອດບ້ານເອ້,ລວມມູນຄ່າທັງໝົດຊິຕົກຢູ່ປະມານ 500 ລ້ານກວ່າກີບ
ໂອກາດລົງເບິ່ງສະພາບເສັ້ນທາງຕົວຈິງ ທ່ານ ປະສົງສິນ ຈະເລີນສຸກ ຍັງເນັ້ນໃຫ້ນາຍບ້ານວ່າ: ຈັ່ງໃດກະຕາມກ່ອນເຮົາຊິໄດ້ສ້ອມແປງຄືນໃໝ່ຢາກໃຫ້ນາຍບ້ານລະດົມປະຊາຊົນພາຍໃນບ້ານສ້າງຂະບວນການອອກແຮງງານລວມປົວແປງເສັ້ນທາງບ່ອນໃດທີ່ເປັນບວກເປັນຂຸມພ້ອມກັນຂຸດເອົາດິນມາຖົມໃຫ້ມັນທຽວໄປມາໄດ້ສະດວກເສຍກ່ອນ, ໂດຍສະເພາະແມ່ນເສັ້ນທາງຮ່ອມຂອງບ້ານ ໃຫ້ມັນສະອາດງາມຕາ, ບໍ່ໃຫ້ເປິໃຫ້ເປື້ອນ ບໍ່ຟ້າວໃຫ້ຄອງຄອຍງົບປະມານຂອງລັດ ເຮົາເຮັດໄປເສຍກ່ອນ,ຕາມແຜນແລ້ວເສັ້ນທາງດັ່ງກ່າວທາງເມືອງແມ່ນໄດ້ເອົາເສັ້ນທາງເລກທີ 10 ແວ່ເຂົ້າບ້ານນາເກັງໄປຫາບ້ານເອ້ ຈັດເປັນບູລິມະສິດເຂົ້າໃນການສ້ອມແປງແລ້ວໃນປີ 2021 ລໍຖ້າແຕ່ຂັ້ນເທິງອະນຸມັດເທົ່ານັ້ນ,ຈາກນັ້ນທ່ານເຈົ້າເມືອງ ແລະ ພາກສ່ວນທີ່ກ່ຽວຂ້ອງ ກໍ່ໄດ້ຍ່າງສໍາຫຼວດເສັ້ນທາງແຕ່ບ້ານນາເກັງຮອດບ້ານເອ້ຕື່ມອີກ.
.
