ຄໍາມ່ວນ: ເຫດການດັ່ງກ່າວແມ່ນເກີດຂຶ້ນທີ່ບ້ານນາກາຍໃຕ້, ເມືອງນາກາຍ, ແຂວງຄຳມ່ວນ ເຊິ່ງແມ່ນທ້າວ ຄຳເໝັ້ນ ອາຍຸປະມານ 70 ປີ ໄດ້ເຂົ້າປ່າເພື່ອຊອກຫາກິນ (ຊອກເຫັດ) ແຕ່ວັນທີ 22 ສິງຫາ 2020 ແຕ່ພາຍຫລັງທີ່ເຂົ້າໄປນັ້ນກໍ່ບໍ່ກັບອອກມາເລີຍ ຄອບຄົວຂອງຜູ້ກ່ຽວຈຶ່ງໄດ້ແຈ້ງຕໍ່ການຈັດຕັ້ງບ້ານ ແລະ ເຈົ້າຫນ້າທີ່ກ່ຽວຂ້ອງອອກຊອກຫາ.
ຫລັງຈາກທີ່ຊອກຫາເປັນເວລາ 2 ວັນ ກໍ່ພົບຜູ້ກ່ຽວເສຍຊີວິດຢູ່ໃນປ່າ ໃນສະພາບຫົວແຕກ ແລະ ຂາເບື້ອງຫນຶ່ງຫັກ, ເຊິ່ງໃນບໍລິເວນທີ່ພົບເຫັນສົບຂອງຜູ້ເສຍຊີວິດແມ່ນມີຮອຍຕີນຊ້າງຢູ່ເປັນຈຳນວນຫລາຍ ເຈົ້າຫນ້າທີ່ຈຶ່ງສັນນິຖານວ່າຜູ້ກ່ຽວອາດຖືກຊ້າງປ່າໄລ່ຢຽບ ຈົນເຮັດໃຫ້ເສຍຊີວິດ.
ຕາມການໃຫ້ຂໍ້ມູນຂອງ ທ່ານ ເຄນສີ ແດງຮຸ່ງເຮືອງ ນາຍບ້ານໆນາກາຍໃຕ້ ໃຫ້ຮູ້ວ່າ: ໃນປີທີ່ຜ່ານມາກໍ່ເຄີຍມີຊ້າງປ່າຝູງໃຫຍ່ ທີ່ອອກມາອາລະວາດ, ທຳລາຍຜົນລະປູກ ແລະ ເຮັດໃຫ້ປະຊາຊົນແຕກຕື່ນ.
