ນັກຂ່າວເມືອງກະລຶມແຂວງເຊກອງ ລາຍງານວ່າ: ຫລັງພາຍຸໂນອຶນ ພັດຜ່ານເມືອງ ໃນວັນທີ 18-20 ກັນຍານີ້ ໄດ້ສ້າງຄວາມເສຍຫາຍໃຫ້ແກ່ຊັບສິນ, ຊິວິດ, ທີ່ຢູ່ອາໄສຂອງປະຊາຊົນ ແລະ ພື້ນຖານໂຄງລ່າງຫລາຍສົມຄວນ ໂດຍສະເພາະຢູ່ 10 ບ້ານລຽບຊາຍແດນລາວ-ຫວຽດນາມທີ່ໄດ້ຮັບຜົນກະທົບໜັກໜ່ວງຄື ລະບົບເສັ້ນທາງຄົມມະນາຄົມ, ຂົວ, ເນື້ອທີ່ການຜະລິດ, ເຮືອນ ແລະ ປະຊາຊົນບ້ານໂກຣ 1 ຄົນຖືກນ້ຳຫ້ວຍອາຣາງ ຊັດໄຫລສູນຫາຍ. ຂະນະທີ່ປັດຈຸບັນ, ເຈົ້າໜ້າທີ່ ຍັງສືບຕໍ່ຄົ້ນຫາຢ່າງຕໍ່ເນື່ອງ.
ທ່ານ ວັນໄຊ ຈັນທະຍັບ ຫົວໜ້າຫ້ອງການແຮງງານ ແລະ ສະຫວັດດີການສັງຄົມ ເມືອງກະລຶມ, ຮອງປະທານຄະນະກຳມະການປ້ອງກັນ ແລະ ຄວບຄຸມໄພພິບັດເມືອງລາຍງານໃນວັນທີ 22 ກັນຍານີ້ ວ່າ: ວັນທີ 18-20 ກັນຍາ ເກີດຝົນຕົກໜັກຕິດຕໍ່ກັນກໍ່ໃຫ້ເກີດເຫດການນ້ຳໄຫລຊຸ, ນໍ້າຫລາຍສາຍເພີ່ມຂຶ້ນກະທັນຫັນ ແລະ ໄຫລຖ້ວມທັງຊຸເອົາເຮືອນ, ການຜະລິດ ແລະ ເສັ້ນທາງຄົມມະນາຄົມເສຍຫາຍຢ່າງຫລວງຫລາຍໂດຍສະເພາະຢູ່ບັນດາບ້ານເຂດຊາຍແດນລາວ-ຫວຽດນາມ.
ແນວໃດກໍ່ດີ, ດັ່ງນັ້ນອົງການປົກຄອງເມືອງ ແລະ ຄະນະກຳມະການ ຄພບ ເມືອງ ໄດ້ແຕ່ງຕັ້ງພະນັກງານໄປຊ່ວຍເຫລືອປະຊາຊົນທີ່ຖືກກະທົບທັງເກັບກຳຂໍ້ມູນຜົນເສຍຫາຍເບື້ອງຕົ້ນ ຊຶ່ງພົບວ່າ: ປະຊາຊົນບ້ານໂກຣ ຖືກນ້ຳຫວຍອາຣາງ ຊັດໄຫລສູນຫາຍ 1 ຄົນ. ຂະນະທີ່ນ້ຳຫ້ວຍປະຍາງໄຫລເຂົ້າຖ້ວມ ແລະ ຊຸເຮືອນປະຊາຊົນ ບ້ານປະນອນ ໄຫລ 2 ຫລັງ, ຖຽງນາ 5 ຫລັງ, ເຮືອນເພ 5 ຫລັງ, 22 ຄອບຄົວ ແລະ ປະຊາຊົນເດືອດຮ້ອນ 120 ຄົນ, ຍິງ 45 ຄົນ. ນອກນີ້ເຫດການດັ່ງກ່າວຍັງກະທົບຕໍ່ການຜະລິດໂດຍສະເພາະເນື້ອທີ່ນາເສຍຫາຍ 7 ເຮັກຕາ, ຊົນລະປະທານ 12 ແຫ່ງ, ນ້ຳລິນ 1 ບໍ່, ໂຮງຮຽນ 1 ຫລັງລວມມູນຄ່າເສຍຫາຍ 1,9 ຕື້ກວ່າກີບ. ຂະນະທີ່ຂົວຫ້ວຍອາຈິງ, ຫ້ວຍອາຣາງ ບ້ານໂກຣ ແຕກ ແລະ ຫັກ, ຂົວບ້ານຕະລ໋ອງ ເພ ແລະ ເສັ້ນທາງ 7511 ແຕ່ເມືອງຫາບ້ານໂກຣ ຖືກດິນເຊາະເຈື່ອນຖົມ ຊຶ່ງບໍ່ສາມາດສັນຈອນທາງລົດໄດ້.
ແນວໃດກໍ່ດີຈາກເຫດການດັ່ງກ່າວ, ຄະນະກຳມະການປ້ອງກັນ ແລະ ຄວບຄຸມໄພພິບັດ ເມືອງກະ ລຶມ ຮ່ວມກັບອົງການປົກຄອງທຸກຂັ້ນ ໄດ້ວາງແຜນຟື້ນຟູຫລັງໄພພິບັດ ແລະ ໄດ້ເຂົ້າໄປຊ່ວຍເຫລືອປະຊາຊົນທີ່ຖືກກະທົບຢ່າງເລັ່ງດ່ວນເພື່ອປົວແປງສະພາບຈິດໃຈໃຫ້ກັບຄືນສູ່ສະພາບປົກກະຕິໂດຍໄວ.
ຂ່າວ: ອັດສະວິນ ແສງສີຈັນ
