ໂຄງການກໍ່ສ້າງຊົນລະປະທານ 2 ແຫ່ງຄື: ຊົນລະປະທານ ຫ້ວຍຕະລາງ ບ້ານນາຈອນ ແລະ ຊົນລະປະທານ ຫ້ວຍຕະລາງ ບ້ານ ພຽງແງ, ເມືອງ ສົບເບົາ ແຂວງຫົວພັນແມ່ນໄດ້ເລີ່ມລົງມືກໍ່ສ້າງມາແຕ່ຕົ້ນປີ 2020, ຄາດວ່າທັງສອງໂຄງການຈະໃຫ້ສຳເລັດ ແລະ ເປີດນຳໃຊ້ໃນຕົ້ນປີ 2021.
ສໍາລັບ ການກໍ່ສ້າງຊົນລະປະທານ ຫ້ວຍຕະລາງ ບ້ານນາຈອນ ແມ່ນເລີ່ມກໍ່ສ້າງແຕ່ເດືອນມີນາ 2020, ປະຈຸບັນ ແມ່ນສຳເລັດແລ້ວ 76 % ຂອງບັນດາໜ້າວຽກ, ໂຄງການນີ້ ປະກອບມີລະບົບຫົວງານເປັນຝາຍນ້ຳລົ້ນ, ໜ້າຝາຍກວ້າງ 25 ແມັດ, ສູງ 1,5 ແມັດ, ມີລວງຍາວຕາມແລວນໍ້າ 16 ແມັດ ແລະ ມີປະຕູນໍ້າລະບາຍທັງ 2 ຟາກ, ລະບົບຄອງເໝືອງເປັນຄອງເບຕົງເສີມເຫຼັກ, ມີຄວາມຍາວ 3. 200 ແມັດ, ສາມາດຫົດເນື້ອທີ່ນາໄດ້ 12,5 ເຮັກຕາ, ຊຶ່ງໂຄງການດັ່ງກາ່ວ ແມ່ນການລົງທືນຂອງລັດຖະບານ 100% ເພື່ອພັດທະນາດ້ານພື້ນຖານໂຄງລ່າງໃນການຜະລິດກະສິກຳ, ລວມມູນຄ່າການກໍ່ສ້າງ 8 ຕື້ກ່ວາກີບ, ໂດຍແມ່ນບໍລິສັດ ບຸນທະວີຊັບ ພັດທະນາກໍ່ສ້າງ ຄົບວົງຈອນ ຈຳກັດຜູ້ດຽວ ເປັນຜູ້ຮັບເໝົາກໍ່ສ້າງ.
ພ້ອມນັ້ນ ການກໍ່ສ້າງຊົນລະປະທານ ຫ້ວຍຕະລາງ ບ້ານ ພຽງແງ ແມ່ນເລີ່ມກໍ່ສ້າງມາແຕ່ເດືອນ ກຸມພາ 2020, ປະຈຸບັນ ສໍາເລັດແລ້ວ 58 % ຂອງໜ້າວຽກທັງໝົດ, ໂຄງການນີ້ປະກອບມີ ລະບົບຫົວງານເປັນຝາຍນ້ຳລົ້ນ ກ້ວາງ 35 ແມັດ, ສູງ 1,5 ແມັດ, ມີລວງຍາວຕາມແລວນໍ້າ16 ແມັດ, ມີປະຕູລະບາຍນ້ຳທັງສອງຟາກ, ລະບົບຄອງເໝືອງຍາວ 12.783 ແມັດ, ສາມາດສະໜອງນ້ຳເຂົ້າໃສ່ເນື້ອທີ່ນາໄດ້ 2 ລະດູ ໃນເນື້ອທີ່ ທັງໝົດ 128 ເຮັກຕາ, ຊຶ່ງແມ່ນໂຄງການລົງທືນຂອງລັດຖະບານ 100% ມີມູນຄ່າການກໍ່ສ້າງ 41 ຕື້ກວ່າກີບ, ໂດຍແມ່ນບໍລິສັດ ສຸກຈະເລີນກໍ່ສ້າງສ້ອມແປງຊົນລະປະທານ ເປັນຜູ້ຮັບເໝົາກໍ່ສ້າງ.
ເມື່ອບໍ່ດົນມານີ້, ພະແນກກະສິກຳ ແລະ ປ່າໄມ້ແຂວງ ສົມທົບກັບພາກສ່ວນທີ່ກ່ຽວຂ້ອງ ໄດ້ລົງກວດກາຄວາມຄືບໜ້າ ການກໍ່ສ້າງຊົນລະປະທານທັງ 2 ແຫ່ງ ນໍາໂດຍ ທ່ານ ພູວົງ ສີສົມຮັກ, ຫົວໜ້າພະແນກກະສິກຳ ແລະ ປ່າໄມ້ແຂວງ, ທ່ານ ວັນໄຊ ສຸລິວົງ ຮອງເຈົ້າເມືອງ ເມືອງສົບເບົາ.
ຂ່າວ: ວຽງຈັນທາຍ
