ທ່ານ ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ພ້ອມດ້ວຍຄະນະໄດ້ລົງຢ້ຽມຢາມ ແລະ ມອບເຄື່ອງຊ່ວຍເຫຼືອຈໍານວນໜຶ່ງ ໃຫ້ແກ່ບ້ານຊ່ວຍເຫຼືອເດັກນ້ອຍ SOS ຫຼວງພະບາງເມື່ອຕົ້ນເດືອນ ກັນຍາ 2020 ນີ້, ໂດຍໃຫ້ກຽດຕ້ອນຮັບຂອງທ່ານ ນາງ ດາວວອນ ພະຜົນໄຊ ຜູ້ອໍານວຍການບ້ານຊ່ວຍເຫຼືອເດັກນ້ອຍ SOS ຫຼວງພະບາງ, ມີພະນັກງານ-ຄູອາຈານ ແລະ ລູກຫຼານພາຍໃນບ້ານຊ່ວຍເຫຼືອເດັກນ້ອຍSOS ຫຼວງພະບາງ ໃຫ້ການຕ້ອບຮັບຢ່າງອົບອຸ່ນ.
ທ່ານ ນາງ ດາວວອນ ພະຜົນໄຊ ໄດ້ລາຍງານຜົນການຈັດຕັ້ງປະຕິບັດແຜນພັດທະນາວຽກງານຂອງບ້ານຊ່ວຍເຫຼືອເດັກນ້ອຍ SOS ຫຼວງພະບາງປະຈໍາປີ 2020 ຕໍ່ທ່ານລັດຖະມົນຕີພ້ອມຄະນະຮັບຊາບເຊິ່ງໃນ 6 ເດືອນຕົ້ນປີຜ່ານມາໄດ້ເອົາໃຈໃສ່ເຄື່ອນໄຫວຈັດຕັ້ງປະຕິບັດວຽກງານຕາມພາລະບົດບາດຂອງບ້ານຊ່ວຍເຫຼືອເດັກນ້ອຍ SOS ລາວ, ເຮັດວຽກບົນຈິດໃຈສົນທິສັນຍາອົງການສະຫະປະຊາຊາດວ່າດ້ວຍສິດທິເດັກວຽກງານລ້ຽງດູ ແລະ ພັດທະນາເດັກໃນຄອບຄົວໄດ້ຖືເອົາ 3 ໜ້າທີ່ຫຼັກຂອງແມ່ຄື: ໃຫ້ການລ້ຽງດູທາງດ້ານຮ່າງກາຍ ແລະ ຄວາມອົບອຸ່ນທາງດ້ານຈິດໃຈ, ໃຫ້ການສຶກສາອົບຮົມລ້ຽງດູພາຍໃນຄອບຄົວ, ການດູແລທາງດ້ານສຸຂະພາບຮ່າງກາຍ ແລະ ຈິດໃຈ.
ນອກນັ້ນພະນັກງານທຸກຄົນໄດ້ເອົາໃຈໃສ່ໃນການສຶກສາອົມຮົມ ແລະ ລ້ຽງດູເດັກໃຫ້ເຕີບໂຕຂື້ນມາຢ່າງມີຄຸນນະພາບ. ມາຮອດປະຈຸບັນມີເດັກຢູ່ໃນການດູແລທັງໝົດ 170 ຄົນ, ຍິງ 75 ຄົນ ໃນນັ້ນຢູ່ພາຍໃນບ້ານຊ່ວຍເຫຼືອເດັກນ້ອຍSOS 100 ຄົນ, ຍິງ 56 ຄົນ ແລະ ຢູ່ນອກຈໍານວນ 70 ຄົນ, ຍິງ 37 ຄົນ ໃນຊ່ວງເກີດວິກິດພະຍາດໂຄວິດ 19 ນີ້, ມີຊາວໜຸ່ມເຍົາວະຊົນ ທີ່ຕັດອອກຈາກການຊ່ວຍເຫຼືອຂອງໂຄງການ ໄດ້ຮັບຜົນກະທົບຊ່ວງພະຍາດໂຄວິດ 19 ລະບາດ ທາງໂຄງການຍັງໄດ້ມອບເງີນຊ່ວຍເຫຼືອໃຫ້ຊາວໜຸ່ມທີ່ຕົກງານຈໍານວນ 16 ຄົນເປັນຈໍານວນເງີນທັງໝົດ 72.600.000 ກີບ.
ໃນໂອກາດທີ່ທ່ານລັດຖະມົນຕີກໍໄດ້ໃຫ້ກຽດໂອ້ລົມພ້ອມມອບເຄື່ອງໃຊ້ກັບບ້ານຊ່ວຍເຫຼືອເດັກ SOS ຫຼວງພະບາງ, ເພື່ອປະກອນການຮຽນ-ການສອນ ແລະອຸປະກອນປ້ອງກັນພະຍາດໂຄວິດ-19 ເສື້ອຜ້າຈໍານວນໜຶ່ງ ພ້ອມເງີນສົດ 3 ລ້ານກີບ, ລວມມູນຄ່າທັງໝົດ 40 ລ້ານກວ່າກີບ ພັດທະນາແບບຍືນຍົງຕະຫຼອດໄປ ແລະ ເຮັດໃຫ້ບ້ານຊ່ວຍເຫຼືອເດັກນ້ອຍ ເອສໂອເອສຫຼວງພະບາງເປັນບ່ອນເພິ່ງພາອາໄສຂອງເດັກກໍ່າພ້າ, ກໍ່າພອຍ, ເດັກບໍ່ມີຍາດພີ່ນ້ອງຮອງຮັບ ແລະ ເດັກນ້ອຍທີ່ມີຄວາມສ່ຽງຕໍ່ການປະລະຈາກຄອບຄົວ.
