ເພື່ອເປັນການສ້າງຂະບວນການຂັບນັບຮັບຕ້ອນວັນສໍາຄັນຕ່າງໆ ຂອງພັກ- ຂອງຊາດ ເວົ້າລວມ ສະເພາະກໍ່ແມ່ນ ຕ້ອນຮັບໄຂສົກຮຽນໃໝ່ 2020-2021, ແລະວັນຄູແຫ່ງຊາດທີ່ຈະມາຮອດໃນມໍ່ໆນີ້ ແລະເພື່ອເປັນການສ້ອມແປງເສັ້ນທາງເຂົ້າບ້ານ, ໃຫ້ໜາ ແໜ້ນ-ແລ່ນສະດວກ, ສະນັ້ນມາໃນຕອນເຊົ້າ ວັນທີ 6 ກັນຍາ 2020 ນີ້, ອໍານາດການປົກຄອງບ້ານໆ ນາສອບ ເມືອງໄຊບູລີ ແຂວງສະຫວັນນະເຂດ, ໄດ້ສ້າງຂະບວນການອອກແຮງງານລວມ, ເຊິ່ງນໍາພາໂດຍ ທ່ານ ບຸນມີ ວົງລໍາພັນ ເລຂາພັກບ້ານ ນາຍບ້ານໆ ນາສອບ, ມີຮອງນາຍບ້ານ, ອົງການຈັດຕັ້ງຂັ້ນບ້ານ ພ້ອມດ້ວຍປະຊາຊົນ ຍິງໝຸ່ມ- ຊາຍໝຸ່ມ ພາຍໃນບ້ານນາສອບເຂົ້າຮ່ວມຈໍານວນ 150 ຄົນ, ຍິງ 30 ຄົນ
ໜ້າວຽກທີ່ເຮັດໃນຄັ້ງນີ້ , ແມ່ນການສ້ອມແປງເສັ້ນທາງເຂົ້າບ້ານ-ຜ່າບ້ານ, ໂດຍເລີ່ມແຕ່ປາກທາງຂອງເສັ້ນທາງເລກທີ 13 ໃຕ້ ເຂົ້າໄປຫາບ້ານ ເປັນໄລຍະທາງ ຍາວ 3 ກິໂລແມັດ, ສໍາລັບພາຫະນະແລະເຄື່ອງມືໃນການສ້ອມແປງເສັ້ນທາງໃນຄັ້ງນີ້, ແມ່ນໄດ້ລະດົມປະຊາຊົນເອົາລົດໄຖນາຍ່າງຕາມຈໍານວນ 50 ຄັນ, ອຸປະກອນມີ: ຈົກ, ສຽບ, ຊວ້ານ ແລະ ພ້າ, ເຊິ່ງໃນນັ້ນ ແມ່ນໄດ້ນໍາເອົາລົດໄຖນາຍ່າງຕາມແກ່ເອົາດິນ ແລະ ຫີນປູທາງທີ່ບົດແລ້ວນໍາມາຖົມໃສ່ບ່ອນເປັນໂບກ, ເປັນຂຸມ, ເນື່ອງຈາກການສັນຈອນໄປມາຂອງພາຫະນະປະຊາຊົນໃນຊ່ວງລະດູຝົນນັ້ນ, ຈົນເຮັດໃຫ້ເສັ້ນທາງດັ່ງກ່າວເປ້ເພ ແລະ ເພື່ອເຮັດໃຫ້ເສັ້ນທາງເຂົ້າບ້ານ ສາມາດສັນຈອນໄປມາຫາຊູ່ໜາແໜ້ນ-ແລ່ນສະດວກ, ຕາມບໍລິເວນແຄມທາງກໍ່ຍັງໄດ້ຖາງປ່າອະນາໄມ ເພື່ອໃຫ້ທັດສະນິຍະພາບໃນການເບິ່ງເຫັນຂອງຜູ້ໃຊ້ລົດໃຊ້ທະໜົນ, ທັງນີ້ກໍ່ເພື່ອເປັນການປຸກລະດົມຄວາມສາມັກຄີຂອງປະຊາຊົນພາຍໃນບ້ານ ແລະ ທີ່ສໍາຄັນກໍ່ເພື່ອເປັນການສ້າງຂະບວນການຂັບນັບຮັບຕ້ອນວັນສໍາຄັນຕ່າງໆຂອງພັກ-ຂອງຊາດ ສະເພາະກໍ່ແມ່ນກອງປະຊຸມໃຫຍ່ຂັ້ນເມືອງ, ຂັ້ນແຂວງ ແລະ ການພັດທະນາລະບົບໂຄງລ່າງພື້ນຖານຂອງບ້ານໄດ້ຮັບການປັບປຸງໄປເທື່ອລະກ້າວ
ພາບ ແລະ ຂ່າວ: ຄໍາກອນ ພອນມາລາ
