ຕາມການໃຫ້ສຳພາດຂອງທ່ານ ປອ ແສງທອງ ວັງແກ້ວມະນີ ເຈົ້ານະຄອນໄກສອນ ພົມວິຫານ ແຂວງສະຫວັນນະເຂດ ໄດ້ໃຫ້ຮູ້ວ່າ: ງານບຸນປະເພນີອອກພັນສາ – ຊ່ວງເຮືອ ປະຈຳປີ 2020 ທີ່ນະຄອນໄກສອນ ພົມວິຫານ ແມ່ນໄດ້ເລີ່ມເປີດໃຫ້ມີການຄົບງັນຢ່າງເປັນທາງການ ນັບແຕ່ວັນທີ 28 ກັນຍາ ຫາ ວັນທີ 3 ຕຸລາ 2020 ການຈັດງານປີນີ້ແມ່ນຈະໄດ້ມີການແຂ່ງຂັນເຮືອຊ່ວງປະເພດເຮືອກິລາ 9-12 ສີພາຍ ເພື່ອເປັນການອະນຸລັກຮີດຄອງປະເພນີ ແລະ ສົ່ງເສີມການທ່ອງທ່ຽວ ຕິດພັນກັບການກະຕຸ້ນເສດຖະກິດພາຍໃນແຂວງ,ໃນໄລຍະເຝົ້າລະວັງການລະບາດຂອງພະຍາດໂຄວິດ 19 ສຳລັບສະຖານທີ່ຈັດງານແມ່ນໄດ້ກຳນົດເອົາຖະໜົນທ່າແຮ່ແຄມຂອງ ແຕ່ຂອບເຂດດ້ານຫຼັງໂຮງໝໍແຂວງໄປຮອດສວນສາທາລະນະໜູຮັກ ພູມສະຫວັນ ( ກວມເອົາເຂດການກໍ່ສ້າງກັນຕະຝັ່ງເຈື່ອນແຄມຂອງ ) ລົງຕາມຖະໜົນກຸວໍລະວົງ,ຕັດໃສ່ຖະໜົນຄັນທະບູລີ ( ເສັ້ນລ່ອງ ) ໄປຈົນຮອດແຍກພະແນກສາທາລະນະສຸກແຂວງ ແລ້ວອອກໃສ່ຖະໜົນທ່າແຮ່ແຄມຂອງ.

ສ່ວນກິດຈະກຳພາຍໃນງານແມ່ນປະກອບມີ: ພິທີທາງສາສະໜາຕາມຮີດຄອງປະເພນີ,ໄຫຼກະໂທງ,ໄຫຼເຮືອໄຟ,ຊ່ວງເຮືອປະເພນີ,ແຂ່ງຂັນເຮືອປະເພດ 9-12 ສີພາຍ,ຕະຫຼາດນັດວາງສະແດງສິນຄ້າປະເພດຕ່າງໆ ພາຍໃນປະເທດ ແລະ ພິເສດໃນຄັ້ງວັນທີ 2 ຕຸລາ ຈະມີການແຂ່ງຂັນແຈັດສະກີ ເຊິ່ງເປັນກິລາອີກປະເພດໜຶ່ງທີ່ບໍ່ເຄີຍຈັດມາກ່ອນໃນງານບຸນປະເພນີອອກພັນສາໃນແຕ່ລະປີ ຫຼື ເອີ້ນວ່າເປັນປີທຳອິດເລີຍກະວ່າໄດ້.

ສຳລັບການຄົບງັນແມ່ນຈະບໍ່ອະນຸຍາດໃຫ້ວົງດົນຕີທຸກປະເພດລົງເສບງັນ ລວມທັງການຕັ້ງຮ້ານຄາຣາໂອເກະ ແລະ ວົງເອເລັກໂທນ,ອະນຸຍາດໃຫ້ໃຊ້ແຕ່ເຄື່ອງສຽງຂະໜາດນ້ອຍໃນການໂຄສະນາສິນຄ້າ, ແລະ ປະກອບໃນວົງຊິງຊ້າ,ມ້າໝົນ,ສະໄລເດີ້ເທົ່ານັ້ນ. ທັງນີ້ກໍ່ເພື່ອເປັນການສະກັດກັ້ນ ແລະ ຕ້ານການລະບາດພະຍາດໂຄວິດ 19

ຂ່າວ: ອັກສອນສິນ ພົມມະຈັນ

---------------

ຢ່າລືມກົດຕິດຕາມເພຈ All in LAOS


------------------------------

LEAVE A REPLY

Please enter your comment!
Please enter your name here