ກອງປະຊຸມທົບທວນການຈັດຕັ້ງປະຕິບັດວຽກງານໃຫ້ວັກຊີນກັນພະຍາດ 6 ເດືອນຕົ້ນປີ 2020 ຈັດຂຶ້ນລະຫວ່າງວັນທີ 12-14 ສິງຫາ 2020 ທີ່ເມືອງວັງວຽງ, ແຂວງວຽງຈັນ, ເປັນກຽດເປັນປະທານໂດຍທ່ານ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ແລະ ຕາງໜ້າຈາກສາທາລະນະສຸກ 18 ແຂວງທົ່ວປະເທດ.
ທ່ານ ພູທອນ ເມືອງປາກ ກ່າວວ່າ: ວຽກງານປ້ອງກັນ ແລະ ສົ່ງເສີມສຸຂະພາບໃຫ້ແກ່ແມ່ຍິງ ແລະ ເດັກນ້ອຍ ເປັນບູລິມະສິດຂອງຂະແໜງສາທາລະນະສຸກ, 10 ປີຜ່ານມາ ສາມາດຍາດໄດ້ຜົນສໍາເລັດຫລາຍດ້ານ ທີ່ບັນລຸຄາດໝາຍຕາມແຜນການ ໂດຍສະເພາະ ການເພີ້ມຂຶ້ນຂອງອັດຕາການໃຫ້ວັກຊີນກັນພະຍາດ Penta3 ຈາກປີ 2010 ທີ່ບັນລຸໄດ້ 74% ມາເປັນ 93% ໃນປີ 2019. ຄຽງຄູ່ກັບຜົນງານທີ່ຍາດມາໄດ້ ກໍຍັງມີສິ່ງທ້າທາຍ ແລະ ຂໍ້ຫຍຸ້ງຍາກ ໃນການຈັດຕັ້ງປະຕິບັດວຽກງານ ເຊິ່ງປີນີ້ປະເທດເຮົາໄດ້ຮັບຜົນ ກະທົບຈາກການລະບາດຂອງພະຍາດໂຄວິດ-19 ຄືກັບບັນດາປະເທດໃນທົ່ວໂລກ ສົ່ງຜົນໃຫ້ມີການຈໍາກັດການເຄື່ອນທີ່ ໄປມາຫາສູ່ກັນໄລຍະໜຶ່ງ ແລະ ຕ້ອງໄດ້ປັບປ່ຽນວິທີການດໍາລົງຊີວິດ ໃຫ້ມີຄວາມລະມັດລະວັງຫລາຍຂຶ້ນ.
ເຖິງຢ່າງໃດກໍ່ຕາມ ຫລາຍແຂວງ, ຫລາຍເມືອງ ແລະ ໂຮງໝໍນ້ອຍຫລາຍແຫ່ງກໍໄດ້ສືບຕໍ່ຈັດຕັ້ງປະຕິບັດ ການໃຫ້ວັກຊີນກັນພະຍາດແກ່ແມ່ຍິງ ແລະ ເດັກນ້ອຍ ຢ່າງເປັນປົກກະຕິ ແຕ່ຍັງເຮັດບໍ່ໄດ້ດີເທົ່າທີ່ຄວນ ຕໍ່ບັນຫາດັ່ງກ່າວ ຈຶ່ງເຫັນວ່າຍັງມີ 15 ແຂວງ ທີ່ຍັງບໍ່ບັນລຸຄາດໝາຍທີ່ຕັ້ງໄວ້ ແລະ ມີໂອກາດທີ່ຈະເຮັດໃຫ້ເດັກນ້ອຍ ມີການເຈັບເປັນຍ້ອນພະຍາດ ທີ່ສາມາດກັນໄດ້ດ້ວຍວັກຊີນນີ້ສູງ.
ວຽກງານໃຫ້ວັກຊີນກັນພະຍາດ ເປັນວຽກງານໜຶ່ງທີ່ຊ່ວຍຫລຸດຜ່ອນອັດຕາ ການເຈັບເປັນ ແລະ ການຕາຍຂອງແມ່ ແລະ ເດັກ ຈາກພະຍາດທີ່ສາມາດກັນໄດ້ດ້ວຍວັກຊິນ, ເພື່ອບັນລຸອັດຕາການໃຫ້ວັກຊິນ ກັນພະຍາດທີ່ໄດ້ກຳນົດໄວ້ ຄື: ເດັກທີ່ໄດ້ສັກຢາຄົບກ່ອນ 1 ປີ ຢ່າງໜ້ອຍ 95% ໃນແຕ່ລະເມືອງ, ເພື່ອຮັກສາສະພາບບໍ່ໃຫ້ມີພະຍາດໂປລິໂອ ພາຍໃນປະເທດ ໃຫ້ໄດ້ຈົນກວ່າຈະມີການຢັ້ງຢືນລຶບລ້າງພະຍາດໂປລິໂອໃນທົ່ວໂລກ ແລະ ເພື່ອຄວບຄຸມການລະບາດ ຂອງພະຍາດໝາກແດງໃຫຍ່, ໝາກແດງນ້ອຍ.
