ປກສ ນະຄອນຫຼວງວຽງຈັນ ສຶກສາອົບຮົມກຸ່ມແກ້ງຂີ່ລົດກວນເມືອງ 41 ຄົນ

ນະຄອນຫຼວງວຽງຈັນ: ໃນຕອນເຊົ້າຂອງວັນທີ 04 ກັນຍາ 2020, ກອງພັນປ້ອງກັນເຄື່ອນທີ່ ປກສ ນວ ໄດ້ສຶກສາອົບຮົມກ່າວເຕືອນ ກຸ່ມແກ້ງຂີ່ລົດກວນເມືອງ, ດັດແປງສະພາບເຕັກນີກລົດ ( ໃສ່ທໍ່ທີ່ມີສຽງດັງ, ໃສ່ຢາງນ້ອຍ ), ທ່ຽວເດີກ ແລະ ມົ້ວສຸມເສບຢາເສບຕິດຈໍານວນ 41 ຄົນ

ການສຶກສາອົບຮົມຄັ້ງນີ້ ເພື່ອໃຫ້ປ່ຽນແປງແນວຄິດ ແລະ ພຶດຕິກໍາບໍ່ໃຫ້ເຄື່ອນໄຫວກໍ່ຄວາມບໍ່ສະຫງົບຢູ່ໃນສັງຄົມກໍ່ຄື ນວ ແຕ່ລະຄົນໄດ້ຮັບຮູ້ເຖີງຜົນຮ້າຍ ແລະ ໄພອັນຕະລາຍ ທີ່ຂັດຕໍ່ລະບຽບກົດໝາຍ ແຫ່ງ ສປປ ລາວ.

ພ້ອມທັງເຮັດບົດບັນທຶກກ່າວເຕືອນ ແລະ ມອບໃຫ້ຜູ້ປົກຄອງນໍາໄປສຶກສາອົບຮົມຕື່ມອີກ; ເຊິ່ງພິທີສຶກສາອົບຮົມແມ່ນຈັດຂຶ້ນ ໂດຍການເປັນປະທານ ຂອງ ພັທ ບຸນຖົມ ແກ້ວມະນີວົງ ຫົວໜ້າກອງພັນປ້ອງກັນເຄື່ອນທີ່ ປກສ ນວ, ມີຕາງໜ້າຈາກຫ້ອງການສຶກສາທິການ ແລະ ກິລາ ເມືອງໄຊເສດຖາ, ເມືອງ ຈັນທະບູລີ, ເມືອງສີສັດຕະນາກ ແລະ ເມືອງສີໂຄດຕະບອງ , ມີພະນັກງານນັກງານ-ນັກຮົບ ພ້ອມດ້ວຍພໍ່ແມ່ຜູ້ປົກຄອງຜູ້ລະເມີດເຂົ້າຮ່ວມ.

ໃນພິທີ ພັທ ພອນທິບ ພັນທະວົງ ຮອງຫົວໜ້າກອງພັນປ້ອງກັນເຄື່ອນທີ່ ປກສ ນວ ໃຫ້ຮູ້ວ່າ: ກຸ່ມແກ້ງທີ່ນໍາມາສຶກສາອົບຮົມຄັ້ງນີ້ ໃນເບື້ອງຕົ້ນແມ່ນໄດ້ຮັບແຈ້ງຈາກພົນລະເມືອງດີໃນວັນທີ 26 ສິງຫາ 2020 ວ່າ: ໃນຕອນເດີກຂອງວັນທີ 28 ສິງຫາ 2020 ຈະມີການເຕົ້າໂຮມກຸ່ມແກ້ງຂີ່ລົດກວນເມືອງຢູ່ເສັ້ນທາງລ້ານຊ້າງ, ໄຟອໍານາດໄອໂມບາຍ, ໄຟອໍານາດຕະຫຼາດເຊົ້າມໍ, ໄຟອໍານາດຫໍຄໍາ ເພື່ອແຂ່ງລົດກັນ.

ດັ່ງນັ້ນ, ວັນທີ 29 ສີງຫາ ເວລາ 02: 30 ໂມງ ກອງພັນປ້ອງກັນເຄື່ອນທີ່ ປກສ ນວ, ຈຶ່ງໄດ້ຈັດຕັ້ງກໍາລັງວິຊາສະເພາະອອກເຄື່ອນໄຫວເພື່ອສະກັດກັ້ນ ແລະ ແກ້ໄຂກຸ່ມແກ້ງດັ່ງກ່າວ.

ຜ່ານການລົງເຄື່ອນໄຫວຕົວຈິງສາມາດກັກຕົວກຸ່ມແກ້ງຂີ່ລົດກວນເມືອງ, ດັດແປງສະພາບເຕັກນິກລົດ ( ໃສ່ທໍ່ທີ່ມີສຽງດັງ, ໃສ່ຢາງນ້ອຍ ), ທ່ຽວເດິກ ແລະ ມົ້ວສຸມເສບຢາເສບຕິດໄດ້ທັງໝົດ 41 ຄົນຍິງ 5 ຄົນ;