ທ່ານ ພັນຄຳ ວິພາວັນ ຮອງປະທານປະເທດແຫ່ງ ສປປ ລາວ ໂອ້ລົມພະນັກງານການນໍາພະນັກງານຫຼັກແຫຼ່ງຢູ່ແຂວງຈໍາປາສັກ

ໃນຕອນບ່າຍ ວັນທີ 11 ກັນຍາ 2020 ນີ້, ທີ່ສະໂມສອນ (ຫຼັກ4) ແຂວງຈໍາປາສັກ, ທ່ານ ພັນຄຳ ວິພາວັນ ກຳມະການກົມການເມືອງສູນກາງພັກຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປລາວ, ຫົວໜ້າອະນຸກຳມະການບຸກຄະລາກອນກອງປະຊຸມໃຫຍ່ຄັ້ງທີ XI ຂອງພັກໄດ້ລົງເຄື່ອນໄຫວຢ້ຽມຢາມໂອ້ລົມພະນັກງານການນໍາ-ນໍາພາ, ພະນັກງານຫຼັກແຫຼ່ງ, ຜູ້ແທນສົມບູນທົ່ວແຂວງຈໍາປາສັກ.

ທ່ານ ວິໄລວົງ ບຸດດາຄໍາ ກໍາມະການສູນກາງພັກ ເລຂາພັກແຂວງ ເຈົ້າແຂວງໆຈໍາປາສັກ ໄດ້ເປັນກຽດຂື້ນກ່າວຕ້ອນຮັບ ແລະໄດ້ລາຍງານຕໍ່ທ່ານປະທານວ່າ: ໃນທ່າມກາງບັນຍາກາດທີ່ທົ່ວ ພັກ-ລັດ, ກຳລັງປະກອບອາວຸດ ແລະ ປວງຊົນລາວທັງຊາດ ໂດຍສະເພາະອົງຄະນະພັກ-ອົງການປົກຄອງທຸກຂັ້ນ ແລະ ປະຊາຊົນບັນດາເຜົ່າຊາວແຂວງ ຈຳປາ ສັກ ກຳລັງໄດ້ຂຸ້ນຂ້ຽວ ຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງທີ X ຂອງພັກ, ມະຕິກອງປະຊຸມໃຫ່ຍຄັ້ງທີ VII ຂອງອົງຄະນະພັກແຂວງທ້າຍສະໄໝໂດຍສະເພາະ ແຂວງຈໍາປາສັກໄດ້ສຳເລັດການທາບທາມໂຄງປະກອບຄະນະບໍລິຫານງານພັກແຂວງຮອບທີ 2 ແລະ ຜ່ານການທາບທາມຮ່າງເນື້ອໃນບົດລາຍງານການເມືອງ, ຮ່າງບົດສຳຫຼວດການນຳພາຂອງຄະນະບໍລິຫານງານພັກແຂວງ ຊຸດທີ VII ແລະ ຮ່າງແຜນພັດທະນາເສດຖະກິດ-ສັງຄົມຂອງແຂວງ ແລະ ກໍໄດ້ສຳເລັດພິທີປະກາດແຂວງຈຳປາສັກ ເປັນແຂວງຈົບຊັ້ນມັດທະຍົມສຶກສາຕອນຕົ້ນບຳລຸງເພື່ອຂ່ຳນັບຮັບຕ້ອນກອງປະຊຸມໃຫຍ່ຄັ້ງທີ VIII ຂອງອົງຄະນະພັກ ແຂວງຈໍາປາສັກດ້ວຍບັນຍາກາດຟົດຟື້ນ.

ໂອກາດນີ້, ທ່ານ ພັນຄຳ ວິພາວັນ ກໍໄດ້ໃຫ້ກຽດໂອ້ລົມ ເຊິ່ງທ່ານໄດ້ສະແດງຄວາມຊົຍເຊີຍ ແລະ ຕີລາຄາສູງ ຕໍ່ຜົນການນໍາພາ ຂອງອົງຄະນະພັກ-ອົງການປົກຄອງແຂວງຈໍາປາສັກໃນການກະກຽມກອງປະຊຸມໃຫຍ່ຂອງ ອົງຄະນະ ພັກແຂວງຈໍາປາສັກ ຖືກຕ້ອງຕາມທິດຊີ້ນໍາ ແລະ ຕາມການມອບໜາຍຂອງກົມການເມືອງ, ຄະນະເລຂາທິການສູນກາງພັກວາງອອກ, ພ້ອມນີ້ ທ່ານຍັງໄດ້ຮຽກຮ້ອງໃຫ້ຄະນະພັກ-ອົງການປົກຄອງແຂວງ ແຕ່ລະຂັ້ນຕ້ອງໄດ້ເຊື່ອມຊຶມກໍາແໜ້ນເນື້ອໃນມະຕິຄໍາສັ່ງ, ຄໍາແນະນໍາຂອງຂັ້ນເທິງ, ເພິ່ມທິວີບົດບາດການນໍາພາຂອງພັກ, ບົດບາດໜ້າທີ່ການເມືອງດ້ວຍຄວາມຮັບຜິດຊອບສູງ, ແກ້ໄຂທັດສະນະທີ່ບໍຖືກຕ້ອງ, ບໍມີອະຄະຕິ, ຍົກສູງຄວາມຮັບຜິດຊອບ, ສຶກສາອົບຮົມການເມືອງແນວຄິດໃນຖັນແຖວພະນັກງານສະມາຊິກພັກ ໃຫ້ມີແນວຄິດການເມືອງໜັກແໜ້ນ, ຈົງຮັກພັກດີ ແລະ ມີຄວາມຮັບຜິດຊອບ, ພ້ອມກັນ ສາມັກຄີເປັນປຶກແຜ່ນ ແໜ້ນໜາ ເພື່ອຜ່ານຜ່າທຸກຄວາມຫຍຸ້ງຍາກ ເຮັດສໍາເລັດໜ້າທີ່ຕາມການມອບໝາຍ.