ເຊກອງ: ວັນທີ 10 ກັນຍາ 2020 ນີ້, ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ພ້ອມຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງເຊກອງ ເພື່ອເຂົ້າຮ່ວມພິທີມອບ-ຮັບໜ້າທີ່ ລະຫວ່າງ ທ່ານ ຄຳເຜີຍ ບຸດດາວຽງ ເຈົ້າແຂວງເຊກອງ(ຜູ້ເກົ່າ) ແລະ ທ່ານ ເຫລັກໄຫລ ສີວິໄລ ຮັກສາການເຈົ້າແຂວງເຊກອງ.

ໂອກາດນີ້, ກໍໄດ້ຮັບຟັງການລາຍງານໂດຍຫຍໍ້ກ່ຽວກັບ ການຊີ້ນຳ-ນຳພາຂອງຄະນະບໍລິຫານງານພັກແຂວງ ໃນໄລຍະ 2 ສະໄໝຜ່ານມາ, ເຊິ່ງຄະນະພັກ-ອຳນາດການປົກຄອງທຸກຂັ້ນໃນທົ່ວແຂວງ ໄດ້ສຸມທຸກກຳລັງກາຍ ແລະ ສິຕິປັນຍາ ເພື່ອນຳພາ, ຊີ້ນຳ, ບັນຊາ ແລະ ຈັດຕັ້ງປະຕິບັດດ້ວຍຄວາມເປັນເຈົ້າການ, ບຸກທະລຸ ແລະ ຂຸດຄົ້ນນຳໃຊ້ທຸກທ່າແຮງບົ່ມຊ້ອນຂອງທ້ອງຖິ່ນ, ສ້າງເງື່ອນໄຂ, ກາລະໂອ ກາດດຶງດູດຍາດແຍ່ງການຊ່ວຍເຫລືອ ແລະ ການລົງທຶນຈາກພາຍໃນ ແລະ ຕ່າງປະເທດເຂົ້າໃນການພັດທະນາແຂວງເຊກອງ ພາຍໃຕ້ການຮ່ວມຈິດຮ່ວມໃຈ ແລະ ສາມັກຄີເອກະພາບໃນທົ່ວພັກ, ທົ່ວປວງຊົນຊາວແຂວງເຊກອງ. ມາຮອດປັດຈຸບັນ ເຫັນວ່າແຂວງເຊກອງ ໄດ້ຮັບການພັດທະນາຢ່າງຕໍ່ເນື່ອງ ແລະ ມີການຫັນປ່ຽນຢ່າງຮອບດ້ານ.

ໂຮດເວັບໄຊທີ່ຖືກ ແລະ ດີທີ່ສຸດໃນໂລກ

ແຂວງເຊກອງ ກໍເປັນແຂວງໜຶ່ງທີ່ໄດ້ຮັບຜົນກະທົບຈາກພະຍາດ ໂຄວິດ-19 ແລະ ພະຍາດຕາມລະດູການ ໂດຍສະເພາະແມ່ນພະຍາດໄຂ້ຍຸງລາຍ ອັນເຮັດໃຫ້ສະພາບການຂະຫຍາຍຕົວຂອງເສດຖະກິດ ມີຄວາມຫຍຸ້ງຍາກ ແລະ ບໍ່ສາມາດບັນລຸຕາມແຜນການທີ່ວາງໄວ້, ແນວໃດກໍຕາມ ຄະນະນຳຂອງແຂວງ ກໍໄດ້ສຸມທຸກກຳລັງແຮງ ແລະ ທຸກຄວາມສາມາດ ຈົນນຳພາປະຊາຊົນບັນດາເຜົ່າບຸກບືນ ແລະ ຜ່ານຜ່າສິ່ງທ້າທາຍຕ່າງໆ ແລະ ສາມາດສຳເລັດ ການດຳເນີນກອງປະຊຸມໃຫຍ່ຜູ້ແທນອົງ ຄະນະພັກແຂວງເຊກອງ ຄັ້ງທີ X ໃນວັນທີ 28-29 ກໍລະກົດ 2020.

ໂອກາດນີ້, ສະຫາຍ ພັນຄຳ ວິພາວັນ ກໍໄດ້ສະແດງຄວາມຊົຍເຊີຍຕໍ່ຜົນສຳເລັດ ກອງປະຊຸມໃຫຍ່ຜູ້ແທນອົງ ຄະນະພັກແຂວງເຊກອງ ຄັ້ງທີ X, ຊົມເຊີຍຄະນະບໍລິຫານງານພັກແຂວງຊຸດໃໝ່ ແລະ ຊົມເຊີຍສະຫາຍເລຂາພັກແຂວງຜູ້ເກົ່າ ທີ່ສາມາດນຳພາປະຊາຊົນບັນດາເຜົ່າທົ່ວແຂວງ ສຳເລັດໜ້າທີ່ການເມືອງ ເຮັດໃຫ້ແຂວງເຊກອງ ໄດ້ຮັບການພັດທະນາເປັນກ້າວໆ,

ພ້ອມນີ້ ສະຫາຍ ຍັງໄດ້ຮຽກຮ້ອງໃຫ້ແຂວງເປັນເອກະພາບນຳຂັ້ນເທິງ, ນຳພາແນວຄິດພະນັກງານແຕ່ລະຂະແໜງ, ເມືອງ ແລະ ປະຊາຊົນ ເຂົ້າໃຈເຫດຜົນຂອງການປ່ຽນການນຳ, ອັນໃດດີແລ້ວກໍໃຫ້ສືບຕໍ່ເສີມຂະຫຍາຍ ແລະ ອັນໃດຍັງເປັນຈຸດອ່ອນໃຫ້ພ້ອມກັນປ່ຽນແປງ ສືບຕໍ່ປົກປັກຮັກສາຄວາມສາມັກຄີພາຍໃນ, ຄະນະປະຈຳ, ຄະນະພັກ ມີຄວາມເປັນເອກະພາບ, ທັງເປັນຄັນທຸງຫລັກແຫລ່ງ ໃນການເຕົ້າໂຮມຄວາມສາມັກຄີບັນດາເຜົ່າ, ສຶກສາອົບຮົມການເມືອງແນວຄິດໃນຖັນແຖວພະນັກງານສະມາຊິກພັກ ໃຫ້ມີແນວຄິດການເມືອງໜັກແໜ້ນ, ມີຄວາມສາມັກຄີ, ຈົງຮັກພັກດີ ແລະ ມີຄວາມຮັບຜິດຊອບຕໍ່ການມອບໝາຍ.

ເພື່ອເຮັດໃຫ້ການພັດທະນາເສດຖະກິດ-ສັງຄົມຂອງແຂວງ ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນນັ້ນ ຄວນເພີ່ມທະວີການນຳ ພາ, ຫັນເປັນແຜນງານລະອຽດ, ຊຸກຍູ້ຈັດຕັ້ງປະຕິບັດ, ວາງແຜນເປັນແຕ່ລະໄລຍະ ແລະ ວຽກງານ ປກຊ-ປກສ ນັ້ນ, ຕ້ອງສ້າງຄວາມເປັນນ້ຳໜຶ່ງໃຈດຽວ, ປົກປ້ອງເຂດນ້ຳແດນດິນ ແລະ ແກ້ໄຂປະກົດການຫຍໍ້ທໍ້ຕ່າງໆທີ່ເກີດຂຶ້ນ.

ຂ່າວ-ພາບ: ອຳພອນ

LEAVE A REPLY

Please enter your comment!
Please enter your name here