ຈາກກໍລະນີ ກ່ຽວກັບບັນຫາການສ່ອງແສງຂອງສື່ສັງຄົມອອນລາຍ ກໍ່ຄືເຟສບຸກ ກະບອກສຽງຂອງປະຊາຊົນ ທີ່ໂພສລົງໃນ ຄັ້ງວັນທີ 27/07/2020 ວ່າເຈົ້າຫນ້າທີ່ຕໍາຫຼວດຈະລາຈອນ ປະຕິບັດຫນ້າທີ່ບໍ່ຖືກຕ້ອງ ໂດຍ ຕັ້ງດ່ານກວດກາຍິງຄວາມ ໄວຢູ່ນອກຕົວເມືອງ, ບ່ອນບໍ່ມີການສັນຈອນສັບສົນ, ຍິງຄວາມໄວໃສ່ປ້າຍ 50KM/hບໍ່ຍິງໃສ່ປ້າຍ90KM/h, ບັນຫາ ການນໍາໃຊ້ບິນປັບໃຫມທີ່ບໍ່ແມ່ນຂອງກະຊວງການເງິນ ແລະ ບັນຫາຕ່າງໆ

ຕໍ່ກັບສະພາບຫາງສຽງດັ່ງກ່າວ ທ່ານ ພັທ ນີວັນ ຈູມມະນີວົງ ຫົວພະແນກຈະລາຈອນ ແຂວງ ສະຫວັນນະເຂດ ຈື່ງໄດ້ມາຊີ້ແຈງໄຂຂໍ້ຂ້ອງໃຈໃນກໍລະນີດັ່ງກ່າວ: ເຊິ່ງສະຖານທີ່ ຍິງຄວາມໄວ ແລະ ຈຸດຕັ້ງດ່ານ ກວດກາຕົວຈິງ ສໍາລັບສະຖານທີ່ຕັ້ງກ້ອງຍິງຄວາມໄວ ແມ່ນຍັງຢູ່ໃນຕົວເມືອງ, ເຂດຊຸມຊົນ ຫຼື ເຂດບ້ານປະຊາຊົນ ທີ່ມີປ້າຍ ຈໍາກັດຄວາມໄວ (ຖ້າບ່ອນໃດບໍ່ມີປ້າຍກໍ່ບໍ່ສາມາດຍິງຄວາມໄວໄດ້) ສ່ວນການຕັ້ງຈຸດກວດການັ້ນ ແມ່ນພວກເຮົາຕັ້ງຢູ່ ນອກຕົວເມືອງ, ນອກຊຸມຊົນ ຫຼື ນອກບ້ານປະຊາຊົນ ບ່ອນທີ່ເປັນເສັ້ນທາງ, ກວ້າງຂວາງ ສາມາດ ແນມເຫັນໄດ້ໄກ ເພື່ອເຮັດໃຫ້ການສັນຈອນຜ່ານຈຸດດັ່ງກ່າວ ມີຄວາມສະດວກ-ປອດໄພ.

ກຳລັງທີ່ປະກອບໃນການກວດກາຍິງຄວາມໄວແມ່ນ 8-12 ສະຫາຍຂື້ນໄປ(ຈະເປັນລົດປ້າຍລັດກໍ່ຈັດຕັ້ງປະຕິບັດເຊັ່ນກັນ; ສ່ວນການປັບໃຫມ ແມ່ນອິງໃສ່ດຳລັດເລກທີ 188/ນຍ ລົງວັນທີ3ກໍລະກົດ2017 ເຈົ້າຫນ້າທີ່ກໍ່ໄດ້ນໍາໃຊ້ບິນຮັບເງິນຄ່າບໍລິການ ຂອງກະຊວງປ້ອງກັນຄວາມສະຫງົບ ເຊິ່ງບິນ ດັ່ງກ່າວແມ່ນທາງກະຊວງການເງິນ ມອບໃຫ້ ກະຊວງປ້ອງກັນຄວາມສະຫງົບນໍາໃຊ້ທົ່ວປະເທດ ແລະ ເງິນຈໍານວນດັ່ງກ່າວກໍ່ ໄດ້ມອບເຂົ້າງົບປະມານແຫ່ງຊາດ;

ກ່ຽວກັບການຕັ້ງຈຸດກວດກາຍິງຄວາມໄວ ຢູ່ໃນເທດສະບານແຂວງ ກໍ່ຄືນະຄອນໄກສອນພົມວິຫານນັ້ນ ຕາມ ຄວາມເປັນຈິງແລ້ວພວກເຮົາບໍ່ສາມາດຈັດຕັ້ງປະຕິບັດໄດ້ ຍ້ອນວ່າສະພາບການສັນຈອນມີຄວາມຫນາແຫນ້ນ ຖ້າພວກ ເຮົາຕັ້ງຈຸດກວດກາ ຈະສ້າງຄວາມແອອັດສັບສົນຕໍ່ການສັນຈອນໄປມາຂອງຍານພາຫະນະ ເຖິງວ່າຈະມີຄວາມສ່ຽງ ຫຼື ມີອຸປະຕິເຫດເກີດຂື້ນຫຼາຍ ແຕ່ທຽບໃສ່ຜົນເສຍຫາຍໃນໄລຍະຜ່ານມາແມ່ນບໍ່ສູງ ຍ້ອນຜູ່ຂັບຂີ່ສ່ວນຫຼາຍມີສະຕິ ໃນ ການໃຊ້ລົດໃຊ້ຖະຫນົນ ສະນັ້ນກ່ຽວກັບຫາງສຽງສ່ອງແສງຜ່ານສື່ອອນລາຍຢາກໃຫ້ພວກເຮົາຈັດຕັ້ງການກວດກາຍິງ ຄວາມໄວໃນຕົວເມືອງແມ່ນບໍ່ສາມາດຈັດຕັ້ງປະຕິບັດໄດ້ ເພາະຍິ່ງເພີ່ມຄວາມຫຍຸ້ງຍາກສັບສົນໃຫ້ແກ່ການສັນຈອນໄປມາ,

ຕໍ່ກັບການຕັ້ງຈຸດກວດກາຍິງຄວາມໄວ ຂອງເຈົ້າຫນ້າທີ່ ເຫັນວ່າມັນໄດ້ສົ່ງຜົນກະທົບໂດຍກົງ ຕໍ່ພາກ ສ່ວນທີ່ເຄື່ອນໄຫວສະແຫວງຫາຜົນປະໂຫຍດທີ່ບໍ່ຊອບທໍາຕາມລະບຽບກົດຫມາຍໂດຍສະເພາະແມ່ນພາກສ່ວນທີ່ເຄື່ອນ ໄຫວຄ້າຂາຍສິ່ງຜິດກົດຫມາຍ, ບຸກຄົນທີ່ບໍ່ດີຈໍານວນຫນຶ່ງຖືກເຈົ້າຫນ້າທີ່ພວກເຮົາກວດກາສຶກສາອົບຮົມປັບໃຫມແລ້ວເກີດ ມີແນວຄິດ ບໍ່ພໍໃຈ ນອກຈາກນີ້ ການຕັ້ງດ່ານກວດກາຍິງຄວາມໄວ ມັນຈະບໍ່ໄດ້ຕາມໃຈຂອງທຸກພາກສ່ວນ ໃນສັງຄົມ ຍ້ອນວ່າບາງຄົນຢາກໄປໄວ, ບາງຄົນຢາກໄປຊ້າ ແຕ່ກົດຫມາຍຕ້ອງໄດ້ບັງຄັບ ເພື່ອຮັບປະກັນຄວາມປອດໄພ.

ໃນໄລຍະຜ່ານມາພະແນກຕໍາຫຼວດຈະລາຈອນ ແຂວງສະຫວັນນະເຂດ ໄດ້ຈັດຕັ້ງເຄື່ອນໄຫວວຽກງານ ຕາມສິດ, ຫນ້າທີ່ ແລະ ພາລະບົດບາດ ກໍ່ຄື ປະຕິບັດຕາມຂັ້ນເທິງທີ່ໄດ້ມອບຫມາຍ ໂດຍສະເພາະ ເລັ່ງໃສ່ ກວດກາຍິງຄວາມ ໄວ ຢູ່ຕາມເສັ້ນທາງເລກທີ 9 ແລະ ເລກທີ 13 ໃຕ້ ໂດຍມີຈຸດປະສົງ ເພື່ອສຶກສາອົບຮົມຜູ່ລະເມີດກົດລະບຽບຈະລາຈອນທາງບົກໃນສະຖານຕ່າງໆ ໃຫ້ ເຂົ້າໃຈ ແລະ ພ້ອມກັນ ຈັດຕັ້ງປະຕິບັດຢ່າງເຂັ້ມງວດ, ເພື່ອບັງຄັບໃຊ້ກົດຫມາຍໃສ່ຜູ້ລະເມີດລະບຽບ ແລະ ກົດຫມາຍຈະລາຈອນທາງບົກ ໃຫ້ເຂັ້ມງວດ ເຮັດໃຫ້ ປະເທດເຮົາກ້າວໄປສູ່ລັດແຫ່ງກົດຫມາຍ, ສະກັດກັ້ນການລະເມີດກົດລະບຽບຈະລາຈອນ ຂອງຍານພາຫະນະ ທີ່ໃຊ້ຄວາມໄວສູງເກີນກົດຫມາຍກໍານົດ ເພື່ອເຮັດໃຫ້ຜູ່ຂັບຂີ່ຫຼຸດຜ່ອນຄວາມໄວລົງ ເນື່ອງຈາກວ່າການນໍາໃຊ້ຄວາມໄວສູງເທົ່າໃດຍິ່ງມີຄວາມສ່ຽງທີ່ຈະເກີດ ອຸປະຕິເຫດໄດ້ງ່າຍ ແລະ ໃນປະຈຸບັນການໃຊ້ຄວາມໄວສູງແມ່ນເປັນສາເຫດຫຼັກທີ່ພາໃຫ້ເກີດອຸປະຕິເຫດ, ທັ້ງນີ້ເພື່ອເປັນການຫຼຸດຜ່ອນອຸປະຕິເຫດຕາມທ້ອງຖະໜົນຫຼວງ, ບັນຫາອາຊະຍາກຳ, ບັນຫາຄ້າຂາຍເຖື່ອນຕ່າງໆ ຮຽກຮ້ອງມາຍັງຜູ້ໃຊ້ລົດ-ໃຊ້ຖະໜົນຈົ່ງຂັບຂີ່ຢ່າງມີສະຕິ, ປະຕິບັດຕາມລະບຽບກົດໝາຍການສັນຈອນຢ່າງເຂັ້ມງວດ, ໃຫ້ຄວາມຮ່ວມມືກັບເຈົ້າໜ້າທີ່, ກວດກາເຕັກນິກພາຫະນະ, ນຳເອົາໃບອະນຸຍາດຂັບຂີ່, ໃບຖະບຽນລົດ ຄົບຊຸດ ຕິດຕົວໄປທຸກຄັ້ງທີ່ອອກເດີນທາງ.

ໃນກໍລະນີພວກທ່ານຖືກປັບໃໝໂດຍບໍ່ສອດຄ່ອງຕາມລະບຽບ ແມ່ນໃຫ້ໃຫ້ມີກໍານົດວັນ, ເວລາ, ສະຖານທີ່ ຊັດເຈນ ແລ້ວສ່ອງແສງລາຍງານມາ ໃຫ້ທາງປກສແຂວງ ກໍ່ຄື ພະແນກຂອງພວກເຮົາ ເພື່ອແກ້ໄຂໃຫ້ທັນເວລາ ແລະ ຖືກຕ້ອງຕາມຄວາມຈິງ

ພາບ – ຂ່າວ: ນັກຂ່າວ ປກສ ແຂວງສະຫວັນນະເຂດ

---------------

ຢ່າລືມກົດຕິດຕາມເພຈ All in LAOS


------------------------------

LEAVE A REPLY

Please enter your comment!
Please enter your name here