ທ້າຍອາທິດຜ່ານມານີ້, ປະຊາຊົນ ບ້ານດົງດອກໄມ້ ທີ່ຂື້ນກັບກຸ່ມບ້ານທີ 8 ຂອງເມືອງໄຊພູທອງ ແຂວງສະຫວັນນດເຂດ ໄດ້ສາມັກຄີກັນອອກແຮງງານລວມປົວແປງເສັ້ນທາງທີ່ເປັນຂຸມເປັນບໍ່ ພາຍໃນບ້ານຂື້ນຢ່າງເປັນຂະບວນການຟົດຟື້ນ,ທັງນີ້ກໍ່ເພື່ອເປັນການສ້າງຂະບວນການຂໍ່ານັບຮັບຕ້ອນໃຫ້ແກ່ກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ ທີ່ຈະໄດ້ໄຂຂື້ນໃນມໍ່ໆນີ້ໃຫ້ມີຜົນສໍາເລັດຢ່າງຈົບງາມ ເຊິ່ງການນໍາພາຂະບວນການອອກແຮງງານ ຂອງ ຍາທ່ານ ບຸນນໍາ ພົມມະວົງ ຄະນະ ອພສ ເມືອງ ໄຊພູທອງ ໄດ້ນໍາພາພະສົງສໍາມະ ແລະ ອໍານາດການປົກຄອງຂອງບ້ານ ແລະ ຊາວໝຸ່ມ-ແມ່ຍິງ ພາຍໃນບ້ານເຂົ້າຮ່ວມຈໍານວນ 270 ກວ່າຄົນ.
ສໍາລັບການອອກແຮງງານໃນຄັ້ງນີ້,ໜ້າວຽກຫຼັກແມ່ນໄດ້ສາມັກຄີກັນຂຸດຄອງລະບາຍນໍ້າທັງສອງພາກທາງ ຂົນດີນຖົມໃສ່ບ່ອນທີ່ເປັນຂຸມ ແລະ ຕັດຮອນກິ່ງໄມ້ອອກທັງສອງພາກທາງ, ການອອກແຮງງານປົວແປງເສັ້ນທາງແມ່ນໄດ້ເລີ່ມ ແຕ່ທາງເຂົ້າໂຮງຮຽນ ມ.ສ ດົງດອກໄມ ຫາວັດດວງມາລາ ເຊິ່ງມີໄລຍະທາງ 2.500 ແມັດ . ເຊິ່ງການອອກແຮງງານແມ່ນເຕັມໄປດ້ວຍບັນຍາກາດຟົດຟື້ນມ່ວນຊື່ນ, ອີກຢ່າງໜຶ່ງທັງເປັນການສ້າງຄວາມສາມັກຄີພາຍໃນບ້ານອີກດ້ວຍ, ເພື່ອເຮັດໃຫ້ເສັ້ນທາງຂອງບ້ານມີຄວາມສະອາດ,ເປັນລະບຽບຮຽບຮ້ອຍ ແລະ ງາມຕາ ພ້ອມທັງເຮັດໃຫ້ເສັ້ນທາງພາຍໃນບ້ານສັນຈອນໄປມາຊື້-ຂາຍຂອງປະຊາຊົນພາຍໃນບ້ານ ດົງດອກໄມ້ໄດ້ສະດວກສະບາຍຂື້ນກວ່າເກົ່າ
ພາບ-ຂ່າວ ພັນທະມິດ ວົງສຸທິ
