ໃນວັນທີ 10 ກັນຍາ 2020 ນີ້, ກອງພັນ 617 ທີ່ຂຶ້ນກັບກອງພົນທະຫານຮາບທີ 4 ໄດ້ຊີ້ນຳ – ນໍາພາ ພະນັກງານ – ນັກຮົບ ພາຍໃນກົມກອງໄດ້ຖືເອົາວຽກງານການກໍ່ສ້າງນັກຮົບວັດທະນະທຳ ແລະ ກໍ່ສ້າງກອງວັດທະນະທຳເປັນສຳຄັນ ນອກຈາກວິຊາສະເພາະເຫຼົ່າລົບຂອງຕົນແລ້ວ ໂດຍປະຕິບັດຕາມທິດຊີ້ນໍາຂອງກົມໃຫຍ່ ການເມືອງກອງທັບ ແລະ ທິດຊີ້ນໍາຂອງກົມໂຄສະນາ – ອົບຮົມວາງອອກ ຕາມຂໍ້ກຳນົດ 5 ມາດຖານ ໃນການກໍ່ສ້າງກົມກອງວັດທະນະທຳ ແລະ ນັກຮົບວັດທະນະທຳ ໃຫ້ເປັນຮູບປະທຳຕົວຈິງຢູ່ກອງພັນ 617.
ສະຫາຍ ພັນໂທ ທອງພັນ ສົມພູວົງ ຫົວໜ້າການເມືອງກອງພັນ 617 ກອງພົນທະຫານຮາບທີ 4 ໃຫ້ຮູ້ວ່າ: ໂຄງການກໍ່ສ້າງຫໍຂ່າວແມ່ນວຽກໜຶ່ງຂອງການກໍ່ສ້າງກອງວັດທະນະທຳ ແລະ ນັກຮົບວັດທະນະທຳ ທາງຄະນະພັກ – ຄະນະບັນຊາໄດ້ເຫັນດີເປັນເອກະພາບກັນກໍ່ສ້າງຫໍຂ່າວແບບຖາວອນ ແລະ ໄດ້ເລີ່ມລົງມືການກໍ່ສ້າງໃນ ຕົ້ນເດືອນ ພະຈິກ 2019, ມີຂະໜາດ 5 x 6 ແມັດ, ມຸງດ້ວຍກະເບື້ອງ, ພື້ນປູດ້ວຍເປຕົງເສີມເຫຼັກ, ເສົາໄມ້,ສ່ວນແຮງງານແມ່ນພະນັກງານ – ນັກຮົບ ພາຍໃນກົມກອງ, ລວມມູນຄ່າການກໍ່ສ້າງທັງໝົດ 35 ລ້ານກີບ, ທຶນຂອງກົມກອງ 100%, ເຊິ່ງໄດ້ມາຈາກການຜະລິດເຂົ້ານາປີ ແລະ ຂາຍໄມ້ວິກ ຄາດວ່າຈະໃຫ້ສຳເລັດກ່ອນວັນສ້າງຕັ້ງກອງພົນທີ 4 ວັນທີ 7 ພະຈິກ 2020 ນີ້.
ຈຸດປະສົງໃນການກໍ່ສ້າງຄັ້ງນີ້ກໍ່ເພື່ອສ້າງກົມກອງຂຶ້ນເປັນກົມກອງວັດທະນະທຳ ແລະ ເຮັດໃຫ້ກົມກອງມີຄວາມເປັນລະບຽບຮຽບຮ້ອຍ, ແໜ້ນໜາຖາວອນ, ສະອາດຈົບງານຕາມທິດຊີ້ນຳຂອງຂັ້ນເທິງ ແລະ ເພື່ອເຮັດໃຫ້ກົມກອງກາຍເປັນກົມກອງວັດທະນະທຳ ແລະ ກົມກອງປອດໃສ, ເຂັ້ມແຂງ, ໜັກແໜ້ນ ໃນຊຸມປີຕໍ່ໜ້າ.
ຂ່າວ – ພາບ ໂດຍ ອານຸສັກ ຈູມມນີວົງ, ໂພຄຳ ພອນປະເສີດ
---------------
ຢ່າລືມກົດຕິດຕາມເພຈ All in LAOS
------------------------------
