ກອງປະຊຸມໃຫຍ່ຜູ້ແທນ ອົງຄະນະພັກ ແຂວງອັດຕະປື ຄັ້ງທີ XI ໄດ້ອັດລົງດ້ວຍຜົນສຳເລັດຢ່າງສະຫງ່າງາມ ໃນວັນທີ 18 ກັນຍາ 2020 ພາຍຫລັງດໍາເນີນມາເປັນເວລາ 2 ວັນ,ດ້ວຍບັນຍາກາດຟົດຟື້ນ ແລະ ຖືກຕ້ອງຕາມກົດລະບຽບຂອງພັກ,ເຊິ່ງຖືວ່າເປັນເຫດການການເມືອງທີ່ມີຄວາມໝາຍສໍາຄັນໃນຊີວິດການເມືອງ ທີ່ສ່ອງແສງໃຫ້ເຫັນເຖິງການເຕີບໃຫຍ່ຂະຫຍາຍຕົວຂອງສະມາຊິກພັກ,ພະນັກງານໃນທົ່ວອົງຄະນະພັກ ແຂວງອັດຕະປື.
ຕະຫລອດໄລຍະການດຳເນີນກອງປະຊຸມ,ບັນດາຜູ້ແທນສົມບູນ ທີ່ມາຈາກຄະນະພັກຮາກຖານ ແລະ ໜ່ວຍພັກທົ່ວແຂວງ ຈຳນວນ 225 ສະຫາຍ,ຍິງ 31 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທັງໝົດທົ່ວແຂວງ ຈໍານວນ 9.596 ສະຫາຍ ໄດ້ພ້ອມກັນຄົ້ນຄວ້າ ແລະ ປະກອບຄໍາເຫັນໃສ່ຮ່າງບົດລາຍງານການເມືອງ,ແຜນພັດທະນາເສດຖະກິດ-ສັງຄົມ ແລະ ບົດສໍາຫລວດການນໍາພາລວມ ຂອງຄະນະບໍລິຫານງານພັກແຂວງ ສະໄໝທີ 10,ພ້ອມໄດ້ຕີລາຄາດ້ານດີ,ດ້ານອ່ອນ,ຂໍ້ຄົງຄ້າງ,ບົດຮຽນໃນການຊີ້ນໍາ-ນຳພາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ໃນ 5 ປີຜ່ານມາ ແລະໄດ້ເປັນເອກະສັນກັນຮັບຮອງເອົາທິດທາງແຜນການ 5 ປີ ຕໍ່ໜ້າ.
ໄປຄຽງຄູ່ກັບການຮັບຮອງເອົາບັນຫາສໍາຄັນຕ່າງໆ ກອງປະຊຸມໃຫຍ່ຄັ້ງນີ້ ຍັງໄດ້ເລືອກຕັ້ງເອົາຄະນະບໍລິຫານງານພັກແຂວງອັດຕະປື ຊຸດໃໝ່ ຈຳນວນ 33 ສະຫາຍ,ຍິງ 5 ສະຫາຍ ຖືກຕ້ອງຕາມກົດລະບຽບຂອງພັກ ແລະ ຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນໄລຍະໃໝ່ ເພື່ອເປັນຫລັກແຫລ່ງແກ່ນສານໃນການນໍາພາ-ຊີ້ນໍາ ວຽກງານຮອບດ້ານຂອງແຂວງອັດຕະປື ໃນໄລຍະ 5 ປີຕໍ່ໜ້າ,ໃນນັ້ນໄດ້ເປັນເອກະສັນເລືອກເອົາ ສະຫາຍ ເລັດ ໄຊຍະພອນ ເປັນເລຂາຄະນະບໍລິຫານງານພັກແຂວງ,ສະຫາຍນາງ ມີນາພອນ ໄຊສົມພູ ແລະ ສະຫາຍ ບຸນຮຽນ ແກ້ວບົວພາດ ເປັນຮອງເລຂາ ,ພ້ອມເລືອກເອົາ ສະຫາຍ ຄໍາຫວັນ ຈັນທະໂຄດ ເປັນປະທານກວດກາ ສະຫາຍ ຈິດປະສົງ ສິງສະຫວັດ ສະຫາຍ ມີໄຊ ສີສະແຫວງສຸກ ແລະ ສະຫາຍ ວີໄລພອນ ແກ່ນ ເປັນຮອງປະທານກວດກາ
ທັງນີ້ກໍ່ເພື່ອສືບຕໍ່ຊີ້ນໍາ-ນໍາພາແຂວງອັດຕະປື ແຕ່ນີ້ຮອດປີ 2025 ໂດຍສືບຕໍ່ເຮັດໃຫ້ເສດຖະກິດຂອງແຂວງຂະຫຍາຍຕົວຢ່າງຕໍ່ເນື່ອງ,ໝັ້ນຄົງ ແລະ ຍືນຍົງ, ຮັບປະກັນໃຫ້ການພັດທະນາຊົນນະບົດ ແລະ ແກ້ໄຂຄວາມທຸກຍາກຢ່າງໝັກແໜ້ນ,ຊີວິການເປັນຢູ່ຂອງປະຊາຊນດີຂື້ນລື່ນເກົ່າ, ຕາມທິດສ້າງສັງຄົມນິຍົມແຕ່ຮາກຖານ,ເຮັດໃຫ້ແຂວງອັດຕະປືກໍ່ຄືປະເທດຫຼຸດພົ້ນອອກຈາກສະຖານະພາບຄວາມດ້ອຍພັດທະນາ.
ຂ່າວ: ວັດທະນາ ຫຼວງອາໄພ
---------------
ຢ່າລືມກົດຕິດຕາມເພຈ All in LAOS
------------------------------
