ໃນວັນທີ 12 ກັນຍາ 2020, ເຈົ້າໜ້າທີ່ສາຍກວດ ກອງພັນປ້ອງກັນເຄື່ອນທີ່ ປກສ ນະຄອນຫຼວງວຽງຈັນ ໄດ້ມອບກະເປົາເງິນຄືນໃຫ້ ທ້າວ ສາລີ ອາຍຸ 50 ປີ ຢູ່ບ້ານຫົວແຊ ເມືອງບາຈຽງຈະເລີນສຸກ ແຂວງຈໍາປາສັກ ທີ່ລືມໄວ້ໃນຕູບສວນເຮືອນຊົງລາວເດີມ ເດີ່ນພະທາດຫຼວງ ໂດຍມີພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພະຍານ.
ເຈົ້າໜ້າທີ່ສາຍກວດ ກອງພັນປ້ອງກັນເຄື່ອນທີ່ ປກສ ນວ ໃຫ້ຮູ້ວ່າ: ໃນວັນທີ 12 ກັນຍາ 2020 ໄດ້ອອກລາດຕະເວນ ເພື່ອກວດກາຄວາມເປັນລະບຽບຮຽບຮ້ອຍ ຕາມເດີ່ນພະທາດຫຼວງ ໃນເວລາ 11:00 ໂມງ ໄດ້ເຂົ້າກວດຄວາມເປັນລະບຽບຮຽບຮ້ອຍ ໃນສະຖານທີ່ສວນເຮືອນຊົງລາວເດີມ ພົບເຫັນກະເປົາພາຍສີດໍາ ຢູ່ໃນຕູບຂອງສະຖານທີ່ດັ່ງກ່າວ; ເຊິ່ງໃນກະເປົາມີເງິນ 14.000 ໂດລາ, ບັດປະຈໍາຕົວ ແລະ ເອກະສານຈໍານວນໜື່ງ; ໃນນັ້ນ ມີຂໍ້ມູນລາຍລະອຽດກ່ຽວກັບຜູ້ເປັນເຈົ້າຂອງກະເປົາ ຈາກນັ້ນ, ເຈົ້າໜ້າທີ່ຈິ່ງຕິດຕໍ່ຫາເຈົ້າຂອງກະເປົາມາຮັບເອົາກະເປົາດັ່ງກ່າວຄືນ.
