ຫຼົງຍິງໝູ່ຄິດວ່າເປັນໝູປ່າ

ແຂວງຫຼວງນໍ້າທາ: ຕາມການໃຫ້ຂໍ້ມູນຂອງພະແນກ ປກສ ເມືອງວຽງພູຄາໃຫ້ຮູ້ວ່າ ໃນວັນທີ 2 ສິງຫາ 2020 ໄດ້ຮັບແຈ້ງຈາກປະຊາຊົນບ້ານທ່ຽວວ່າມີຄົນໄປຊອກຫາກິນແລ້ວໃຊ້ອາວຸດລ່າເນື້ອປະເພດປືນແກບຫຼົງຍິງຖືກກັນຈົນເສຍຊີວິດ 1 ຄົນ.

ຈາກນັ້ນເຈົ້າໜ້າທີຕຳຫຼວດ ປກສ ເມືອງວຽງພູຄາ ໄດ້ແຕ່ງຕັ້ງພະນັກງານວິຊາສະເພາະລົງສຶບສວນສະຖານທີ່ເກີດເຫດ ເພື່ອເກັບກຳເອົາຂໍ້ມູນຫຼັກຖານພ້ອມທັງກັກຕົວ ທ້າວ ຊຽງຄຳດີ, ອາຍຸ 32 ປີ ປະຊາຊົນຢູ່ບ້ານທ່ຽວ ເມືອງວຽງພູຄາ ແຂວງຫຼວງນ້ຳທາ ມາດຳເນີນການສືບສວນສອບສວນ,

ທ້າວຊຽງຄຳດີ ຜູ້ຖືກຫາໃຫ້ການຮັບສະຫຼະພາບວ່າ ໃນເວລາປະມານ 16 ໂມງ ຂອງວັນທີ 1 ສິງຫາ 2020 ຕົນເອງໄດ້ຖາມ ທ້າວ ຖາວອນ ຜູ້ເສຍຊິວິດຢູ່ບ້ານດຽວກັນໄດ້ຊວນກັນໄປເລາະປ່າລ່າເນື້ອຢູ່ເຂດພູກະລັງຕິງຫີນລົມ ພໍໄປຮອດຈຸດດັ່ງກ່າວ ພວກຕົນທັງສອງໄດ້ແຍກທາງກັນ ຕົກມາຮອດຫົວແລງພວກເຂົາຍິງໄດ້ ຟານ 1 ໂຕ, ໝູປ່າ 3 ໂຕ ແລະ ກະຮອກ 2 ໂຕ

ມື້ຕໍ່ມາເວລາປະມານ 5 ໂມງເຊົ້າ ພວກເຂົາທັງ 2 ໄດ້ປຶກສາຫາລືກັນວ່າຈະກັບບ້ານບໍ່ ແຕ່ທ້າວຖາວອນວ່າຍັງເຫັນຮອຍຕີນໝູປ່າຫຼາຍ ຍັງຢາກໄປເລາະຕໍ່ ຕົນເອງໄດ້ຕອບວ່າປືນຂອງຕົນແມ່ນເກາະໄກບໍ່ແຕກແລ້ວ ທ້າວຖາວອນຈຶ່ງເວົ້າວ່າເອົາປືນເຮົາກໍໄດ້ ປືນເຮົາໄດ້ອັດໝື້ ແລະ ໃສ່ລູກໂລດໄວ້ແລ້ວ 2 ລູກ ຕົນເອງຈື່ງໄດ້ຕອບຕົກລົງ ແລ້ວໃຫ້ທ້າວຖາວອນໄດ້ກັບໄປແຕ່ງກີນຖ້າກ່ອນ

ຈາກນັ້ນທັງສອງກໍໄດ້ແຍກທາງກັນ ພໍມາຮອດຈຸດເກີດເຫດຕົນເອງໄດ້ສັງເກດເຫັນເງົາຢູ່ຂອນໄມ້ທາງໜ້າປະມານ 15 ແມັດຄ້າຍຄືໝູປ່າ ຈື່ງໄດ້ຍົກປືນຂຶ້ນຍິງໃສ່ 1 ນັດ ແລ້ວໄດ້ໄປກວດກາເບີ່ງຈຶ່ງພົບເຫັນວ່າແມ່ນທ້າວຖາວອນນອນເສຍຊິວິດຄາທີ່ ເນື່ອງຈາກຖືກລູກປືນຍິງເຂົ້າຂະມັບຫູເບື້ອງຊາຍຈົນສອດອອກເທິງຫົວ.

ຕໍ່ກັບເຫດການດັ່ງກ່າວເຈົ້າໜ້າທີ ປກສ ເມືອງວຽງພູຄາ ໄດ້ນຳຕົວ ທ້າວ ຊຽງຄຳດີ ຜູ້ຖືກຫາ ກັກໄວ້ທີ່ຫ້ອງກັກຂັງຊົ່ວຄາວຢູ່ ປກສ ເມືອງວຽງພູຄາ ພ້ອມທັງໄດ້ຍຶດປືນແກບທີ່ທັງສອງໄດ້ໃຊ້ເປັນອາວຸດລ່າເນື້ອໄວ້ເປັນຂອງກາງເພື່ອດຳເນີນຄະດີຕາມລະບຽບກົດໝາຍ. ສ່ວນ ທ້າວ ຖາວອນ ຜູ່ເສຍຊີວິດພາຍຫຼັງສັນລະສູດສົບແລ້ວກໍ່ໄດ້ມອບໃຫ້ຄອບຄົວ ແລະ ຍາດຕິພີ່ນ້ອງເພື່ອນຳໄປສົ່ງສະການຕາມຮິດຄອງປະເພນີ.

ແຫຼ່ງຂໍ້ມູນ: ປກສ ເມືອງວຽງພູຄາ ແຂວງຫຼວງນ້ຳທາ