ໃນວັນທີ 28 ກັນຍາ 2020 ນີ້ ກອງພັນນ້ອຍ 419 ທີ່ຂື້ນກັບກອງບັນ ຊາການທະຫານແຂວງບໍ່ແກ້ວ ໄດ້ປະກາດການເລື່ອນຊັ້ນໃຫ້ນາຍສິບພາຍໃນກົມກອງຂອງຕົນໂດຍການເປັນປະທານຂອງ ສະຫາຍ ພັນໂທ ວຽງແກ້ວ ໄຊຍະສານ ເລຂາຄະນະພັກຮາກຖານ ຫົວໜ້າການເມືອງກອງພັນ 419 ມີຄະນະພັກ-ຄະນະບັນຊາ, ພະນັກງານ-ນັກຮົບຕະຫຼອດຮອດຜູ້ທີ່ໄດ້ການ ເລື່ອນຊັ້ນເຂົ້າຮ່ວມທັງຫມົດ 79 ສະຫາຍ ຍິງ 5 ສະຫາຍ.
ສະຫາຍ ຮ.ອ ບົວສີ ສຸລິວົງ ຮອງການທະຫານກອງພັນ419 ຂື້ນຜ່ານຂໍ້ຕົກລົງເລື່ອນ ຊັ້ນນາຍສິບ ວ່າດ້ວຍ ການເລື່ອນຊັ້ນໃຫ້ພົນທະຫານ ປະຈໍາ 6 ເດືອນຕົ້ນປີ 2020, ອີງຕາມຂໍ້ກໍານົດຂອງກະຊວງປ້ອງກັນປະເທດ ວ່າດ້ວຍລະບຽບການນາຍ ແລະ ພົນທະຫານຂອງກອງທັບ ປະຊາຊົນລາວ (ສະບັບປັບປຸງ), ອີງຕາມທິດທາງປັບປຸງກໍ່ສ້າງ ກໍາລັງປະກອບອາວຸດໃຫ້ເຕີບໃຫຍ່ເຂັ້ມແຂງກ້າວເປັນກອງທັບປະຕິວັດໃຫ້ມີລະບຽບແບບແຜນທັນສະໄໝຕາມຄວາມຮຽກຮ້ອງຕ້ອງການໃນສະເພາະໜ້າ ແລະ ຍາວນານ. ໃນນີ້, ກອງບັນຊາການທະຫານແຂວງບໍ່ແກ້ວ ຕົກລົງ ເລື່ອນຊັ້ນ ສິບໂທ ຂື້ນສິບເອກ ຈຳນວນ 04 ສະຫາຍ.
ພິທີ ປະທານໄດ້ໃຫ້ກຽດໂອ້ລົມ ເຊິ່ງສະຫາຍໄດ້ຍ້ອງຍໍຊົມເຊີຍຕໍ່ ຜົນງານແຕ່ລະສະຫາຍຍາດມາໄດ້ໃນໄລຍະຜ່ານມາ ເຊິ່ງເປັນຜົນງານທີ່ມີກຽດສະຫງ່າທີ່ສູງ ໃນການປະຕິບັດໜ້າທີ່ວຽກງານການເມືອງຂອງຕົນ ແລະ ເນັ້ນໜັກໃຫ້ແຕ່ລະສະຫາຍ ຈົ່ງພ້ອມກັນສ້າງຜົນງານພາຍໃນກົມກອງໃຫ້ເຕີບໃຫຍ່ກວ່າເກົ່າ, ເພີ່ມທະວີສ້າງຄວາມ ສາມັກຄີພາຍໃນ ແລະ ພາຍນອກໃຫ້ກວ້າງຂວາງ, ເອົາໃຈໃສ່ຄົ້ນຄວ້າຮໍ່າຮຽນ, ຊອກຮູ້ອັນໃໝ່, ເພີ່ມພູມຜະລິດຜົນ, ເຮັດສໍາເລັດທຸກໜ້າທີ່ ທີ່ການຈັດຕັ້ງທຸກຂັ້ນມອບໝາຍໃຫ້.
ໂດຍ:ສົມສັກ
