ຕອນເຊົ້າວັນທີ 30 ກັນຍານີ້ ຢູ່ທີ່ສະໂມສອນຂອງແຂວງ ອົງການແນວລາວສ້າງຊາດແຂວງ ອຸດົມໄຊ ໄດ້ຈັດພິທີ ສະເຫຼີມສະຫຼອງວັນສ້າງຕັ້ງແນວລາວສ້າງຊາດຄົບຮອບ 70ປີ ຄື 13 ສິງຫາ 1950 ຫາ 13 ສິງຫາ 2020 ຂຶ້ນຢ່າງເປັນທາງການ ໂດຍການເຂົ້າຮ່ວມເປັນກຽດຂອງທ່ານ ຄໍາໃບ ດຳລັດ ກຳມະການສູນກາງພັກ, ຮອງປະທານແນວລາວສ້າງຊາດ, ທ່ານ ປ.ອ ຄຳພັນ ເຜີຍຍະວົງ ກຳມະການສູນກາງພັກ, ເລຂາຄະນະບໍລິຫານງານພັກແຂວງ-ເຈົ້າແຂວງ ອຸດົມໄຊ. ມີການນໍາແຂວງ, ພະນັກງານອາວຸໂສປະຕິວັດ, , ຜູ້ຊົງຄຸນວຸດທິ, ພຣະສົງ, ນັກຮົບແຂ່ງຂັນ,ສອງກອງກຳລັງປ້ອງກັນຊາດ-ປ້ອງກັນຄວາມສະຫງົບ, ຕົວແທນຊົນເຜົ່າ, ສາສະໜາ, ພະນັກງານຫຼັກແຫຼ່ງ ຕະຫຼອດຮອດນັກຮຽນຮູ້ປັນຍາຊົນອ້ອມຂ້າງແຂວງເຂົ້າຮ່ວມ.
ພິທີ ທ່ານ ວັນນາ ແກ້ວສັນຕິ ຄະນະປະຈຳພັກແຂວງ ປະທານແນວລາວສ້າງຊາດແຂວງ ໄດ້ຂຶ້ນຜ່ານບົດລາຍງານຜົນສຳເລັດກອງປະຊຸມໃຫຍ່ຄັ້ງທີ 7 ຂອງແນວລາວສ້າງຊາດແຂວງ ແລະ ມູນເຊື້ອ, ຜົນງານຂອງແນວລາວສ້າງຊາດຕະຫຼອດໄລຍະ 70 ປີ ຜ່ານມາ.
ທ່ານ ປອ ຄຳພັນ ເຜີຍຍະວົງ ກຳມະການສູນກາງພັກ, ເລຂາຄະນະບໍລິຫານງານພັກແຂວງ-ເຈົ້າແຂວງອຸດົມໄຊ ກ່າວປາໄສໃນພິທີໂຮມຊຸມນຸມວ່າ ການຈັດຕັ້ງສະເຫຼີມສະຫຼອງວັນສ້າງຕັ້ງແນວລາວສ້າງຊາດຄົບຮອບ70 ປີ ແມ່ນການຫວນຄື່ນປະຫວັດ-ມູນເຊື້ອ, ຜົນງານການກຳເນີດ, ເຕີບໃຫ່ຍຂະຫຍາຍຕົວຂອງອົງການແນວລາວສ້າງຊາດແຫ່ງຊາດລາວແຕ່ລະສະໄໝ ແລະ ການເຄື່ອນໄຫວຂອງບັນດາບັນພະບູລຸດ, ການນຳປະຕິວັດທີ່ໄດ້ອຸທິດເພື່ອພາ ລະກິດປະຕິວັດຕໍ່ສູ້ປົດປ່ອຍຊາດ ກໍຄືພາລະກິດປົກປັກຮັກສາ ແລະ ສ້າງພັດທະນາປະເທດຊາດ. ເປັນການລະນຶກເຖິງວິລະກຳລໍ້າເລີດ, ຄຸນງາມຄວາມດີຂອງບຸກຄົນ ແລະ ການຈັດຕັ້ງ, ບັນດາທ່ານຜູ້ນຳທີ່ຮັກຊາດ, ນັກຮົບປະຕິວັດ, ຜູ້ຊົງຄຸນວຸດທິ, ປະຊາຊົນບັນດາເຜົ່າ ທີ່ໄດ້ເສຍສະລະເລືອດເນື້ອເພື່ອຊາດ ເພື່ອພາລະກິດປະຕິວັດຕະຫຼອດໃນໄລຍະຜ່ານມາ. ກ່ອນໜ້ານີ້ 70 ປີ ການກຳເນີດ-ເຕີບໃຫ່ຍຂະຫຍາຍຕົວ ຂອງຂະບວນການຕໍ່ສູ້ປະຕິວັດ, ຕ້ານພວກລ່າເມືອງຝຣັ່ງ-ອາເມລິກາ. ໂດຍເລີ່ມຈາກແນວທາງນະໂຍບາຍຂອງພັກກອມມຸນິດອິນຈີນ ກໍ່ຄືຄະນະພັກແຄ້ວນລາວທີ່ຖືກຕ້ອງ, ສອດຄ່ອງກັບເງື່ອນໄຂຕົວຈິງ, ຜ່ານການກະກຽມໄປໃນມາໄລຍະໜຶ່ງ. ກອງປະຊຸມໃຫ່ຍແນວໂຮມທົ່ວປະເທດໄດ້ໄຂຂຶ້ນ ໃນວັນທີ 13 ສິງຫາ 1950, ຊຶ່ງໃສຊື່ວ່າ: ແນວລາວອິດສະ ຫຼະ ແລະ ກອງປະຊຸມໄດ້ວາງໂຄງການ ການເມືອງ 12 ຂໍ້, ໄດ້ເລືອກຕັ້ງຄະນະກຳມະການສູນກາງແນວລາວອິດສະຫຼະ 15 ທ່ານ, ແຕ່ງຕັ້ງລັດຖະບານລາວຕໍ່ຕ້ານ ໂດຍແມ່ນທ່ານ ສຸພາ ນຸວົງ ເປັນປະທານສູນກາງແນວລາວອິດສະຫຼະ ແລະ ທັງເປັນນາຍົກລັດຖະມົນຕີ (ລັດຖະບານລາວຕໍ່ຕ້ານ), ນັ້ນແມ່ນເຫດການ ການເມືອງທີ່ມີຄວາມໝາຍທີ່ສຸດໃນພາລະກິດຕໍ່ສູ້ປະຕິວັດຂອງຊາດລາວທີ່ມີການຈັດຕັ້ງ ແລະ ມີການນຳ ພາ, ເປັນປະຫວັດສາດ ແຫ່ງການກຳເນີດ ແລະ ເຕີບໃຫ່ຍຂະຫຍາຍຕົວໃນຂະບວນວິວັດຂອງການຕໍ່ສູ້ປະ ຊາຊົນບັນດາເຜົ່າ ໄດ້ມີອົງການຈັດຕັ້ງນຳພາຂອງຕົນຄື ແນວລາວອິດສະຫຼະ.
ມາຮອດຕົ້ນປີ 1956 ກອງປະຊຸມໃຫ່ຍຜູ້ແທນ ຄັ້ງທີ II ຂອງແນວລາວອິດສະຫຼະ ໄດ້ປ່ຽນຊື່ ແນວລາວອິດສະຫຼະ ເປັນແນວລາວຮັກຊາດ, ໄດ້ຍົກສູງພາລະບົດບາດ, ເຮັດໜ້າທີ່ເຕົ້າໂຮມທຸກກຳລັງແຮງ, ທຸກການຈັດຕັ້ງ, ປະຊາຊົນບັນດາເຜົ່າໄດ້ສາມັກຄີກັນເປັນຈິດໜຶ່ງໃຈດຽວເຂົ້າໃນແນວໂຮມກູ້ຊາດອັນກວ້າງຂວາງ ເພື່ອຕໍ່ສູ້ພວກສັດຕູຮຸກຮານ ແລະ ລູກແຫ່ງຕີນມືໃຫ້ໜົດໄປ. ກໍ່ສ້າງປະເທດລາວສັນຕິພາບ ເປັນກາງ ເອກະລາດ ປະຊາທິປະໄຕ ແລະ ວັດທະນະຖາວອນ, ສືບຕໍ່ນຳພາການປະຕິວັດກ້າວຂຶ້ນ.
ພາຍຫຼັງປະເທດຊາດ ໄດ້ຮັບການປົດປ່ອຍຢ່າງສົມບູນ ແນວລາວຮັກຊາດສືບຕໍ່ເສີມຂະຫຍາຍມູນເຊື້ອ ເພື່ອໃຫ້ສອດຄ່ອງກັບຍຸດທະສາດຂອງພັກ, ຕໍ່ການຟືນຟູປະເທດຊາດ ແລະ ກອງປະຊຸມໃຫ່ຍຜູ້ແທນ ຄັ້ງທີ່ IV ຂອງແນວລາວຮັກຊາດໃນປີ 1979 ຈຶ່ງໄດ້ປ່ຽນຊື່ແນວລາວຮັກຊາດ ມາເປັນແນວລາວສ້າງຊາດ ເຖິງປັດຈຸບັນ ແລະ ໄດ້ປະກອບສ່ວນຢ່າງຕັ້ງໜ້າໃນການປຸກລະດົມ, ເຕົ້າໂຮມຄວາມສາມັກຄີປອງດອງປະຊາຊົນບັນດາເຜົ່າ, ປະຕິບັດ 2 ໜ້າທີ່ຍຸດທະສາດ: ປົກປັກຮັກສາ ແລະ ສ້າງສາພັດທະນາປະເທດຊາດ, ຖືເອົາການສຶກສາອົບຮົມ, ນຳພາວຽກງານການເມືອງ-ແນວຄິດ, ສ້າງສະຕິຊາດ, ຮັກບ້ານເກີດເມືອງນອນ, ສ້າງໃຫ້ປະຊາຊົນບັນດາເຜົ່າເປັນເຈົ້າຂອງປະເທດຊາດ, ຄວາມຕື່ນຕົວການເມືອງ, ການດຳລົງຊີວິດ, ສ້າງຄວາມສາມັກຄີກັນເປັນປຶກແຜ່ນ.
ຕະຫຼອດໄລຍະ 45 ປີຜ່ານມາ ແນວລາວສ້າງຊາດແຂວງອຸດົມໄຊ ແມ່ນໜຶ່ງໃນການເຄື່ອນໄຫວ, ຈັດຕັ້ງປະຕິບັດຕາມພາລະບົດບາດຂອງຕົນ, ໂດຍຖືເອົາການຊຸກຍູ້ ແລະ ເຂົ້າຮ່ວມທຸກການຈັດຕັ້ງພັກ, ອົງການປົກຄອງຂັ້ນຕ່າງໆຂອງລັດ, ການຈັດຕັ້ງສັງຄົມ, ຊຸກຍູ້ ແລະ ເຂົ້າຮ່ວມຂະບວນການກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ, ສຶກສາອົບຮົມປະຊາຊົນບັນດາເຜົ່າ, ຊັ້ນຄົນຕ່າງໆ, ສາສະໜາ ແລະ ເພດ-ໄວ ໃຫ້ມີຄວາມຮັບຮູ້-ເຂົ້າໃຈ, ຕື່ນຕົວເຂົ້າຮ່ວມການແກ້ໄຂຄວາມທຸກຍາກ ໂດຍຕິດພັນການຜະລິດເປັນສິນຄ້າ ອັນໄດ້ເຮັດໃຫ້ຊີວິດການເປັນຢູ່ຂອງເຂົາເຈົ້າດີຂຶ້ນເປັນກ້າວໆ, ແນວລາວສ້າງຊາດແຂວງແຕ່ລະຂັ້ນ ໄດ້ຮັບການປັບປຸງທາງດ້ານເນື້ອໃນ, ຮູບການ ແລະ ວິທີການເຄື່ອນໄຫວນັບມື້ນັບດີຂຶ້ນ, ເອົາໃຈໃສ່ໃນການປະສານສົມທົບອັງຈັດຕັ້ງພັກ-ລັດ ແລະ ບັນດາອົງການຈັດຕັ້ງມະຫາຊົນ, ຊຸກຍູ້ການຈັ້ດຕັ້ງປະຕິບັດແຜນພັດທະນາເສດຖະກິດ-ສັງຄົມ, ການພົວພັນຮ່ວມມື ແລະ ປະຕິບັດແນວທາງການທູດປະຊາຊົນ ໂດຍສະເພາະແມ່ນສາມັກຄີກັບແນວໂຮມປະເທດເພື່ອນມິດຍຸດທະສາດ ເພື່ອແລກປ່ຽນບົດຮຽນ, ການຊ່ວຍເຫຼືອ ແລະ ການຮ່ວມອົງການຈັດຕັ້ງສາກົນ.
ພິທີ ຍັງໄດ້ມອບໃບຍ້ອງຍໍຂອງປະທານແນວລາວສ້າງຊາດແຂວງ, ປະທານສູນກາງແນວລາວສ້າງຊາດ ແລະ ມອບຫຼຽນກາລະນຶກ 70 ປີ ວັນສ້າງຕັ້ງແນວລາວສ້າງຊາດ ໃຫ້ແກ່ ການຈັດຕັ້ງ, ກົມກອງ, ການນຳແຂວງ, ອາດີດການນຳແນວລາວສ້າງຊາດ, ກຳມະການແນວລາວສ້າງຊາດແຂວງ ແລະບຸກຄົນທີ່ມີຜົນງານດີເດັ່ນໃນການປະກອບສ່ວນເຄື່ອນໄຫວວຽກງງານແນວລາວສ້າງຊາດໃນໄລຍະຜ່ານມາຕື່ມອີກ.
