ວັນທີ 10 ກັນຍາ 2020 ທີ່ຜ່ານມານີ້ຢູ່ບ້ານຈັດສັນເມືອງມ່ວນ ເມືອງວຽງທອງ ໄດ້ເປີດນຳໃຊ້ໄຟຟ້າຕາຄ່າຍ 0,4 ກິໂລໂວນ ຢ່າງເປັນທາງການ. ບ້ານຈັດສັນເມືອງມ່ວນ ເປັນບ້ານໜຶ່ງທີ່ຖືກຍົກຍ້າຍຈາກໂຄງການກໍ່ສ້າງເຂື່ອນໄຟຟ້ານ້ຳເທີນ 1 ແລະ ເປັນຄຸ້ມໜຶ່ງຕັ້ງຢູ່ລຽບແຄມທາງເລກທີ 1D ມີ 45 ຫຼັງຄາເຮືອນ, ຜ່ານມາຍັງບໍ່ທັນໄດ້ໃຊ້ໄຟຟ້າ.
ດັ່ງນັ້ນ ອີງໃສ່ຄວາມຈຳເປັນຂອງປະຊາຊົນ ອົງການປົກຄອງບ້ານ ໄດ້ສະເໜີຫາເມືອງ ແລະ ເມືອງໄດ້ສະເໜີຂໍງົບປະມານນຳພະແນກພະລັງງານ ແລະ ບໍ່ແຮ່ແຂວງ. ຈາກນັ້ນພະແນກພະລັງງານ ແລະ ບໍ່ແຮ່ແຂວງ ໄດ້ສົມທົບກັບລັດວິສາຫະກິດໄຟຟ້າແຂວງ ຄົ້ນຄ້ວາເອົາອຸປະກອນທີ່ມີຢູ່ໃນສາງຂອງລັດວິສາຫະກິດໄຟຟ້າ ທີ່ຮື້ຖອນຈາກ 6 ບ້ານ ທີ່ໄດ້ຍົກຍ້າຍອອກຈາກໂຄງການກໍ່ສ້າງເຂື່ອນໄຟຟ້ານໍ້າເທີນ 1 ໄດ້ຈຳນວນໜຶ່ງແຕ່ຍັງບໍ່ພຽງພໍຈຶ່ງໄດ້ປຶກສາຫາລືກັບປະຊາຊົນພາຍໃນບ້ານເຫັນດີເປັນເອກະພາບກັນສົມທົບທຶນຈຳນວນ 4.200.000 ກີບຕໍ່ຫຼັງຄາເຮືອນເພື່ອນຳມາຈັດຊື້ຕາຂ່າຍໄຟຟ້າ 0,4 ກິໂລໂວ່ນ ແລະ ຈ່າຍຄ່າໝໍ້ນັບໄຟ (ກົງເຕີ່ ), ເຊິ່ງຕາຄ່າຍມີຄວາມຍາວ 1.600 ແມັດ ຕິດຕັ້ງກົງເຕີ່ໃຫ້ປະຊາຊົນຈຳນວນ 33 ຫຼັງຄາເຮືອນ ລວມມູນຄ່າທັງໝົດ 291 ລ້ານກ່ວາກີບ ໃນນັ້ນທຶນສົມທົບຂອງປະຊາຊົນ 166 ລ້ານກ່ວາກີບ.
ສຳລັບແຮງງານໃນການຕິດຕັ້ງແມ່ນເປັນການປະກອບສ່ວນຂອງສາມອົງການຈັດຕັ້ງມະຫາຊົນ ຂົງເຂດພະລັງ ງານ ແລະ ບໍ່ແຮ່ແຂວງ-ເມືອງ, ມາຮອດປະຈຸບັນບ້ານດັ່ງກ່າວສາມາດເປີດນຳໃຊ້ໄຟຟ້າໄດ້ແລ້ວ 100%.
ລາຍງານໂດຍ: ຫນັງສຶພິມບໍລິຄຳໄຊ
