ການສ້າງຕັ້ງກອງທຶນພັດທະນາບ້ານ ມີຈຸດປະສົງເພື່ອໃຫ້ປະຊາຊົນໄດ້ມີໂອກາດເຂົ້າເຖິງສິນເຊື່ອ, ມີເງື່ອນໄຂກູ້ຢືມເພື່ອທຳການຜະລິດ, ເຮັດທຸລະກິດຂະໜາດນ້ອຍ ແລະ ເປັນການຫລຸດ ຜ່ອນກູ້ຢືມເງິນນອກລະບົບທີ່ມີອັດຕາດອກເບ້ຍສູງ; ດັ່ງນັ້ນ ເມືອງໂຂງ ແຂວງຈຳປາສັກ ຈຶ່ງໄດ້ສ້າງຕັ້ງກອງທຶນພັດທະນາບ້ານດ່ັງກ່າວຂຶ້ນ, ມາຮອດປັດຈຸບັນ ທົ່ວເມືອງລວມມີທັງໝົດ 86 ກອງທຶນ, ລວມທັງສະຫະກອນສິນເຊື່ອ ແລະ ເງິນຝາກປະຢັດ (ສສງ) 2 ແຫ່ງ;
ໃນນັ້ນ ເປັນກອງທຶນທີ່ສະ ຫະພັນແມ່ຍິງເມືອງຮັບຜິດຊອບຈຳນວນ 20 ກອງທຶນ ແລະ ຫ້ອງການກະສິກຳ-ປ່າໄມ້ເມືອງຮັບຜິດຊອບຈຳນວນ 68 ກອງທຶນ ລວມມີເງິນທ້ອນຂອງສະມາຊິກທັງໝົດຈຳນວນ 17.355 ລ້ານກວ່າກີບ, ມີສະມາຊິກທັງໝົດ 6.020 ຄົນ, ຍິງ 3.815 ຄົນ.
ທ່ານ ທອງໃສ ສີມຈະເລີນ ຫົວໜ້າຫ້ອງການກະສິກຳ-ປ່າໄມ່ເມືອງ ເປີດເຜີຍໂອກາດເປີດກອງປະຊຸມສະຫລຸບ ແລະ ປັບປຸງວຽກງານກອງທຶນພັດທະນາບ້ານ ໃນທົ່ວເມືອງ ປະຈຳປີ 2020 ໃນວັນທີ 19 ສິງຫາ ນີ້ ພາຍໃຕ້ການເຂົ້າຮ່ວມເປັນປະທານຂອງທ່ານ ບຸນເຮັງ ກົມປະເສີດ ຮອງເຈົ້າເມືອງໆໂຂງ, ມີບັນດາທ່ານກຳມະການພັກເມືອງ, ຫ້ອງການອ້ອມຂ້າງເມືອງ, ເລຂາພັກບ້ານ, ນາຍ ບ້ານ ແລະ ຄະນະກອງທຶນບ້ານເຂົ້າຮ່ວມຢ່າງພ້ອມພຽງ.
ໃນທົ່ວເມືອງ ມີກອງທຶນພັດທະນາບ້ານທີ່ເຂັ້ມແຂງ ສາມາດປັນຜົນໃນທ້າຍປີໃຫ້ສະມາຊິກມີຈຳນວນ 16 ກອງທຶນ ແລະ ຍັງມີກອງທຶນທີ່ບໍ່ສາມາດປັນຜົນໃຫ້ສະມາຊິກໄດ້ ມີຈຳນວນ 46 ກອງທຶນ.
ໂອກາດດຽວກັນ ປະທານກອງປະຊຸມກໍໄດ້ເນັ້ນໜັກໃຫ້ຄະນະກອງທຶນທີ່ເຫັນວ່າຍັງອ່ອນ ຈົ່ງໄດ້ເປັນເຈົ້າການປະຕິບັດລະບຽບຂອງກອງທຶນຢ່າງເຂັ້ມງວດ, ພາກສ່ວນທີ່ກ່ຽວຂ້ອງຕ້ອງໄດ້ມີການຍົກລະດັບຄວາມຮູ້ຄວາມສາມາດໃຫ້ຄະນະຮັບຜິດຊອບກອງທຶນບ້ານ, ທີ່ສຳຄັນຄະນະຮັບຜິດຊອບກອງທຶນຂັ້ນເມືອງກໍຍັງຂາດຄວາມເອົາໃຈໃສ່ຕິດຕາມກວດກາ, ຊຸກຍູ້ວຽກງານດັ່ງກ່າວຢ່າງຕໍ່ເນື່ອງ.
ຂ່າວ-ພາບ: ພຸດທະສິນ ເມືອງໂຂງ
