5 ປີຕໍ່ໜ້າໄຊຍະບູລີ ວາງເປົ້າໝາຍແກ້ໄຂຄອບຄົວທຸກຍາກຕາມດໍາລັດ 348/ລບ ບໍ່ໃຫ້ເກີນ 3,2%.

ທ່ານ ເພັງນິລັນ ຄໍາພັນເພັງ ຮອງເຈົ້າແຂວງໄຊຍະບູລີ ໄດ້ກ່າວລາຍງານຕໍ່ກອງປະຊຸມໃຫຍ່ອົງຄະນະພັກແຂວງ ຄັ້ງທີ VII ທີ່ຈັດຂຶ້ນໃນລະຫວ່າງ ວັນທີ 8-9 ກັນຍາ 2020 ນີ້ວ່າ: ໃນ 5 ປີຕໍ່ໜ້າ ແຕ່ປີ 2020-2025 ແຂວງໄຊຍະບູລີ ຈະສູ້ຊົນແກ້ໄຂຄອບຄົວທຸກຍາກຕາມດໍາລັດ 348/ລບ ໃຫ້ຍັງເຫຼືອບໍ່ເກີນ 3,2%, ບ້ານທຸກຍາກຍັງເຫຼືອບໍ່ເກີນ 7,7%, ສ້າງບ້ານພັດທະນາໃຫ້ເພີ່ມຂຶ້ນ 140 ບ້ານ, ຄອບຄົວພັດທະນາໃຫ້ເພີ່ມຂຶ້ນ 8.000 ຄອບຄົວ, ສ້າງບ້ານໃຫຍ່ເປັນຕົວເມືອງນ້ອຍໃນຊົນນະບົດໃຫ້ໄດ້ 8 ຈຸດ, ສ້າງເມືອງໃຫ້ບັນລຸມາດຖານພົ້ນທຸກໃຫ້ໄດ້ 3 ເມືອງ, ສ້າງເມືອງເຂັ້ມແຂງຮອບດ້ານໃຫ້ໄດ້ 2 ເມືອງ;

ເພື່ອບັນລຸເປົ້າໝາຍທີ່ກ່າວມານັ້ນ ໃນ 5 ປີຕໍ່ໜ້າສູ້ຊົນເຮັດໃຫ້ເສດຖະກິດຂະຫຍາຍຕົວເພີ່ມຂຶ້ນ ສະເລ່ຍ 7% ຕໍ່ປີ ລວມຍອດຜະລິດຕະພັນພາຍໃນຮອດປີ 2025 ໃຫ້ບັນລຸ 15.185 ຕື້ກີບ, ສະເລ່ຍໃສ່ຫົວຄົນໜຶ່ງໃຫ້ໄດ້ 3.800 ໂດລາສະຫະລັດ; ໃນນັ້ນກະສິກໍາເພີ່ມຂຶ້ນ 2,3% ກວມ 26%, ອຸດສາຫະກໍາເພີ່ມຂຶ້ນ 10% ກວມເອົາ 37% ແລະ ບໍລິຫານເພີ່ມຂຶ້ນ 6,3% ກວມ 37% ຂອງ GDP.

ຄາດຄະເນຮອດປີ 2025 ຈະມີພົນລະເມືອງທັງໝົດ 431.734 ຄົນ, ປະຕິບັດຈັດເກັບລາຍຮັບເຂົ້າງົບປະມານໃຫ້ໄດ້ຢ່າງໜ້ອຍ 5.099 ຕື້ກີບ ຫຼື ເທົ່າກັບ 7% ຂອງ GDP ຕໍ່ປີ, ສ້າງມູນຄ່າການສົ່ງອອກສິນຄ້າໃຫ້ເພີ່ມຂຶ້ນ 7% ຕໍ່ປີ, ຄຸ້ມຄອງການນໍາເຂົ້າສິນຄ້າໃຫ້ຢູ່ໃນລະດັບ 6% ຕໍ່ປີ, ຜະລິດເຂົ້າໃຫ້ໄດ້ 188.000 ໂຕນ/ປີ, ຜົນຜະລິດພືດເປັນສິນຄ້າບໍ່ໃຫ້ຫຼຸດ 1.400.000 ໂຕນ/ປີ, ພືດສະບຽງອາຫານໃຫ້ໄດ້ 180.000 ໂຕນ/ປີ, ຜະລິດຊີ້ນ-ປາ ແລະ ໄຂ່ ສະເລ່ຍໃສ່ຫົວຄົນໜຶ່ງໃຫ້ໄດ້ 55 ກິໂລຕໍ່ຄົນຕໍ່ປີ, ຝູງສັດໃຫ້ຂະຫຍາຍຕົວ 6% ຕໍ່ປີ.

ສ້າງມູນຄ່າການຜະລິດດ້ານອຸດສາຫະກໍາ ແລະ ຫັດຖະກໍາໃຫ້ບັນລຸ 1.392 ຕື້ກີບ, ເຮັດໃຫ້ບ້ານພົ້ນທຸກທົ່ວແຂວງໄດ້ຊົມໃຊ້ໄຟຟ້າໃນລະບົບໄຟຟ້າລາວ 100%, ສູ້ຊົນເຮັດໃຫ້ບໍລິມາດການຂົນສົ່ງສິນຄ້າເພິ່ມຂຶ້ນບໍ່ໃຫ້ຫຼຸດ 10% ຕໍ່ປີ, ເຮັດໃຫ້ການຂົນສົ່ງບໍລິມາດເພີ່ມຂຶ້ນຢ່າງໜ້ອຍ 16% ຕໍ່ປີ, ສ້າງເງື່ອນໄຂດຶງດູດນັກທ່ອງທ່ຽວໃຫ້ໄດ້ 175.000 ຄົນ/ປີ ເພື່ອສ້າງລາຍຮັບຈາກການທ່ອງທ່ຽວໃຫ້ໄດ້ 7 ລ້ານໂດລາ.

ດ້ານສັງຄົມເຮັດໃຫ້ອັດຕາເຂົ້າຮຽນລວມມັດທະຍົມຕອນຕົ້ນໃຫ້ໄດ້ 95% ຂຶ້ນໄປ, ອັດຕາເຂົ້າຮຽນລວມມັດທະຍົມຕອນປາຍໃຫ້ໄດ້ 64% ຂຶ້ນໄປ, ອັດຕາປະລະມັດທະຍົມຕອນຕົ້ນໃຫ້ຕໍ່າກວ່າ 3%, ນັກຮຽນຈົບຊັ້ນມໍຕົ້ນເຂົ້າຮຽນຕໍ່ອະຊີວະສຶກສາໃຫ້ໄດ້ 5% ຂຶ້ນໄປ, ນັກຮຽນຈົບຊັ້ນມໍປາຍສືບຕໍ່ຮຽນວິຊາຊີບພາຍໃນ ແລະ ຕ່າງປະເທດໃຫ້ໄດ້ 30% ຂຶ້ນໄປ. ສັກຢາກັນພະຍາດເດັກລຸ່ມ 1 ປີໃຫ້ໄດ້ 100%, ບ້ານສາທາລະນະສຸກແບບຢ່າງໃຫ້ໄດ້ 94% ຂອງບ້ານທັງໝົດ, ອາຍຸຍືນສະເລ່ຍໃຫ້ໄດ້ 73 ປີ, ອັດຕາການຫວ້າງງານໃຫ້ຢູ່ໃນລະດັບ 2,5%.

ຂ່າວ: ບຸຸນທີ.

---------------

ຢ່າລືມກົດຕິດຕາມເພຈ All in LAOS


------------------------------

LEAVE A REPLY

Please enter your comment!
Please enter your name here