ລົງນາມຮ່ວມມື ກ່ຽວກັບການທົດສອບ ແລະ ຕິດຕາມກວດກາຄຸນນະພາບເຕົາປະຢັດ ທີ່ ຫຼວງພະບາງ

ພະແນກວິທະຍາສາດແລະເຕັກໂນໂລຊີ ລົງນາມຮ່ວມມືກ່ຽວກັບການທົດສອບ ແລະ ຕິດຕາມກວດກາຄຸນນະພາບເຕົາປະຢັດກັບ ສພປ

ທ້າຍເດືອນ ກໍລະກົດ ຜ່ານມານີ້ ພະແນກວິທະຍາສາດແລະເຕັກໂນໂລຊີ ແຂວງຫຼວງພະບາງ ໄດ້ຮ່ວມລົງນາມເຊັນບົດບັນທຶກສັນຍາຮ່ວມມືກ່ຽວກັບການທົດສອບ ແລະ ກວດກາຄຸນນະພາບເຕົາປະຢັດ ກັບສະມາຄົມເພື່ອການສະໜັບສະໜູນ ແລະ ປັບປຸງຊົນ ນະບົດ (ສພປ) ເຊິ່ງເປັນຜູ້ຜະລິດ ແລະ ຈໍາໜ່າຍຢູ່ພາຍໃນນະຄອນຫຼວງພະບາງ.

ສໍາລັບຫ້ອງທົດສອບກວດກາຄຸນນະພາບເຕົາປະຢັດແມ່ນໄດ້ປັບປຸງນໍາໃຊ້ຫ້ອງອາຄານເກົ່າທາງຫຼັງພະແນກດັ່ງ ກ່າວລວມມູນຄ່າທັງໝົດ 45 ລ້ານກວ່າກີບ ແລະ ໄດ້ເຊັນມອບຮັບຢ່າງເປັນທາງການ.

ໂດຍ ໃຫ້ກຽດຮ່ວມລົງນາມ ເຊັນແມ່ນ ທ່ານ ວົງສະຫວັດ ໂສມມະລັດ ຮອງຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງຫຼວງພະບາງ ກັບ ທ່ານ ອໍາພອນ ສຸວັນນະລາດ ຜູ້ອໍານວຍການສະມາຄົມເພື່ອການສະໜັບສະໜູນ ແລະ ປັບປຸງຊົນນະບົດ (ສພປ) ມີບັນດາຕາງໜ້າຈາກພະແນກການທີ່ກ່ຽວ ຂ້ອງ,ພະນັກງງານວິຊາການຂອງ ສພປ ພ້ອມດ້ວຍພະນັກງານພະແນກວິທະຍາສາດ ແລະ ເຕັກໂນໂລຊີເຂົ້າຮ່ວມ ເປັນສັກຂີພະຍານ.