ໃນວັນທີ 9 ກັນຍານີ້ ຢູ່ທີ່ຫ້ອງປະຊຸມສະໂມສອນຂອງເມືອງລະຄອນເພັງ ແຂວງສາລະວັນ ໄດ້ຈັດພິທີມອບ-ຮັບ ອາຄານຮຽນ ແລະ ເປີດນຳໃຊ້ໂຮງຮຽນມັດທະຍົມຕົ້ນສົງ ແຫ່ງໃໝ່ ໂດຍເປັນເປັນປະທານຂອງ ທ່ານ ສົມໃຈ ອຸ່ນຈິດ ກຳມະການພັກແຂວງ ເລຂາພັກເມືອງ ເຈົ້າເມືອງໆລະຄອນເພັງ, ພຣະອາຈານ ສອນໄຊ ແກ້ວເມືອງໃຕ້ ກຳມະການສູນກາງ ອພສ, ເຈົ້າຄະນະ ອພສ ແຂວງສາລະວັນ ແລະ ພຣະອາຈານ ບຸນເລີດ ສີສຸລາດ ເຈົ້າຄະນະ ອພສ ເມືອງລະຄອນເພັງ, ມີທ່ານຮອງເລຂາພັກເມືອງ, ຫົວໜ້າຫ້ອງການຕ່າງໆອ້ອມຂ້າງເມືອງ, ອົງການຈັດຕັ້ງບ້ານພໍ່ແມ່ປະຊາຊົນ ແລະນາຍບ້ານໃນ 75 ບ້ານທົ່ວເມືອງລະຄອນເພັງ ເຂົ້າຮ່ວມ ພຣະອາຈານ ວິຊຽນ ອຸປະລະວົງ ຮອງປະທານ ອພສ ເມືອງ ໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດໂຄງການກໍ່ສ້າງໂຮງຮຽນມັດທະຍົມຕົ້ນສົງ.

ໂຮງຮຽນມັດທະຍົມຕອນຕົ້ນພຣະສົງ ໄດ້ຮັບການກໍ່ສ້າງຂື້ນດ້ວຍການເຫັນດີ, ເປັນເອກະພາບໃນຄະນະນຳຂັ້ນສູງຂອງເມືອງ ແລະໄດ້ປະສານງານກັບພາກສ່ວນຕ່າງໆທີ່ກ່ຽວຂ້ອງ ແລະ ອຳນາດການປົກຄອງບ້ານແລ້ວ ຈິ່ງພ້ອມກັນບຸກເບີກສະຖານທີ່ ແລະ ກໍ່ສ້າງຂື້ນ, ພ້ອມທັງວາງສີລາລືກໂຄງການກໍ່ສ້າງໂຮງຮຽນໃນເດຶອນມີນາ 2020, ໂດຍກຳນົດເວລາໃນການກໍ່ສ້າງ 1 ປີ ແຕ່ປະຕິບັດຕົວຈິງ ແມ່ນມີພຽງ 6 ເດຶອນເທົ່ານັ້ນ ກໍ່ສາມາດປະຕິບັດສຳເລັດ 100% ໂດຍແມ່ນຮ້ານອຸດົມຊັບແຮ່-ຊາຍ ບ້ານຫ້ວຍກະໂພໄຊ ເປັນຜູ້ຮັບເໝົາກໍ່ສ້າງ ແລະລົງທຶນກ່ອນ 100%, ລວມມູນຄ່າການກໍ່ສ້າງທັງໝົດ 354 ລ້ານກວ່າກີບ, ຊຳລະແລ້ວ 40 ລ້ານກີບ ແລະໄດ້ກໍານົດເວລາໄລຍະການຊໍາລະ 3 ປີ. ໂຮງຮຽນ ມຕ ສົງ ແຫ່ງນີ້ ມີຂະໜາດ 8 x 28 ແມັດ ເປັນອາຄານຊັ້ນດຽວ, ມຸງດ້ວຍສັງກະສີ ແລະມີ 4 ຫ້ອງຮຽນ.

ໂຮດເວັບໄຊທີ່ຖືກ ແລະ ດີທີ່ສຸດໃນໂລກ

ພຣະອາຈານ ບຸນເລີດ ສີສຸລາດ ເຈົ້າຄະນະ ອພສ ເມືອງລະຄອນເພັງ ກໍ່ໄດ້ມອບໃບກຽດຕິຄຸນໃຫ້ເຈົ້າອະທິການວັດຕ່າງ ທີ່ມີຜົນງານປະກອບສ່ວນໃນໄລຍະຜ່ານມາ. ເນື່ອງໃນໂອກາດດຽວກັນນັ້ນ ໃນພິທີກໍ່ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຜູ້ອຳນວຍການ ແລະ ຮອງອຳນວຍການ ຄື: ແຕ່ງຕັ້ງ ພຣະອາຈານ ສຸບິນ ກໍລະກັນ ເປັນຜູ້ອຳນວຍການ ແລະ ແຕ່ງຕັ້ງ ທ່ານ ທົງໄຊ ໂພທິລາດ ເປັນຮອງຜູ້ອຳນວຍການ ມຕ ສົງ ບ້ານລະຄອນສີ

ໃນຕອນທ້າຍ ທ່ານ ສົມໃຈ ອຸ່ນຈິດ ກຳມະການພັກແຂວງ ເລຂາພັກເມືອງ ເຈົ້າເມືອງໆລະຄອນເພັງ ແລະພຣະອາຈານ ສອນໄຊ ແກ້ວເມືອງໃຕ້ ກຳມະການສູນກາງ ອພສ, ເຈົ້າຄະນະ ອພສ ແຂວງສາລະວັນ ກໍ່ໄດ້ຮ່ວມກັນຕັດແຖບຜ້າ, ເປີດແຜນປ້າຍ ແລະລັ່ນຄອງ 9 ບາດ ເພື່ອເປັນສີລິມຸງຄຸນໃນການມອບຮັບອາຄານຮຽນຫຼັງໃໝ່ ແຫ່ງນີ້.

ພາບ-ຂ່າວ: ສິດຕາ ເພັດວົງສາ

LEAVE A REPLY

Please enter your comment!
Please enter your name here