ໄຂຂື້ນຢ່າງເປັນທາງການວັນທີ 8 ກັນຍາ 2020 ທີ່ຫໍປະຊຸມນະຄອນຫຼວງພະບາງ ໂດຍການເປັນປະທານຂອງ ສາທຸ ອ່ອນແກ້ວ ກິດຕິພັດໂທ ປະທານຄະນະສົງແຂວງຫຼວງພະບາງ,ມີພຣະອາຈານ ມະຫາບຸນມາ ສິມມາພົມ ຮັກສາການປະທານສູນກາງອົງການພຸດທະສາສະໜາສໍາພັນແຫ່ງ ສປປ ລາວ,ມີພຣະເຖຣານຸເຖຣະ,ຜູ້ແທນພຣະສົງໃນທົ່ວແຂວງ ພ້ອມດ້ວຍການນໍາອ້ອມຂ້າງແຂວງເຂົ້າຮ່ວມ 72 ອົງ.
ກອງປະຊຸມຄັ້ງນີ້ຈະໄດ້ຮັບຟັງສະພາບການເຄື່ອນໄຫວຂອງອົງການພຸດທະສາສະໜາສໍາພັນລາວແຂວງໄລຍະ 5 ປີ, ທັງເປັນການປະເມີນຜົນງານ, ຄົ້ນຄ້ວາ ແລະ ການເຄື່ອນໄຫວຈັດຕັ້ງປະຕິບັດວຽກງານ 5 ປີຜ່ານມາ,ເພື່ອຍົກໃຫ້ເຫັນດ້ານດີ-ດ້ານອ່ອນ ແລະ ຂໍ້ຄົງຄ້າງເພື່ອນໍາມາປັບປຸງແກ້ໄຂ ແລະ ເປັນບ່ອນອິງໃນການຜັນຂະຫຍາຍເປັນແຜນວຽກງານໃນ 5 ປີຕໍ່ໜ້າ, ພ້ອມດຽວກັນນີ້ກອງປະຊຸມຍັງຈະໄດ້ຮັບຮອງເອົາການປະກອບບຸກຄະລາກອນພຣະສົງອົງທີ່ມີຄວາມຮູ້ຄວາມສາມາດ ແລະ ມີມາດຖານເງື່ອນໄຂຄົບຖ້ວນເຂົ້າເປັນຄະນະບໍລິຫານງານອົງການພຸດທະສາສະໜາສໍາພັນລາວ ແຂວງຫຼວງພະບາງ ຕາມຄວາມເໝາະສົມທີ່ໄດ້ກໍານົດໄວ້ໃນລັດຖະທໍາມະນູນສົງລາວ.
ນອກນີ້ຍັງຈະໄດ້ຮັບຟັງການປະກອບຄວາມຄິດເຫັນຂອງອົງການຈັດຕັ້ງສົງຂອງບັນດາເມືອງອ້ອມຂ້າງແຂວງ,ການໃຫ້ທິດຊີ້ນໍາຈາກການນໍາພັກ-ລັດແຂວງ ຕໍ່ກັບການພັດທະນາເສດຖະກິດ-ສັງຄົມ ແລະ ການຄຸ້ມຄອງການເຄື່ອນໄຫວຂອງພຣະສົງ-ສໍາມະເນນ ໃຫ້ຖືກຕ້ອງຕາມຫຼັກທໍາມະວິໄນ ແລະ ຄໍາໃຫ້ໂອວາດຂອງພຣະອາຈານໃຫຍ່ ຮັກສາການປະທານສູນກາງພຸດທະສາສະໜາສໍາພັນແຫ່ງ ສປປ ລາວ. ກອງປະຊຸມໃຫຍ່ຄັ້ງທີ VIII ອົງການພຸດທະສາສະໜາສໍາພັນແຂວງຫຼວງພະບາງ ຈະໄດ້ດໍາເນີນເປັນເວລາ 2 ວັນຈິ່ງສໍາເລັດ.
ຂ່າວ: ເພັດສາຄອນ ສິມມະວົງ
---------------
ຢ່າລືມກົດຕິດຕາມເພຈ All in LAOS
------------------------------
