26.1 C
Laos
Tuesday, October 26, 2021

ເມືອງແກ່ນທ້າວ ປະກາດບ້ານວັງປາ ເປັນບ້ານແບບຢ່າງປະຕິບັດກົດໝາຍ

ຂ່າວເດັ່ນອາທິດນີ້

ແຫລ່ງຂ່າວຈາກເມືອງແກ່ນທ້າວ ໃຫ້ຮູ້ວ່າ: ເມື່ອບໍ່ດົນມານີ້, ເມືອງແກ່ນທ້າວ ແຂວງໄຊຍະບູລີ ໄດ້ຈັດພິທີ ປະກາດ ບ້ານວັງປາ ເປັນບ້ານແບບຢ່າງປະຕິບັດກົດໝາຍ ໂດຍການມອບໃບຢັ້ງຢືນຂອງ ທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ, ມີທ່ານ ບຸນສົງ ລາດຊະວົງ ປະທານກວດການພັກເມືອງ ແລະ ພາກສ່ວນກ່ຽວຂ້ອງ ເຂົ້າຮ່ວມ.

Image may contain: 8 people, people standing, flower and outdoor

ໃນພິທີ ທ່ານ ນາງ ຈັນທອງ ສາລິວັນ ນາຍບ້ານວັງປາ ໄດ້ໃຫ້ຮູ້ວ່າ: ການສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍ ແມ່ນແນໃສ່ສຶກສາອົບຮົມໃຫ້ຄອບຄົວ ແລະ ປະຊາຊົນພາຍໃນບ້ານຮັບຮູ້, ເຂົ້າໃຈລັດຖະທໍາມະນູນ ແລະ ກົດໝາຍ ຢ່າງຖືກຕ້ອງເລິກເຊິ່ງ ມີສະຕິຕື່ນຕົວເຄົາລົບລະບຽບກົດໝາຍນັບມື້ນັບເຂັ້ມງວດ, ເສີມຂະຫຍາຍມູນເຊື້ອສາມັກຄີປອງດອງພາຍໃນຄອບຄົວ, ພາຍໃນບ້ານໃຫ້ໜັກແໜ້ນ, ສະກັດກັ້ນ ແລະ ຕີຖອຍທຸກປະກົດການຫຍໍ້ທໍ້ ທີ່ລະເມີດລະບຽບກົດໝາຍ.

Image may contain: 3 people, people standing

ບ້ານວັງປາ ມີພົນລະເມືອງ 1.900 ກວ່າຄົນ, ຍິງ 900 ກວ່າຄົນ, ມີ 390 ກວ່າຄອບຄົວ, ຜ່ານກວດກາ ແລະ ປະເມີນຄອບຄົວແບບຢ່າງປະຕິບັດກົດໝາຍ ຕາມ 5 ມາດຖານ ຈໍານວນ 394 ຄອບຄົວ ປະຕິບັດໄດ້ 393 ຄອບຄົວ ເທົ່າກັບ 99,7% ແລະ ຜ່ານການປະເມີນບ້ານແບບຢ່າງປະຕິບັດກົດໝາຍຕາມ 6 ມາດຖານສາມາດປະຕິບັດໄດ້ຕາມຂໍ້ຕົກລົງຂອງລັດຖະຕີກະຊວງຍຸຕິທໍາວາງອອກ.

Image may contain: 9 people, people standing, flower, wedding and outdoor

ໂອກາດນີ້, ທ່ານ ອໍາຄາ ລັດສະໝີ ກໍໄດ້ເນັ້ນວ່າ: ພາຍຫລັງສໍາເລັດການສ້າງເປັນບ້ານແບບຢ່າງປະຕິບັດກົດໝາຍແລ້ວ, ອໍານາດການປົກຄອງບ້ານ ແລະ ພໍ່ແມ່ປະຊາຊົນ ຈົ່ງນໍາເອົາເນື້ອໃນຈິດໃຈຄັ້ງນີ້ ໄປຈັດຕັ້ງຜັນຂະຫຍາຍ ເພື່ອຮັກສາມູນເຊື້ອ ເຮັດໃຫ້ບ້ານ ກາຍເປັນບ້ານແບບຢ່າງປະຕິບັດກົດໝາຍຕະຫລອດໄປ, ສ່ວນຫ້ອງການຍຸຕິທໍາເມືອງ ກໍຕ້ອງໄດ້ເອົາໃຈໃສ່ຕໍ່ວຽກງານຍຸຕິທໍາຮາກຖານ, ປັບປຸງຄະນະໜ່ວຍໄກ່ເກ່ຍຂັ້ນບ້ານ ສືບຕໍ່ເຄື່ອນໄຫວລົງໂຄສະນາເຜີຍກົດໝາຍຕ່າງໆ ໃຫ້ປະຊາຊົນແຕ່ລະບ້ານ ເປັນລະບົບຕໍ່ເນື່ອງ ແລະ ທົ່ວເຖິງ, ອົງການປົກຄອງບ້ານ ຕ້ອງໄດ້ນໍາພາປະຊາຊົນ ເຂົ້າຮ່ວມໃນການປະຕິບັດວຽກງານຍຸຕິທໍາຮາກຖານຢ່າງພ້ອມພຽງ ທຸກຄົນມີສ່ວນຮ່ວມໃນວຽກດັ່ງກ່າວຢ່າງແທ້ຈິງ.


ຂ່າວ: ຖວທ ເມືອງແກ່ນທ້າວ

- Advertisement -
- Advertisement -

ເລື່ອງລາວຫຼ້າສຸດມື້ນີ້