ວັນທີ່ 13 ສິງຫາ 2020 ກະຊວງ ສສກ ໄດ້ພິທີລົງນາມຮັບທຶນຊ່ວຍເຫຼືອລ້າຈໍານວນ 7,000,000 ໂດລາສະຫະລັດ ເພື່ອນໍ້າໃຊ້ເຂົ້າໃນໂຄງການຕອບໂຕ້ພະຍາດອັກເສບປອດຈາກເຊື້ອຈຸລະໂລກສາຍພັນໃໝ່-19 (COVID-19) ຂອງຂະແໜງການສຶກສາ ແລະ ກິລາ ລະຫວ່າງ ກະຊວງສຶກສາທິການ ແລະ ກິລາ ແລະ ອົງການອຸຍນີເຊບ ປະຈຳ ສປປ ລາວ
ອີງຕາມ ຂໍ້ຕົກລົງລັດຖະມົນຕີກະຊວງ ສສກ ວ່າດ້ວຍການແຕ່ງຕັ້ງຄະນະຊີ້ນຳ ແລະ ຮັບຜິດຊອບໂຄງການຕອບໂຕ້ພະຍາດອັກເສບປອດຈາກເຊື້ອຈຸລະໂລກສາຍພັນໃໝ່-19 (COVID-19) ຂອງຂະແໜງການສຶກສາ ແລະ ກິລາ ລະຫວ່າງ ກະຊວງສຶກສາທິການ ແລະ ກິລາ
ທຶນດັ່ງກ່າວແມ່ນໄດ້ຮັບການສະໜັບສະໜູນຈາກກອງທຶນຮ່ວມມືສາກົນເພື່ອການສຶກສາ(Global Partnership for Education) ເຊິ່ງເປົ້າໝາຍ ແລະ ຈຸດປະສົງຫຼັກຂອງໂຄງການດັ່ງກ່າວ:
1) ເພື່ອສະໜັບສະໜູນຜູ້ຮຽນ, ຄູ, ອຳນວຍການ, ຜູ້ດູແລເດັກ/ພໍ່ແມ່, ຊຸມຊົນ ໃນການປ້ອງກັນການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ໃຫ້ສອດຄ່ອງກັບການແນະນຳຂອງ ກະຊວງສາທາ ລະນະສຸກ;
2) ຮັບປະກັນການສຶບຕໍ່ການຮຽນຮູ້ ໂດຍຜ່ານການຈັດຕັ້ງປະຕິບັດຮູບແບບການຮຽນຕ່າງໆ ໂດຍມີຈຸດປະສົງເພື່ອປັບປຸງຄຸນນະພາບການຮຽນຮູ້ ແລະ ຄຸນນະພາບຊີວິດຂອງຜູ້ຮຽນ, ຄູ, ຜູ້ດູແລເດັກ/ພໍ່ແມ່ ແລະ ຊຸມຊົນ ໂດຍຖືສຳຄັນຄວາມສະເໝີພາບ ແລະ ການຮວມສູນ;
3) ໃຫ້ການສະໜັບສະໜູນການກັບຄືນມາຮຽນທີ່ມີຄວາມປອດໄພ ແລະ ລວມສູນ ໃຫ້ ໂຮງຮຽນ/ສະຖາບັນການສືກສາສຳລັບຜູ້ຮຽນ, ຄູ, ຜູ້ດູແລເດັກ/ພໍ່ແມ່ ແລະ ຊຸມຊົນ;
4) ຮັບປະກັນການຕອບໂຕ້ພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ລະຫວ່າງການປະສານງານລະ ຫວ່າງລັດຖະບານ ແລະ ຄູ່ຮ່ວມພັດທະນາ ແລະ ພ້ອມທັງມາດຕະການຄວບຄຸມສຳລັບຂະແໜງການສຶກສາ ໂດຍມີການປະສານງານກັບຂະແໜງການອື່ນໆ;
ໃຫ້ເປັນກຽດເຂົ້າຮ່ວມໃນພິທີ ທີ່ມີຄວາມຄວາມສຳຄັນມື້ນີ້ມີ:
- ທ່ານ ຮສ. ປອ. ພຸດ ສິມມະລາວົງ, ຮອງລັດຖະມົນຕີ ກະຊວງສຶກສາທິການ ແລະ ກິລາ,
- ປອ. ນາງ ເປ່ຍ ບຣິໂຕ(Dr. Pia Britto) ຜູ້ຕາງໜ້າອົງການຢູນິເຊັບ ປະຈຳ ສປປ ລາວ
- ບັນດາທ່ານ ຜູ້ຕາງໜ້າຈາກສະຖານທູດອົດສະຕາລີ, ສະຫະພາບເອີຣົບ ແລະ ອົງການຊ່ວຍເຫຼືອເດັກສາກົນ ປະຈຳ ສປປ ລາວ
- ບັນດາທ່ານ ຫົວໜ້າຫ້ອງການ ກຊ ສສກ, ຫົວໜ້າກົມ-ຮອງກົມ, ຜູ້ຕາງໜ້າກະຊວງແຜນການ ແລະ ການລົງທຶນ, ຜູ້ຕາງໜ້າກະຊວງການເງິນ, ຄູ່ຮ່ວມພັດທະນາ, ຫົວໜ້າພະແນກ ແລະ ຮອງພະແນກ ແລະ ວິຊາການ ທີ່ກ່ຽວຂ້ອງ ແລະ ບັນດາບັນສື່ມວນຊົນຕ່າງໆ ກໍ່ໄດ້ໃຫ້ກຽດເຂົ້າຮ່ວມ.
ພາບແລະຂ່າວ: ຫຸມພັນ ແກ້ວອຸ່ນຄໍາ
