ໃນຕອນເຊົ້າຂອງວັນທີ 6 ສິງຫາ 2020 ນີ້, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມດ້ວຍພະແນກການອ້ອມຂ້າງແຂວງທີ່ກ່ຽວຂ້ອງໄດ້ລົງພົບປະຢ້ຽມຢາມປະຊາຊົນບ້ານ ແດນສະຫວັນ ເມືອງເຊໂປນທີ່ໄດ້ຮັບຜົນກະທົບຈາກໄຟໄໝ້ຕະຫຼາດຊາຍແດນທີ່ບ້ານແດນສະຫວັນ.
ໂດຍການຕ້ອນຮັບຂອງທ່ານ ວົງສະຫວັນ ວຽງມະນີ ເຈົ້າເມືອງເຊໂປນພ້ອມດ້ວຍ ການນຳຂອງເມືອງ, ນາຍບ້ານ ແລະ ຄອບຄົວປະຊາຊົນທີ່ໄດ້ຮັບຜົນກະທົບຢູ່ທີ່ຫ້ອງການບ້ານແດນສະຫວັນ.
ທ່ານ ຄູນພະຈັນ ສົມເພັດ ຫົວໜ້າຫ້ອງວ່າການປົກຄອງ ເມືອງເຊໂປນ ໄດ້ລາຍງານການເກັບກຳຂໍ້ມູນຂອງເຫດໄຟໄໝ້ໃນຄັ້ງນີ້ ເຊິ່ງໃຫ້ຮູ້ວ່າ: ເວລາເກີດເຫດໄຟໄໝ້ແມ່ນເລີ່ມແຕ່ເວລາ 18:45 ນາທີ ຂອງວັນທີ 27 ກໍລະກົດ2020 ແລະ ສາມາດຄວບຄຸມໄຟໄດ້ໃນເວລາ 21:30 ຂອງວັນດຽວກັນ,
ພາຍຫຼັງເກັບກຳຂໍ້ມູນຂອງແຕ່ລະພາກສ່ວນສາມາດສະຫຼຸບຜົນເສຍຫາຍ ເຮືອນ ແລະ ຮ້ານຄ້າທີໄດ້ຮັບຜົນເສຍຫາຍຈຳນວນ 73 ເຮືອນຮ້ານ, ໃນນີ້ມີເຮືອນປະຊາຊົນຈຳນວນ 17 ຫຼັງ, ມູນຄ່າເສຍ ຫາຍ 3 ຕື້ກວ່າກີບ, ຮ້ານຄົນລາວ ມີ11 ຮ້ານ, ມູນຄ່າເສຍຫາຍ 510 ລ້ານ, ຮ້ານຄົນຕ່າງປະເທດ 45 ຮ້ານມູນຄ່າ 6 ຕຶ້ກວ່າກີບ, ເຊິ່ງລວມມູນຄ່າເສຍຫາຍທັງໝົດປະມານເກືອບ 10 ຕື້ກີບ,
ນອກ ຈາກນັ້ນກໍ່ມີໃບແຈ້ງສິດນຳໃຊ້ທີ່ດິນຖືກເສຍຫາຍ 18 ຕອນ. ຈາກການສອບຖາມຜູ້ເຫັນເຫດການເບື້ອງຕົ້ນໃຫ້ຮູ້ວ່າ: ຈຸດເກີດເຫດແມ່ນຢູ່ກອງຂີ້ເຫຍື້ອໃນຈຸດໃຈກາງຂອງຕະຫຼາດແລ້ວເກີດໄຟແຜ່ລາມຢ່າງໄວວາ. ເຊິ່ງເຈົ້າໜ້າທີ່ສັນນິຖານວ່າມີ 2 ກໍລະນີ ຄື: ອາດເກີດຈາກການວາງເພີງ ຫຼືອາດເກີດຈາກອຸບັດຕິເຫດຂອງປະຊາຊົນສູບຢາແລ້ວຖິ້ມໃສ່ກອງຂີ້ເຫຍື່ອຈຶ່ງເກີດໃຫ້ມີເຫດໄຟໄໝ້.
ແຕ່ເຖິງຢ່າງໃດກໍ່ຕາມນີ້ແມ່ນການສັນນິຖານເບື້ອງຕົ້ນ ເທົ່ານັ້ນ ປະຈຸບັນນີ້ເຈົ້າໜ້າທີ່ໄດ້ ປິດກັ້ນສະຖານທີ່ດັ່ງກ່າວໄວ້ ບໍ່ໃຫ້ຄົນພາຍນອກເຂົ້າໄປ, ເພື່ອສະດວກໃນການສືບສວນສອບສວນ-ເກັບກຳຂໍ້ມູນເພື່ອ ຄົ້ນຫາຄວາມຈິງຕໍ່ໄປ
ຈາກນັ້ນ, ທ່ານ ສັນຕິພາບ ພົມວິຫານ ກໍ່ໄດ້ສະແດງຄວາມເປັນຫ່ວງເປັນໄຍຕໍ່ປະຊາຊົນທີ່ໄດ້ຮັບຜົນກະທົບໃນຄັ້ງນີ້ ໂດຍທ່ານໄດ້ເນັ້ນໜັກໃຫ້ອຳ ນາດການປົກຄອງຂອງເມືອງເລັ່ງຫາສະຖານທີ່ຄ້າຂາຍຊົ່ວຄາວໃຫ້ແກ່ພໍ່ຄ້າ-ຊາວຂາຍ ທຸກຄົນ, ຈັດສັນແຫຼ່ງທີ່ຢູ່ອາໄສຊົ່ວຄາວໃຫ້ແກ່ຜູ້ທີ່ໄດ້ຮັບຜົນກະທົບເພື່ອແກ້ໄຂບັນຫາສະເພາະໜ້າທີ່ກຳລັງປະເຊີນເນື່ອງຈາກວ່າບ້ານແດນສະຫວັນກໍ່ປຽບເໝືອນປະຕູບານກວ້າງທີ່ເປີດຮັບແຂກຈາກຕ່າງປະເທດຖ້າຫາກສະພາບການຂອງບ້ານກໍ່ຄືຂອງເມືອງບໍ່ມີຄວາມສວຍງາມແຂກຕ່າງ ປະເທດກໍ່ຈະບໍ່ເຂົ້າມາຢ້ຽມຊົມຢ່າງແນ່ນອນ.
ໂອກາດດຽວ ກັນນີ້, ການນຳຂອງແຂວງ ພ້ອມດ້ວຍພະແນກການອ້ອມ ຂ້າງແຂວງທີ່ກ່ຽວຂ້ອງກໍ່ໄດ້ ມອບເຄື່ອງຊ່ວຍເຫຼືອໃຫ້ແກ່ ປະຊາຊົນທີ່ໄດ້ຮັບຜົນກະທົບຈໍານວນ 17 ຄອບຄົວ ເຊິ່ງ ປະກອບມີ: ສັງກະສີ 810 ແຜ່ນ, ເຂົ້າ 50 ກິໂລ, ຕະປູ 235 ກິໂລ, ເຄື່ອງໃຊ້ຄົວເຮືອນ 17 ຊຸດ, ເກີບຄອບຄົວລະ 2 ຄູ່, ປາກະປ໋ອງ 4 ແກັດ, ນຳ້ດື່ມ 30 ແພັກ ແລະອື່ນໆ.
ຂ່າວ: ສະຫວັນພັດທະນາ
