ປະຊາຊົນບ້ານຫ້ວຍຫວາຍ ເມືອງ ບຸນໃຕ້ ແຂວງຜົ້ງສາລີ ສ້າງຖະໜົນເອງ ເພື່ອໃຊ້ເດີນທາງໄປມາ ລະຫວ່າງບ້ານ ແລະ ເຂດທຳການຜະລິດ
ການເຂົ້າເຖິງແຫຼ່ງທຳການຜະລິດແມ່ນມີຄວາມສຳຄັນຫຼາຍຂອງຄົນໃນເຂດຊົນນະບົດຫຼ່າງໄກສອກຫຼີກ, ເມື່ອກ່ອນ ປະຊາຊົນໃນເຂດບ້ານ ຫ້ວຍຫວາຍ, ເມືອງ ບຸນໃຕ້, ແຂວງຜົ້ງສາລີຕ້ອງໃຊ້ເວລາຍ່າງປະມານ 2-3 ຊົ່ວໂມງໃນການເຂົ້າໄປເຖິງເຂດທຳການຜະລິດ ແຕ່ປັດຈຸບັນນີ້ພວກເຂົາໃຊ້ເວລາພຽງ 15ນາທີ ກໍ່ສາມາດໄປເຖິງ ໄຮ່ນາຮົ້ວສວນຂອງພວກເຂົາແລ້ວ ດ້ວຍລົດຈັກ ແລະ ລົດຕ໊ອກໆ (ລົດໄຖນາ).
ເສັ້ນທາງປະມານ 3 ກິໂລແມັດ ຈາກຊຸມຊົນຫາເຂດທຳການຜະລິດໄດ້ຖືກບຸກເບີກ ແລະ ສ້າງຂຶ້ນໂດຍຊາວບ້ານເອງ, ເຊິ່ງພວກເຂົາຈະໄດ້ຮັບຄ່າຕອບແທນເປັນປະເພດອາຫານ ທີ່ສະໜັບສະໜູນໂດຍ ກະຊວງສະຖານະການສຸກເສີນ ແຫ່ງປະເທດຣັດເຊຍ ຜ່ານກິດຈະກຳ ການສ້າງຊັບສິນຊຸມຊົນທີ່ຈັດຕັ້ງປະຕິບັດໂດຍອົງການອາຫານໂລກ.
ກິດຈະກຳດັ່ງກ່າວຊ່ວຍຕອບສະໜອງໃຫ້ຊາວບ້ານເຂົ້າເຖິງແຫຼ່ງອາຫານໄດ້ທັນທີ ແລະ ຊ່ວຍໃຫ້ຜົນຜະລິດທາງກະສິກຳ, ລວມເຖິງຊີວິດຂອງພວກເຂົາດີຂຶ້ນໃນໄລຍະຍາວ
ທີ່ມາ: WFP
