ວັນທີ 24 ກັນຍາ ນີ້, ໂຮງຮຽນ 303 ໄດ້ຈັດພິທີເປີດຊຸດອົບຮົມກໍ່ສ້າງນາຍສິບຕີພິເສດຊຸດທີ 30 ແລະ ພະນັກງານບໍາລຸງລະບົບ 6 ເດືອນຊຸດທີ 2 ສົກຮຽນ 2020-2021, ໂດຍການເຂົ້າ ຮ່ວມເປັນປະທານຂອງສະຫາຍ ພົນຕີ ສີດາລໍ່ ຈົ່ງເຕັງເຈ້ຍຊ້າກຳ ມະການຄະນະປະຈຳພັກກົມໃຫຍ່ຮອງຫົວໜ້າກົມໃຫຍ່ເສນາທິການກອງທັບ, ມີຄະນະພັກ-ຄະນະອໍານວຍການໂຮງຮຽນ 303, ຕາງໜ້າກົມ 49, ກົມໂຮງຮຽນ, ກົມອົບຮົມ, ກົມກໍາລັງພົນ, ກອງພັນໃຫຍ່497, ໂຮງຮຽນ 301, ໂຮງຮຽນທະຫານຊາຍແດນ 712, ພະນັກງານ, ຄູ-ອາຈານ, ແຂກຖືກເຊີນພ້ອມດ້ວຍນັກ ຮຽນກໍ່ສ້າງນາຍສິບຊຸດທີ 30 ແລະ ພະນັກງານບຳລຸງຊຸດທີ 2 ເຂົ້າຮ່ວມ. ອີງຕາມແຜນການອົບຮົບທີ່ ສະຫາຍ ພັນໂທ ສົມປອງ ຈັນທະລັງສີ ຮອງຫົວໜ້າພະແນກອົບ ຮົມໂຮງຮຽນ 303 ລາຍງານຕໍ່ພິທີໃຫ້ຮູ້ວ່າ: ການເປີດຮຽນກໍ່ສ້າງນາຍສິບຕີພິເສດຊຸດທີ 30 ສົກ ຮຽນ 2020-2021 ມີນັກຮຽນທັງໝົດ 210 ສະຫາຍ ແລະ ພະນັກງານບໍາລຸງລະບົບ 6 ເດືອນ ຊຸດທີ 2 ຈໍານວນ 50 ສະຫາຍ.
ການເປີດຮຽນກໍ່ສ້າງ ແລະ ບໍາລຸງຄັ້ງນີ້ ແມ່ນເພື່ອແນ່ໃສ່ປັບປຸງກໍ່ສ້າງກຳລັງປະກອບອາວຸດໃຫ້ນັບມື້ມີຄວາມເຂັ້ມແຂງຂຶ້ນເວົ້າລວມ, ເວົ້າສະເພາະກໍແມ່ນກໍ່ສ້າງກຳລັງຕີພິເສດໃຫ້ທັນສະໄໝຂຶ້ນເທື່ອລະກ້າວເພື່ອສ້າງເປັນນາຍທະຫານສືບທອດໃນອະນາຄົດປະກອບໃຫ້ກຳລັງຫຼວງ ແລະ ກຳລັງທ້ອງຖິ່ນປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ມີ ຄວາມຮັບປະກັນ. ຊຸດອົບຮົມຄັ້ງນີ້ຈະໃຊ້ເວລາທັງໝົດ 10 ເດືອນ ແບ່ງອອກເປັນ 3 ພາກຄື: ພາກ ການເມືອງ, ພາກການທະຫານ ແລະ ພາກພະລາທິການ. ໂອກາດນີ້, ສະຫາຍ ພົນຕີ ສີ ດາລໍ່ ຈົ່ງເຕັງເຈ້ຍຊ້າໄດ້ໂອ້ລົມຕໍ່ພະນັກງານ, ຄູ-ອາຈານ ແລະ ນັກ ຮຽນ-ນັກສຶກສາໂດຍໄດ້ເນັ້ນ ໜັກຫຼາຍບັນຫາທີ່ສຳຄັນ ເຊິ່ງທັງໝົດແມ່ນເພື່ອແນ່ໃສ່ເຮັດໃຫ້ໜ້າທີ່ການເມືອງຂອງກົມກອງໃຫ້ມີຜົນສໍາເລັດ ແລະ ມີປະສິດທິຜົນສູງ, ຮຽກຮ້ອງໃຫ້ຄະນະພັກ-ຄະນະ ອຳນວຍການ, ຄູ-ອາຈານຕະຫຼອດຮອດນັກຮຽນຈົ່ງເອົາໃຈໃສ່ ຍົກສູງຄວາມຮັບຜິດຊອບເປັນເຈົ້າການໃນການຊີ້ນຳ-ນຳພາ ເປັນຕົ້ນແມ່ນການປັບປຸງຫຼັກສູດການຮຽນ-ການສອນໃຫ້ ມີຄຸນນະພາບສູງ, ປະຕິບັດຫນ້າທີ່ວິຊາສະເພາະຕິດຕາມໂມງເວລາການຂຶ້ນຫ້ອງສິດສອນໃຫ້ຖືກຕ້ອງຕາມກຳນົດເວລາ ແລະ ຕັ້ງໜ້າປະຕິບັດຂໍ້ກຳນົດກົດລະບຽບໃຫ້ເຂັ້ມງວດ.
