ແຂວງຫຼວງພະບາງ ໄດ້ຮັບການຊ່ວຍເຫຼືອລົດຮັບສົ່ງຄົນເຈັບ ແລະ ເຄື່ອງຊ່ວຍເຫຼືອດ້ານການແພດ

ພິທີມອບ-ຮັບ ລົດຮັບສົ່ງສົ່ງຄົນເຈັບ ແລະອຸປະກອນການແພດ ເພື່ອປ້ອງກັນ ແລະຕ້ານພະຍາດໂຄວິດ-19 ຈາກນະຄອນຄຸນຫມິງ ແລະ ໂຮງໝໍປະຊາຊົນເລກໜຶ່ງ, ແຂວງ ຢູ່ນານ ແລະແຂວງຟູຈຽນ ສປ ຈີນ ໃຫ້ແກ່ແຂວງຫຼວງພະບາງ ໂດຍຜ່ານກົງສູນໃຫຍ່ ສປ ຈີນ ປະຈຳພາກເໜືອ ຈັດຂື້ນໃນວັນທີ 11 ກັນຍາ 2020 ທີ່ພະແນກສາທາລະນະສຸກແຂວງຫລວງພະບາງ, ມີ ທ່ານ ລີຈື່ກົງ ຫົວໜ້າກົງສູນໃຫຍ່ ສປ ຈີນ ປະຈຳພາກເໜືອ, ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ, ພ້ອມດ້ວຍພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພະຍານ.

ທ່ານ ລີ ຈື່ ກົງ ກ່າວວ່າ: ປັດຈຸບັນການລະບາດຂອງພະ ຍາດ ໂຄວິດ 19 ໃນທົ່ວໂລກແມ່ນມີ ອັດຕາເພີ່ມຂື້ນ, ເພື່ອປ້ອງກັນ, ຕ້ານ ແລະສະກັດກັ້ນ ການແຜ່ລະບາດຂອງພະ ຍາດ, ກົງສູນໃຫຍ່ ສປ ຈີນ ປະຈຳພາກເໜືອ ຈຶ່ງໄດ້ຄົ້ນຄວ້າຊອກຫາແຫຼ່ງທືນຈາກ ສປ ຈີນ ເພື່ອນຳຊື້ພາຫະນະ ແລະອຸປະກອນການແພດທີຈຳເປັນ ມາມອບໃຫ້ແກ່ແຂວງແຂວງຫຼວງພະບາງ ເຊິ່ງຄັ້ງນີ້ເປັນຄັ້ງທີ 2 ປະກອບມີ ນະ ຄອນຄູນມິງ ມອບເຄື່ອງຫັນໃຈທຽມ 2 ເຄື່ອງ, ເຄື່ອງວັດແທກອູນນະພູມ 100 ເຄື່ອງ, ລົດອຳບູລັງ 1 ຄັນ ລວມມູນຄ່າ 464.000 ຢວນ ຫຼື ເທົ່າກັບ 51.555 ໂດລາສະຫະລັດ, ແຂວງຟູຈ່ຽນ ມອບຜ້າປິດປາກ-ດັງ N95 ສຳລັບແພດ ຈໍານວນ 5.000 ອັນ ແລະຜ້າປິດປາກ-ດັງທົ່ວໄປ ຈຳນວນ 10.000 ອັນ ລວມມູນຄ່າ 86.100 ຢວນ ຫຼື ເທົ່າກັບ 10.000 ໂດລາສະຫະລັດ ແລະໂຮງໝໍປະຊາຊົນເລກໜຶ່ງ ແຂວງຢູນນານ ມອບອຸປະກອນດ້ານການແພດ ຈຳນວນໜຶ່ງ ມູນຄ່າ 86.060 ຢວນ ຫຼືເທົ່າກັບ 12.151 ກວ່າໂດລາສະຫະລັດ.

ໂອກາດນີ້ ທ່ານ ຄຳຂັນ ຈັນທະວີສຸກ ໄດ້ສະແດງຄວາມຂອບໃຈຢ່າງສູງ ຕໍ່ຜູ້ທີ່ໃຫ້ການຊ່ວຍເຫຼືອອຸປະກອນດ້ານການແພດໃນຄັ້ງນີ້ ແລະກ່າວມອບອຸປະກອນ ໃຫ້ພາກສ່ວນທີ່ກ່ຽວຂອງແຂວງ ນຳໄປໝູນໃຊ້ເຂົ້າໃນວຽກ ງານໃຫ້ເກີດຜົນປະໂຫຍດສູງສຸດ.

ໂອກາດດຽວກັນ ກົງສູນໃຫຍ່ ສປ ຈີນ ປະຈຳພາກເໜືອ ໄດ້ມອບເງິນຈຳນວນ 10.000 ໂດລາສະຫະລັດ ໃຫ້ແກ່ອົງການປົກຄອງແຂວງຫຼວງພະບາງ ນໍາໄປຊື້ຢາປາບສັດຕູພືດ ຕື່ມອີກ.

Cr: ສີແຫລ້