22.1 C
Laos
Thursday, October 28, 2021

ສຳເລັດກອງປະຊຸມ ສະໄໝສາມັນ ເທື່ອທີ 9 ຂອງສະພາປະຊາຊົນແຂວງອຸດົມໄຊ ຊຸດທີ I

ຂ່າວເດັ່ນອາທິດນີ້

ກອງປະຊຸມ ສະໄໝສາມັນ ເທື່ອທີ 9 ຂອງສະພາປະຊາຊົນແຂວງອຸດົມໄຊ ຊຸດທີ I ພາຍຫຼັງດຳເນີນເປັນເວລາ 2 ວັນເຕັມ ມາໃນຕອນບ່າຍຂອງວັນທີ 19 ສິງຫານີ້ ກໍໄດ້ອັດລົງດ້ວຍຜົນສຳເລັດ ຢູ່ທີ່ສະໂມສອນຂອງແຂວງ. ໂດຍພາຍໃຕ້ການເປັນປະທານຂອງ ທ່ານ ບຸນລອດ ອ່ອນພະຈັນ ປະທານສະພາປະຊາຊົນແຂວງອຸດົມໄຊ.

ເປັນກຽດເຂົ້າຮ່ວມມີ ທ່ານ ປອ ຄຳພັນ ເຜີຍຍະວົງ, ກຳມະການສູນກາງພັກ, ເລຂາຄະນະບໍລິຫານງານ ພັກແຂວງ, ເຈົ້າແຂວງອຸດົມໄຊ. ມີບັນດາສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ການນໍາແຂວງ, ອາດີດການນໍາ, ນັກປະຕິວັດອາວຸໂສ, ຜູ້ຊົງຄຸນວຸດທິ, ອາດີດສະມາຊິກສະພາແຫ່ງຊາດ, ຜູ້ຕາງໜ້າອົງການຈັດຕັ້ງພັກ – ລັດ, ບັນດາທ່ານຫົວໜ້າພະແນກການ – ກົມກອງ, ແນວລາວສ້າງຊາດ, ອົງການຈັດຕັ້ງມະຫາ ຊົນ ແລະ ຕົວແທນນັກທຸລະກິດເຂົ້າ.

ຕະຫຼອດໄລຍະດຳເນີນກອງປະຊຸມ ບັນດາສະມາຊິກສະພາແຫ່ງຊາດ,ສະພາປະຊາຊົນແຂວງ ແລະ ບັນດາຜູ້ແທນເຂົ້າຮ່ວມໄດ້ພ້ອມກັນສຸມໃສ່ ຄົ້ນຄວ້າ, ປະກອບຄຳຄິດຄຳເຫັນໃສ່ ເນື້ອໃນຂອງກອງປະຊຸມ ດ້ວຍຄວາມຮັບຜິດຊອບສູງ ແລະ ສອດຄ່ອງກັບສະພາບຄວາມເປັນຈິງ ພ້ອມທັງໄດ້ພິຈາລະນາ ແລະ ຮັບຮອງເອົາບັນຫາສໍາຄັນຕ່າງໆຂອງແຂວງອຸດົມໄຊ ດ້ວຍຄວາມເປັນເອກະສັນ.

ໃນນັ້ນ ໄດ້ຮັບຟັງການລາຍງານ, ພິຈາລະນາ, ຮັບຮອງເອົາການສະເໜີຍົກຍ້າຍ ແລະ ແຕ່ງຕັ້ງບຸກຄະລາກອນ ຂອງສະພາປະຊາຊົນແຂວງອຸດົມໄຊ, ຮັບຮອງເອົາການເລືອກຕັ້ງເຈົ້າແຂວງ – ແຂວງ ອຸດົມໄຊ, ຮັບຮອງເອົາການແຕ່ງຕັ້ງ ຮອງເຈົ້າແຂວງ, ຮັບຮອງເອົາໂຄງປະກອບກົງຈັກ, ບຸກຄະລາກອນຂອງອົງການປົກຄອງແຂວງ, ການລາຍງານວຽກງານຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ຫຼື ໂຄວິດ 19 ໃນໄລະຜ່ານມາ ແລະ ທິດທາງຮັບມືປ້ອງກັນໃນສະເພາະໜ້າ, ບົດຊີ້ແຈງຂອງຄະນະປະສານງານໂຄງການກໍ່ສ້າງ ເສັ້ນທາງລົດໄຟລາວ – ຈີນ ກ່ຽວກັບການຊົດເຊີຍຜູ້ທີ່ຖືກຜົນກະທົບຈາກໂຄງການກໍ່ສ້າງເສັ້ນທາງລົດໄຟລາວ – ຈີນ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2020, ການຊີ້ແຈງຂອງພະແນກອຸດສາຫະກຳ ແລະ ການຄ້າ ໃນການຄຸ້ມຄອງ ເໜັງຕີງຂອງສິນຄ້າຢູ່ທ້ອງຕະຫຼາດ, ການນຳເຂົ້າ-ການສົ່ງອອກສິນຄ້າພາຍໃນ ແລະ ຕ່າງປະເທດ ປະຈໍາ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2020,

ການຊີ້ແຈງຂອງທະນາຄານກ່ຽວກັບ ການຄຸ້ມຄອງບັນດາທະນາຄານທຸລະກິດ, ການປ່ອຍກູ້ ແລະ ອັດຕາເງີນເຟີ້ ປະຈຳ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2020 ແລະ ການແກ້ໄຂໜີ້ MPL ແລະ ບັນຫາອື່ນໆ. ພິຈາລະນາ, ຮັບຮອງເອົາ ຮ່າງຂໍ້ຕົກລົງຂອງເຈົ້າແຂວງ ວ່າດ້ວຍການກຳນົດຫົວໜ່ວຍລາຄາທົດແທນຄ່າເສຍຫາຍ ໃຫ້ປະຊາຊົນທີ່ໄດ້ຮັບຜົນກະທົບຈາກໂຄງການຄຸ້ມຄອງຄວາມສ່ຽງໄພພິບັດນໍ້າຖ້ວມເທດສະບານເມືອງໄຊ,ແຂວງອຸດົມໄຊ, ຮັບຟັງການລາຍງານການຈັດຕັ້ງປະຕິບັດ ການເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2020 ຂອງສະພາປະຊາຊົນແຂວງ ອຸດົມໄຊ. ພອ້ມດຽວກັນນີ້ ຍັງໄດ້ຮັບຟັງການຊີ້ແຈງຂອງພະແນການກ່ຽວຂ້ອງ ຕາມຄໍາຊັກຖາມຂອງ ສະມາຊິກສະພາປະຊາຊົນແຂວງຕື່ມອີກ.

ໃນໂອກາດກ່າວອັດກອງປະຊຸມ ທ່ານ ບຸນລອດ ອ່ອນພະຈັນ ປະທານສະພາປະຊາຊົນແຂວງ ຍັງໄດ້ຮຽກຮ້ອງມາຍັງ ອົງການປົກຄອງແຕ່ລະຂັ້ນ, ອົງການຈັດຕັ້ງພັກ – ລັດ, ເເນວລາວສ້າງຊາດ ແລະ ອົງການຈັດຕັ້ງມະຫາຊົນ, ກໍາລັງປະກອບອາວຸດ ພະນັກງານ – ລັດຖະກອນ, ນັກທຸລະກິດ ທັງພາກລັດ ແລະ ເອກະຊົນ ແລະ ປະຊາຊົນບັນດາເຜົ່າທົ່ວແຂວງ, ຈົ່ງໄດ້ເສີມຂະຫຍາຍມູນເຊື້ອອັນດີງານຂອງແຂວງ ແລະ ບຸກບືນເຮັດສໍາເລັດໜ້າທີ່ ພ້ອມກັນປົກປັກຮັກສາ ແລະ ພັດທະນາແຂວງ ອຸດົມໄຊ ດ້ວຍຄວາມຮັບຜິດຊອບສູງ ເຮັດໃຫ້ສັງຄົມມີຄວາມສະຫງົບ, ສີວິໄລ, ເສດຖະກິດ ມີການພັດທະນາຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນເປັນກ້າວໆ ແລະ ຮຽກຮ້ອງມາຍັງປະຊາຊົນບັນດາເຜົ່າ, ບຸກຄົນ, ນິຕິບຸກຄົນ, ການຈັດຕັ້ງທຸກຂັ້ນ ຈົ່ງເພີ່ມທະວີການຕິດຕາມກວດກາບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະ ບັນດາອົງການປົກຄອງແຂວງ ໃນການປະຕິບັດໜ້າທີ່, ພາລະບົດບາດໃນການບໍລິຫານລັດ ແລະ ຮັບໃຊ້ປະຊາຊົນຢ່າງບໍລິສຸດຜຸດຜ່ອງ ເພື່ອຜົນປະໂຫຍດຂອງປະຊາຊົນ, ນໍາເອົາຜົນປະໂຫຍດທີ່ແທ້ຈິ່ງມາສູ່ ປະຊາຊົນ, ຈົ່ງເພີ່ມທະວີຄວາມສາມັກຄີ ແລະ ຮ່ວມຈິດຮ່ວມໃຈກັນ ໃນການປ້ອງກັນການແຜ່ລະບາດຂອງພະຍາດໂຄວິດ 19, ພ້ອມກັນຕ້ານ ແລະ ແກ້ໄຂບັນດາສິ່ງຫຍໍ້ທໍ້ໃນສັງຄົມໃຫ້ໝົດໄປ.

ຂ່າວ,ພາບ: ໄມພອນ

ກົດນີ້ເລີຍເພື່ອຮັບສ່ວນຫຼຸດ 50%
- Advertisement -
- Advertisement -

ເລື່ອງລາວຫຼ້າສຸດມື້ນີ້