ເຈົ້າໜ້າທີ່ກອງຕໍາຫຼວດຈະລາຈອນພະແນກຕໍາຫຼວດ ປກສ ເມືອງໄຊຍະບູລີ ແຂວງໄຊຍະບູລີ ໄດ້ສຶກສາອົບຮົມກຸ່ມແກ້ງທີ່ດັດແປງສະພາບເຕັກນິກລົດຈັກ ແລະ ຂັບຂີ່ລົດໃຊ້ສຽງເນືອງນັນກວນເມືອງ ຂຶ້ນເມື່ອບໍ່ດົນຜ່ານມານີ້ໂດຍມີພະນັກງານວິຊາການທີ່ກ່ຽວຂ້ອງພ້ອມດ້ວຍນັກຂັບຂີ່ ແລະ ພໍ່ – ແມ່ຜູ້ປົກຄອງເຂົ້າຮ່ວມ.
ສະຫາຍ ພັທ ທິບທະຈັນ ລາດມົນຕີ ຮອງຫົວໜ້າກອງບັນ ຊາການ ປກສ ເມືອງໄຊຍະບູລີໄດ້ຍົກໃຫ້ເຫັນບາງມາດຕາ ຂອງ ກົດໝາຍວ່າດ້ວຍການສັນຈອນທາງບົກ, ກ່ຽວກັບມາດຕະການຕໍ່ຜູ້ລະເມີດກົດລະບຽບການສັນຈອນທີ່ດັດແປງສະພາບເຕັກນິກ – ໃຊ້ສຽງດັງກວນເມືອງເກີນຂອບເຂດ, ບໍ່ໃສ່ໝວກກັນກະທົບ, ບໍ່ມີແວ່ນສ່ອງຫຼັງ, ໃຊ້ເສັ້ນທາງຫຼວງທີ່ບໍ່ຖືກຕ້ອງ ແລະ ບັນຫາອື່ນໆ ທີ່ຜິດຕໍ່ລະບຽບຈະລາຈອນໃຫ້ຜູ້ທີ່ລະເມີດໄດ້ຮັບຮູ້ ແລະ ເຂົ້າໃຈ ພ້ອມທັງໄດ້ຮຽກຮ້ອງໃຫ້ນັກຂັບຂີ່ແຕ່ລະຄົນຈົ່ງພ້ອມກັນນໍາໄປປະຕິບັດຢ່າງເຂັ້ມງວດຊຶ່ງລົດທີ່ເຈົ້າໜ້າທີ່ກັກມາໄດ້ໃນຄັ້ງນີ້ມີຈໍານວນ 14 ຄັນໃນນັ້ນດັດແປງສະພາບເຕັກນິກປະກອບຢາງນ້ອຍ ດັດເບາະມີ 2 ຄັນ, ໃຊ້ສຽງດັງເກີນຂອບເຂດໃສ່ທໍ່ສູບ ຈໍານວນ 12 ຄັນ. ພ້ອມນີ້, ເຈົ້າໜ້າທີ່ຍັງໄດ້ເນັ້ນໃຫ້ພໍ່ແມ່ຜູ້ປົກຄອງເອົາໃຈໃສ່ສຶກສາອົບຮົມບົ່ມສອນລູກຫຼານຂອງຕົນ ເພື່ອໃຫ້ເຂົາເຈົ້າໄດ້ຮັບຮູ້ ແລະ ເຂົ້າໃຈກົດລະບຽບຈະລາຈອນໃຫ້ຫຼາຍຂຶ້ນ ແລະ ນໍາໄປຈັດຕັ້ງປະຕິບັດເຂົ້າໃນຊີວິດປະຈໍາວັນ ພ້ອມກັນເປັນຫູເປັນຕາຊ່ວຍເຈົ້າໜ້າທີ່ໃນການສະກັດກັ້ນປະກົດການຫຍໍ້ທໍ້ທີ່ເກີດຂຶ້ນໃນສັງຄົມແນໃສ່ຮັບປະກັນໃຫ້ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ.
(ຂ່າວ-ພາບ: ແສງທອງ ທອງສະໄໝ)
