ໃນວັນທີ 21 ກັນຍາ 2020 ນີ້ ຢູ່ທີ່ຫ້ອງປະຊຸມຫ້ອງການການເງິນ ເມືອງອາດສະພອນ ແຂວງສະຫວັນນະເຂດ ໄດ້ຈັດພິທີ ປະກາດການຈັດຕັ້ງຫົວໜ້າສ່ວຍສາອາກອນປະຈຳເມືອງຄົນໃໝ່ ໂດຍການເຂົ້າຮ່ວມເປັນປະທານຂອງ ທ່ານ ສີສະເໝີ ແສງວິໄລ ຮອງເລຂາພັກເມືອງ, ທ່ານ ພູຄຳອານົນທະວົງ ຄະນະພະແນກການເງິນແຂວງສະຫວັນນະເຂດ,ທ່ານເພັດດາລາ ແກ້ວສາລີ ຫົວໜ້າສ່ວຍສາອາກອນປະຈຳແຂວງສະຫວັນນະເຂດ, ມີບັນດາທ່ານຫົວໜ້າຫ້ອງການ, ຄະນະຫ້ອງການອ້ອມຂ້າງເມືອງພ້ອມທັງພະນັກງານຫ້ອງການເງິນເມືອງເຂົ້າຮ່ວມຢ່າງພ້ອມພຽງ.
ທ່່ານ ນ. ບົວວັນ ລຽນປະດິດ ຫົວໜ້າຈັດຕັ້ງພະແນກການເງິນແຂວງ ກໍ່ໄດ້ຜ່ານຂໍ້ຕົກລົງຂອງລັດຖະມົນຕີກະຊວງການເງິນ ວ່າດ້ວຍການຍົກຍ້າຍ ແລະແຕ່ງຕັ້ງຫົວໜ້າສ່ວຍສາອາກອນປະຈຳເມືອງຂອງແຂວງສະຫວັນນະເຂດ, ໄດ້ຕົກລົງເຫັນດີ ຍົກຍ້າຍ ແລະແຕ່ງຕັ້ງ ທ່ານ ພິມມະສອນ ລ້ອມວິໄລວົງ ຫົວໜ້າສ່ວຍສາອາກອນປະຈຳເມືອງອາດສະພອນໄປເປັນຫົວໜ້າ ສ່ວຍສາອາກອນປະຈຳເມືອງອາດສະພັງທອງ, ແຕ່ງຕັ້ງທ່ານ ໄຊສະຫວັນ ກັນຕິຍະລາດ ຮອງຫົວໜ້າສ່ວຍສາອາກອນປະຈຳເມືອງອາດສະພອນເປັນຫົວໜ້າສ່ວຍສາອາກອນປະຈຳເມືອງອາດສະພອນ.
ໃນຕອນທ້າຍຂອງພິທີ ທ່ານ ສີສະເໝີ ແສງວິໄລ ຮອງເລຂາພັກເມືອງ ກໍ່ໄດ້ມີຄຳເຫັນໂອ້ລົມ ແລະ ໃຫ້ທິດຊີ້ນຳໆພາແກ່ຄະນະສ່ວຍສາອາກອນເມືອງຄົນໃໝ່ ຈົ່ງເອົາໃຈໃສ່ໃນການຈັດຕັ້ງປະຕິບັດວຽກງານວິຊາສະເພາະຂະແໜງການຂອງຕົນເປັນຢ່າງດີ, ການຈັດພິທີປະກາດການຈັດຕັ້ງຄັ້ງນີ້ມັນສະແດງໃຫ້ເຫັນເຖິງຄວາມເຂັ້ມແຂງຂອງຄະນະນຳຫ້ອງການທີ່ເຫັນໄດ້ຄວາມສຳຄັນຂອງວຽກງານຊີ້ນຳໆພາ ແລະ ຄວາມຈຳເປັນຂອງວຽກງານໃນໄລຍະປະຈຸບັນເພື່ອສຸມທຸກກຳລັງແຮງ ແລະ ສະຕິປັນຍາເຂົ້າໃນການສ້າງສາພັດທະນາບ້ານເມືອງຂອງພວກເຮົາຢ່າງເປັນຂະບວນ.
