ທ້າວ ລີທໍ່ ອາຍຸ 28 ປີ, ຢູ່ບ້ານຫ້ວຍຊໍາອໍ້ເມືອງ ແລະ ແຂວງໄຊຍະບູລີ ຖືກເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງໄຊຍະບູລີ ກັກຕົວໃນວັນທີ 21 ກໍລະກົດ ທີ່ຜ່ານມາ, ໃນຂໍ້ຫາຄ້າຂາຍຢາເສບຕິດພ້ອມທັງຢຶດຂອງກາງຢາບ້າໄດ້ 1.118 ເມັດມາສອບສວນ.
ກ່ອນການກັກຕົວທ້າວ ລີ ທໍ່, ເຈົ້າໜ້າທີ່ໄດ້ຮັບການລາຍງານຈາກພົນລະເມືອງດີວ່າ: ພົບເຫັນຄົນຮ້າຍເຄື່ອນໄຫວຄ້າຂາຍຢາເສບຕິດຢູ່ເຂດບ້ານຫ້ວຍຊໍາອໍ້ເມືອງໄຊຍະບູລີ.
ຜ່ານການລົງກວດກາ ແລະ ຕິດຕາມສະພາບຕົວຈິງຂອງເຈົ້າໜ້າທີ່ວິຊາສະເພາະ; ຮອດເວລາປະມານ 15:00 ໂມງ ຂອງວັນທີ 21 ກໍ ລະກົດ 2020, ໄດ້ພົບເຫັນເປົ້າໜາຍຄື: ທ້າວ ລີທໍ່ ກຳລັງເຄື່ອນໄຫວນຳຢາບ້າໄປຂາຍໃຫ້ກັບຜູ້ສັ່ງຊື້ຈຶ່ງເຂົ້າກັກຕົວ ແລະ ກວດຄົ້ນພົບຂອງກາງຢາບ້າ 1.118 ເມັດ, ຖົງຢ່າງເປົ່າໃສ່ຢາບ້າ 53 ຖົງ, ອຸປະກອບເສບຢາບ້າ 4 ອັນ, ອຸປະກອນເສບຢາຝີ່ນ 1 ອັນ, ເງິນກີບ 2.000.000 ກີບ ແລະ ໂທລະສັບມືຖື 1 ໜ່ວຍ.
ນອກນີ້ ເຈົ້າໜ້າທີ່ຍັງສາມາດກັກຕົວຜູ້ມົ້ວສຸມຢາເສບຕິດໄດ້ 1 ຄົນຊື່: ທ້າວ ຊົງທໍ່ ອາຍຸ 28 ປີ, ເຊິ່ງເປັນຄົນບ້ານດຽວກັນກັບ ທ້າວ ລີທໍ່ ໄປດໍາເນີນການສອບສວນຂະຫຍາຍຜົນຫາພັກພວກ ເພື່ອຕິດຕາມກັກຕົວມາຄະດີຕາມກົດໝາຍໃຫ້ໝົດ.
