ວັນທີ 7 ກັນຍາ 2020 ທີ່ສຳນັກງານຫ້ອງວ່າການແຂວງຈຳປາສັກ, ທ່ານ ວິໄລວົງ ບຸດດາຄຳ ກຳມະການສູນກາງພັກ, ເລຂາພັກແຂວງ, ເຈົ້າແຂວງຈໍາປາສັກພ້ອມຄະນະໄດ້ຕ້ອນຮັບ ທ່ານ ຄຳຜາ ພິມມະສອນ ກຳມະການປະຈຳພັກ, ຮອງຫົວໜ້າຫ້ອງວ່າການສູນກາງພັກ, ພ້ອມດ້ວຍຄະນະອະນຸກຳມະການເນື້ອໃນຂັ້ນສູນກາງຈາກຫ້ອງວ່າການສູນກາງພັກ ລົງເຄື່ອນໄຫວເຮັດວຽກຢູ່ແຂວງຈຳປາສັກ.

ໂອກາດດັ່ງກ່າວ, ທ່ານ ວິໄລວົງ ບຸດດາຄຳ ໄດ້ສະແດງຄວາມຍິນດີຕ້ອນຮັບ, ພ້ອມລາຍງານໃຫ້ຮູ້ ໃນການລົງຊຸກຍູ້ຊີ້ນຳວຽກງານພັດທະນາເສດຖະກິດ-ສັງຄົມ, ຊຸກຍູ້ດ້ານຂະບວນການ ແລະ ເນື້ອໃນ, ຕ້ອນຮັບກອງປະຊຸມໃຫຍ່ ຄັ້ງທີ 8 ຂອງອົງຄະນະພັກແຂວງ ຢູ່ບັນດາເມືອງໂດຍລວມ.

ໂຮດເວັບໄຊທີ່ຖືກ ແລະ ດີທີ່ສຸດໃນໂລກ

ໃນໂອກາດນີ້, ທ່ານ ຄຳຜາ ພິມມະສອນ ກ່າວວ່າ: ການລົງມາເຮັດວຽກໃນຕັ້ງນີ້, ແມ່ນລົງສົມທົບຮ່ວມກັບ ຄະນະຮັບຜິດຊອບ ຊີ້ນຳການກະກຽມ-ດຳເນີນກອງປະຊຸມໃຫຍ່ອົງຄະນະພັກແຂວງ ຈຳປາສັກສະໄໝທີ 8, ອະນຸກຳມະການເນື້ອໃນຂັ້ນແຂວງ ເພື່ອປຶກສາຫາລື ໃນການປັບປຸງດ້ານເນື້ອກອງປະຊຸມໃຫຍ່ ຂອງອົງຄະນະພັກແຂວງຈຳປາສັກ ຄັ້ງທີ 8 ທີ່ຄາດໜາຍວ່າຈະໄດ້ຈັດຂຶ້ນໃນເດືອນຕຸລາ 2020 ນີ້, ເພື່ອເຮັດໃຫ້ການປັບປຸງດ້ານເນື້ອໃນ ຕິດພັນກັບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກກໍຄືມະຕິກອງປະຊຸມໃຫຍ່ຄັ້ງທີ 7 ຂອງອົງຄະນະພັກແຂວງ ເປັນການຈັດຕັ້ງປະຕິບັດຕົວຈິງເລີ່ມແຕ່ຮາກຖານຂຶ້ນມາ, ເຊິ່ງໄດ້ລົງເລີກ ຮ່າງແຜນພັດທະນາເສດຖະກິດ- ສັງຄົມຂອງແຂວງ 5 ປີຄັ້ງທີ 9 ແລະ ລົງເລີກ ບົດສຳຫລວດການນຳພາລວມ, ບັນດາບົດປິ່ນອ້ອມຕ່າງໆ.

ໃນໂອກາດມາເຄື່ອນໄຫວວຽກງານ ຢູ່ແຂວງຈຳປາສັກ ຄັ້ງນີ້, ຄະນະຍັງໄດ້ເດີນທາງໄປຕິດ ຕາມເບິ່ງການພັດທະນາເຂດເສດຖະກິດໃໝ່ສີທັນດອນ, ໂຄງການກໍ່ສ້າງໂຮງແຮມ ຢູ່ຣິສອດ ຄອນພະເພັງ ບ້ານທ່າຄໍ້ ເມືອງໂຂງ, ໂຄງການກໍ່ສ້າງເສັ້ນທາງເບຕົງອ້ອມດອນໂຂງ ໂດຍການຕ້ອນຮັບ ຂອງຄະນະບໍລິຫານບໍລິສັດ ຮ່ວມພັດທະນາສີທັນດອນ ຈຳກັດ ຕື່ມອີກ.


ຂ່າວ-ຮູບ: ທັດຊະນະ

LEAVE A REPLY

Please enter your comment!
Please enter your name here