ໃນວັນທີ 13 ຕຸລາ 2020 ນີ້, ກອງບັນຊາການທະຫານແຂວງ ຫຼວງນໍ້າທາ ໄດ້ຈັດພິທີມອບໃບຍ້ອງຍໍຜົນງານ 5 ປີ 2016-2020, ຢູ່ທີ່ສະໂມສອນກອງບັນຊາການທະຫານແຂວງໂດຍ ການເປັນປະທານຂອງສະຫາຍ ພົນຈັດຕະວາ ອີ່ນແກ້ວ ມະນີຈັນ ຫົວໜ້າກອງບັນຊາການທະຫານ ແຂວງຫຼວງນໍ້າທາ, ມີຄະນະປະຈໍາພັກກອງບັນຊາການ, ຄະນະພັກ-ຄະນະບັນຊາ 5 ຫ້ອງ, ກົມກອງອ້ອມຂ້າງກອງບັນຊາການເຂົ້າຮ່ວມ.
ໃນພິທີ, ສະຫາຍ ພັນຕີ ບຸນໄລ ຕຽນແສງດາວ ຫົວໜ້າພະແນກ ນະໂຍບາຍໄດ້ຂຶ້ນຜ່ານຂໍ້ຕົກລົງຂອງກະຊວງປ້ອງກັນປະເທດ ສະບັບເລກທີ 3415/ກປທ ລົງວັນທີ 17/8/2020 ວ່າດ້ວຍການມອບຫຼຽນໄຊພິລາດອາດຫານໃຫ້ກົມກອງລວມໝູ່ 3 ກົມກອງ ໃນນີ້ຫຼຽນໄຊພິລາດອາດຫານຊັ້ນ II ກອງບັນຊາການທະຫານແຂວງຫຼວງນໍ້າທາ, ຊັ້ນ III ກອງບັນຊາກາທະຫານມືອງນາແລ ແລະ ກອງບັນຊາການທະຫານເມືອງລອງ, ພ້ອມນັ້ນຍັງມີຂໍ້ຕົກລົງຂອງກົມໃຫຍ່ການເມືອງກອງທັບວ່າດ້ວຍການຍ້ອງຍໍ ລວມໝູ່ 6 ກົມກອງ.
ໂອກາດນີ້, ສະຫາຍ ພົນຈັດຕະວາ ອີ່ນແກ້ວ ມະນີຈັນ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ບັນດາກົມກອງຍາດມາໄດ້ໃນໄລຍະຜ່ານມາຈົ່ງສືບຕໍ່ເອົາໃຈໃສ່ສຶກສາອົບຮົມການເມືອງ-ນໍາພາແນວຄິດເປັນບັນຫາສຳຄັນຕິດພັນກັບການຈັດຕັ້ງປະຕິບັດ 4 ໜ້າທີ່ໃຫຍ່ 26 ແຜນງານທີ່ຄະນະພັກກະຊວງປ້ອງກັນປະເທດວາງອອກ, ປະຕິບັດຕາມ 5 ຫຼັກການ 3 ທິດນໍາ ຂອງພັກ ເຮັດໃຫ້ພະນັກງານສະມາຊິກພັກເຂົ້າໃຈຕໍ່ພາລະບົດບາດສິດ, ໜ້າທີ່ ຂອງຕົນ, ກຳແໜ້ນທາງດ້ານທິດສະດີຫຼັກການໃນການປັບປຸງກໍ່ສ້າງກົມກອງເຂັ້ມແຂງ ໜ່ວຍພັກປອດໃສ ເຂັ້ມແຂງ ໜັກແໜ້ນ, ຈັດຕັ້ງເຊື່ອມຊຶມຜັນຂະຫຍາຍບັນດາມະຕິແນວທາງນະໂຍບາຍຂອງພັກ-ກົດໝາຍຂອງລັດ, ຂໍ້ກຳນົດກົດລະບຽບຂອງກອງທັບສາມາດເຮັດໃຫ້ພະນັກງານສະມາຊິກພັກມີຄວາມຮູ້-ຄວາມເຂົ້າໃຈຢ່າງເລິກເຊິ່ງຕໍ່ທາດແທ້ຂອງພັກມູນເຊື້ອອັນດີງາມຂອງຊາດ, ຂອງກອງທັບ, ພະນັກງານມີທັດ ສະນະຫັນປ່ຽນຢ່າງຕັ້ງໜ້າ, ມີຄວາມບຸກບືນຕໍ່ໜ້າທີ່ວຽກງານ, ຫັນເອົາມະຕິຕ່າງໆຂອງຄະນະພັກຂັ້ນເທິງເປັນແຜນການ, ໂຄງ ກາານ, ແຜນງານຂອງກົມກອງກໍ ຄືໜ່ວຍພັກ,ເປັນລະບົບ,ທວງທັນ ກັບເວລາແທດເໝາະກັບສະພາບ ທ່າ ແຮງຄວາມເປັນຈິງຂອງກົມກອງ.
ໂດຍ: ບຸນມີ
---------------
ຢ່າລືມກົດຕິດຕາມເພຈ All in LAOS
------------------------------
