ປັດຈຸບັນ, ບັນຫາຢາເສບຕິດ ໄດ້ແຜ່ລາມແຕ່ຕົວເມືອງ ໄປສູ່ຊົນນະບົດໃນຫຼາຍລະດັບທີ່ແຕກຕ່າງກັນ ໂດຍກຸ່ມຄົນບໍ່ດີທີ່ລັກລອບຄ້າຂາຍ. ເຊິ່ງພວກເຂົາໄດ້ພະຍາຍາມຊອກຫາທຸກວິທີທາງເພື່ອເຄື່ອນໄຫວລັກລອບ, ລໍາລຽງຂົນສົ່ງຢາເສບຕິດ ແລະ ສານເຄມີຈາກປະເທດໃກ້ຄຽງຜ່ານ ສປປ ລາວ ໄປຍັງປະເທດທີ່ 3 ໂດຍອາໄສຈຸດພິເສດທີ່ຕັ້ງພູມສັນຖານຢູ່ໃນແຕ່ລະທ້ອງຖິ່ນດ້ວຍຫຼາຍຮູບແບບວິທີການ. ເຊິ່ງໃນໄລຍະ 5 ປີ ຜ່ານມາສາມາດມ້າງຄະດີຢາເສບຕິດ ໄດ້ 13.735 ເລື່ອງ,ຈັບຜູ້ຖືກຫາໄດ້ 20.221 ຄົນ ຢຶດຢາເສບຕິດປະເພດຕ່າງໆໄດ້ຫຼາຍໂຕນ.
ບັນຫາຢາເສບຕິດໄດ້ແຜ່ລາມແຕ່ຕົວເມືອງໄປສູ່ຊົນນະບົດໃນຫຼາຍລະດັບທີ່ແຕກຕ່າງກັນໂດຍກຸ່ມຄົນບໍ່ດີທີ່ລັກລອບຄ້າຂາຍ, ລໍາລຽງຂົນສົ່ງຢາເສບຕິດໄປທົ່ວທຸກຫົນແຫ່ງ. ສ່ວນຫຼາຍເປັນກຸ່ມແກ້ງອາຊະຍາກໍາທີ່ມີທັງຄົນລາວ ແລະ ຄົນຕ່າງປະເທດເຂົ້າຮ່ວມຂະບວນການ; ເຊິ່ງພວກເຂົາໄດ້ພະຍາຍາມຊອກຫາທຸກວິທີທາງ ເພື່ອເຄື່ອນໄຫວລັກລອບ, ລໍາລຽງຂົນສົ່ງຢາເສບຕິດ ແລະ ສານເຄມີຈາກປະເທດໃກ້ຄຽງຜ່ານ ສປປ ລາວ ໄປຍັງປະເທດທີ່ 3 ໂດຍອາໄສຈຸດພິເສດທີ່ຕັ້ງພູມສັນຖານຢູ່ໃນແຕ່ລະທ້ອງຖິ່ນດ້ວຍຫຼາຍຮູບແບບວິທີການ.
ພົຈວ ຄຳກິ່ງ ຜຸຍຫຼ້າມະນີວົງ ຫົວໜ້າກົມໃຫຍ່ຕໍາຫຼວດ ກະຊວງ ປກສ ກ່າວວ່າ: ໃນ 5 ປີຜ່ານມາ, ເຈົ້າໜ້າທີ່ປ້ອງກັນຄວາມສະຫງົບ ໄດ້ເອົາໃຈໃສ່ປະຕິບັດມາດຕະການດ້ານກົດໝາຍໃນການສະກັດກັ້ນ ແລະ ຕ້ານຢາເສບ ຕິດຢ່າງມີຄວາມຕັ້ງໜ້າ; ໃນໄລຍະປີ 2015-2019 ທົ່ວປະເທດສາມາດມ້າງຄະດີຢາເສບຕິດ ໄດ້ 13.735 ເລື່ອງ,ຈັບຜູ້ຖືກຫາໄດ້ 20.221 ຄົນ ຍິງ 2.714 ຄົນ, ເປັນຄົນຕ່າງປະເທດ 403 ຄົນ, ສາມາດຢຶດຢາເສບຕິດປະເພດຢາເຮໂຣອິນໄດ້ 943,94 ກິໂລກຼາມ, ກັນຊາ 10.653,53 ກິໂລກຼາມ, ຢາບ້າ 6.867,29 ກິໂລກຼາມ, ຢາໄອສ໌ 8.757,43 ກິໂລກຼາມ, ຢາຝິ່ນ 577,25 ກິໂລກຼາມ, ແປ້ງຝຸ່ນປະສົມຢາເສບຕິດ 21.645,74 ກິໂລກຼາມ ແລະ ສານອື່ນໆອີກຈໍານວນໜຶ່ງ; ເຖິງແມ່ນວ່າເຈົ້າໜ້າທີ່ຈະເອົາໃຈໃສ່ສະກັດກັ້ນ ແລະ ແກ້ໄຂບັນຫາຢາເສບຕິດໄດ້ຢ່າງຕໍ່ເນື່ອງກໍຕາມ. ແຕ່ບັນຫາຢາເສບຕິດກໍບໍ່ມີທ່ວງທ່າທີວ່າຈະຫຼຸດລົງ.
ຈາກສະພາບການຄວາມເປັນຈິງ ແລະ ພາວະວິໄສດັ່ງກ່າວນັ້ນ ກະຊວງ ປກສ ໄດ້ສ້າງແຜນຍຸດທະສາດການຄວບຄຸມ, ສະກັດກັ້ນ ແລະ ຕ້ານຢາເສບຕິດຢູ່ ສປປ ລາວ ແຕ່ປີ 2020-2025 ວິໄສທັດຮອດ ປີ 2030 ຂຶ້ນມາເພື່ອປົກປັກຮັກສາຄວາມໝັ້ນຄົງຂອງຊາດ, ສະຖຽນລະພາບທາງດ້ານການເມືອງ, ຄວາມເປັນລະບຽບຮຽບຮ້ອຍ-ຄວາມປອດໄພ ແລະ ເຮັດໃຫ້ສັງຄົມລາວ ປອດຢາເສບຕິດ.
