ກອງບັນຊາການ ປກສ ເມືອງສີສັດຕະນາກ ນະຄອນຫຼວງວຽງຈັນ ໄດ້ຈັດພິທີເຊື່ອມຊຶມມະຕິກອງປະຊຸມໃຫ່ຍອົງຄະນະພັກເມືອງ ຂຶ້ນໃນຕອນເຊົ້າຂອງວັນທີ 11 ກັນຍາ 2020 ຢູ່ສະໂມສອນກອງບັນຊາການ ປກສ ເມືອງສີສັດຕະນາກ ໂດຍການເຜີຍແຜ່ຂອງສະຫາຍ ພັທ ຄຳຝັ່ງ ເຄືອບພະພອນ ຄະນະພັກເມືອງ, ເລຂາຄະນະພັກຮາກຖານ ຫົວໜ້າກອງບັນຊາການ ປກສ ເມືອງສີສັດຕະນາກ, ມີເລຂາ-ຮອງເລຂາໜ່ວຍພັກທີ່ຂຶ້ນກັບ, ສະມາຊິກພັກ 83 ສະຫາຍ, ຍິງ 14 ສະຫາຍເຂົ້າຮ່ວມ.

ໃນພິທີ ສະຫາຍ ພັທ ຄຳຝັ່ງ ເຄືອບພະພອນ ໄດ້ໃຫ້ຮູ້ເຖີງເນື້ອໃນສຳຄັນຂອງມະຕິດັ່ງກ່າວບາງຕອນວ່າ: ທິດທາງ ແລະ ຄາດໝາຍການພັດທະນາ ເມືອງສີສັດຕະນາກ ໃນຊຸມປີຕໍ່ໜ້າຂອງຄະນະພັກເມືອງຊຸດໃໝ່ ແມ່ນຈະສຸມໃສ່ 6 ຄາດໝາຍສູ້ຊົນ ໃຫ້ມີບາດກ້າວຂະຫຍາຍຕົວໃນທຸກໆດ້ານໃຫ້ດີຂຶ້ນກວ່າເກົ່າຄື:

1. ຮັບປະກັນເຮັດໃຫ້ເມືອງສີສັດຕະນາກ ມີສະຖຽນລະພາບທາງດ້ານການເມືອງ, ມີຄວາມສະຫງົບ-ປອດໄພ ແລະ ຄວາມເປັນລະບຽບຮຽບຮ້ອຍ, ແກ້ໄຂປະກົດການຫຍໍ້ທໍ້ໃນສັງຄົມໃຫ້ຫຼຸດລົງຢ່າງເປັນຮູບປະທຳ.

2. ສູ້ຊົນສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນແຕ່ລະປີໃຫ້ໄດ້ 85% ຂຶ້ນໄປ ແລະ ສ້າງສະມາຊິກພັກແຂງກວມ 80% ຂຶ້ນໄປ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ ສືບຕໍ່ປະຕິບັດຄຳຂວັນຂອງຕົນ ໃຫ້ມີຄຸນນະພາບສູງຂຶ້ນກວ່າເກົ່າ.

3. ພັດທະນາເມືອງສີສັດຕະນາກ ໃຫ້ເປັນຕົວເມືອງທີ່ໜ້າຢູ່, ຢືນຍົງຕາມ 3 ຕົວຊີ້ວັດ(ສະຫງບົ, ສະອາດ, ສີຂຽວ) ຈັດຕັ້ງປະຕິບັດແຜນຜັງກວມລວມສະບັບທີ 3 ຂອງນະຄອນຫຼວງວຽງຈັນ ຢ່າງເຂັ້ມງວດ.

4. ສ້າງເມືອງສີສັດຕະນາກ ໃຫ້ຫຼຸດພົ້ນອອກຈາກຄວາມດ້ອຍພັດທະນາ ແລະ ມີມາດຖານຂອງເມືອງທີ່ທັນສະໄໝ, ນຳໃຊ້ເຄື່ອງມືທັນສະໄໝ ເຂົ້າໃນການຄຸ້ມຄອງຂົງເຂດການເມືອງ-ການປົກຄອງ ປ້ອງກັນຊາດ-ປ້ອງກັນຄວາມສະຫງົບ, ເສດຖະກິດ-ສັງຄົມ.

5. ພົນລະເມືອງໃນເກນອາຍຸມີ ລະດັບການສຶກສາຈົບຊັ້ນມັດທະຍົມຕອນປາຍ, ຮູ້ພາສາສາກົນ 35% ຂຶ້ນໄປ, ນຳໃຊ້ຄອມພິວເຕີ 50% ຂຶ້ນໄປ, ພົນລະມືອງອາຍຸຍືນສະເລ່ຍ 77 ປີຂຶ້ນໄປ.

6. ເປີດກວ້າງພົວພັນຮ່ວມມື ກັບບັນດາເມືອງ ພາຍໃນ ແລະ ຕ່າງປະເທດ ໃຫ້ຫຼາຍຂຶ້ນກວ່າເກົ່າ.