ໃນວັນທີ 14/08/2020 ທີວັດຊຽງທອງ ນະຄອນຫລວງພຣະບາງ ເຖົ້າແກ່ແນວໂຮມ ຜູ້ຊົງຄຸນນະວຸດ ໄດ້ເຕົ້າໂຮມກັນນຳເອົາເຮືອຊ່ວງທີຊື່ວ່າ ນາງບົວຄຳ ອອກມາສູ່ຂວັນ ສົມມາ-ບາສີ ລ້ຽງເຂົ້າລ້ຽງຂວັນ ແລະຄົບງັນໃນຄືນວັນທີ່ 14 ສິງຫາ 2020

ວັນທີ 15/08/2020 ໄດ້ມີການແຫ່ແຫນນຳເອົາເຮືອຊ່ວງລົງນ້ຳທີທ່າຫລວງ ເພື່ອໄປປະຕິບັດຫນ້າທີ່ ຮັກສາຮີດ ບໍ່ໃຫ້ຫມອງ ຄອງບໍ່ໃຫ້ເສົາ ເພາະບຸນຊ່ວງເຮືອ-ບຸນເຂົ້າປະດັບດິນທີຈະມີຂຶ້ນວັນທີ 18/08/2020

ໂຮດເວັບໄຊທີ່ຖືກ ແລະ ດີທີ່ສຸດໃນໂລກ

ປີນີ້ ທາງນະຄອນຫລວງພຣະບາງ ເພີ່ນຈະບໍ່ມີການຈັດບຸນຊ່ວງເຮືອຢ່າງເປັນທາງການ ເພາະເນື່ອງຈາກມີການແຜ່ລະບາດຂອງໂຣຄໂຄວິດ-19 ແຕ່ເພີ່ນກໍ່ຈັດເພື່ອເປັນພິທີກັມ ໂດຍໃຫ້ບັນດາວັດ ບັນດາບ້ານ ເຊິ່ງມີເຮືອຊ່ວງໃຫ້ເປັນຕົວແທນ 4 ເຫລັ້ມ ລົງນ້ຳໄປຊ່ວງ ໄປເຮັດພິທີບູຊາຫນ້ານ້ຳ ບູຊາແມ່ຄົງຄາ ບູຊາພະຍານາກ ຕາມຈຸດຕ່າງໆ ເຊັ່ນປະກອບດ້ວຍ :

  • ເຮືອຊ່ວງຊຽງທອງ = ອ້າຍຕົງກວ້າງຂວາງຢູ່ປາກຄານ
  • ປ່າຂາມ(ວັດໃຫມ່) = ສຼີສັຕຕະນາຄເຈົ້າເຝົ້າຢູ່ຈອມສີຼ
  • ສັງຄະໂລກ = ອູສຸພຣະນາຄເຈົ້າເຝົ້າຢູ່ສົບດົງ
  • ຫາດຮ່ຽນ = ອ້າຍຄຳປັງຢູ່ພູຊ້າງ
    ແລະເຮືອ ນາງດຳ-ນາງດ່ອນ (ວັດຊຽງແມນ) ເຂົ້າຮ່ວມເຮັດພິທີຊ່ວງໃນປີນີ້

ມື້ນີ້ພາຍໃນວັດຊຽງທອງ ນອກຈາກເຮືອຊ່ວງຊື່ວ່ານາງບົວຄຳ ທີຈະໄດ້ນຳລົງນ້ຳແລ້ວ ພິທີຄົບງັນນີ້ເພີ່ນກໍ່ໄດ້ເຮັດພິທີສູ່ຂວັນ ມັດຂວັນໃຫ້ເຮືອຊ່ວງທີ່ຊື່ວ່າ ນາງບົວລອຍ ແລະທ້າວຄຳອານ ນຳອີກດ້ວຍ, ສ່ວນສີພາຍ ແມ່ນຈະມີສີພາຍຊາວຫນຸ່ມໃນບ້ານຊຽງທອງ-ຄີລີ ແລະຈາກບ້ານຕ່າງໆທີມີໃຈມັກຮັກ ເລື່ອງເຮືອຊ່ວງມາພາຍນຳ ເພື່ອຮັກສາໄວ້ເຊິ່ງມໍຣະດົກຕົກທອດແຫ່ງວິຖີຊີວິດຂອງເມືອງມໍຣະດົກໂລກແຫ່ງນີ້.

  • ຂໍ້ສະເໜີ : ປີນີ້ເຮືອຊ່ວງແມ່ນຊ່ວງເອົາຮີດເອົາຄອງ ບໍ່ແມ່ນແມ່ນຊ່ວງເພື່ອໄຊຊະນະ ດັ່ງນັ້ນຂໍໃຫ້ເຮືອທັງ 4 ເຫລັ້ມນີ້ ຖືວິກິດເປັນໂອກາດ ໂດຍການເຮັດພິທີຍ້ອນຍຸກທີເຄີຍຮຸ່ງເຮືອງຂອງເຮືອຊ່ວງຫລວງພຣະບາງໂດຍແທ້ ນັ້ນກໍ່ຄື : ມີການຫຍົ້ມຫົວ ຄັດທ້າຍເຮືອ ,ທັ້ງທ້າຍເຮືອ , ຮ້ອງສຽງ ( ເອີກຮາວໆໆໆ ໃນເວລາພາຍ ແບບດັ່ງເດີມ ໃຫ້ດັງກ້ອງຕາມລຳນ້ຳຄານ ) ໃຫ້ມີການເຊິ້ງຂອງສີພາຍ ໃຫ້ມີຝາງຫາດຕີ ຫມາກຫວີດ ມີເຄື່ອງເສບງົບງັນໃນເຮືອ ໃຫ້ມີນາງເຮືອນັ່ງ ໃຫ້ສະຫລັບຄູ່ຊ່ວງລົງມາຫລາຍໆຖ້ຽວ ໄດ້ບໍ່ ?…

ຂອບໃຈຮູບພາບຈາກ : Sitthiphon Khensoulintha.
ນຳສະເໜີໂດຍ : ນະຄອນຫລວງພຣະບາງ Laungprabang City.

.

.

LEAVE A REPLY

Please enter your comment!
Please enter your name here