ທຸລະກິດ: ການລ້ຽງສັດເປັນອາຊີບກໍເປັນວິທີຫນຶ່ງທີ່ສາມາດສ້າງລາຍຮັບເຂົ້າຄອບຄົວເປັນຢ່າງດີ ແລະ ເຮັດໃຫ້ຄອບຄົວຫຼຸດພົ້ນອອກຈາກຄວາມທຸກຍາກຈົນກາຍເປັນຄອບຄົວຕົວແບບເທື່ອລະກ້າວດັ່ງຄອບຄົວຂອງ ທ່ານ ໄມຈິດ ປັນຍາສັກ ປະຊາຊົນບ້ານນາຫ້ວຍ ເມືອງແບງ ແຂວງ ອຸດົມໄຊ ທີ່ໄດ້ຫັນຈາກການປຸູກສາລີ ມາເປັນການລ້ຽງງົວ ເຊິ່ງມາຮອດປັດຈຸບັນນີ້ສາມາດສ້າງລາຍຮັບຈາກການຂາຍງົວໄດ້ເປັນຈຳນວນຫຼວງຫລາຍ.
ທ່ານ ໄມຈິດ ປັນຍາສັກ ກ່າວວ່າ: ເບື້ອງຕົ້ນຄອບຄົວຂອງຕົນເອງໄດ້ພ້ອມກັນປູກສາລີແຕ່ເນື່ອງຈາກສະພາບຮ່າງກາຍບໍ່ເອື້ອອຳນວຍຈຶ່ງຫັນມາລ້ຽງສັດໃຫຍ່ໂດຍສະເພາະແມ່ນລ້ຽງງົວອີກຢ່າງຫນຶ່ງກໍຍ້ອນຕົນເອງມັກຮັກໃນອາຊີບດັ່ງກ່າວຈຶ່ງນຳເອົາແຫລ່ງທຶນຈາກທະນາຄານນະໂຍບາຍຈຳນວນຫນຶ່ງມາຊື້ແມ່ພັນພ້ອມເນື້ອທີ່ດິນຕອນຫນຶ່ງເພື່ອປູກຫຍ້າ ໃນປີ 2016.
ນັບຕັ້ງແຕ່ເລີ່ມຈັດຕັ້ງປະຕິບັດ ຈົນຮອດປັນຈຸບັນ ສາມາດຂາຍງົວອອກທັງຫມົດ 17-18 ໂຕ ລວມເປັນເງິນ 100 ລ້ານກວ່າກີບ,ສະເພາະປີ 2020 ນີ້ ຂາຍອອກ 4 ໂຕ ປັດຈຸບັນຕົນເອງຍັງມີງົວທັງຫມົດ 20 ໂຕ ໃນນັ້ນ ເປັນງົວລາດ ທົ່ວໄປ 13 ໂຕ ແລະ ເປັນງົວພັນ ທີ່ໄດ້ຮັບການຊ່ວຍເຫຼືອ ຈາກແຂວງ ຈຳນວນ 7 ໂຕ.
ທ່ານໄມຈິດ ປັນຍາສັກ ກ່າວຕື່ມອີກວ່າ ການລ້ຽງງົວ ຂອງຕົນເອງນີ້ ມີຄວາມສະດວກຫລາຍດ້ານ ໂດຍສະເພາະແມ່ນສະຖານທີ່ເຫມາະສົມ, ມີຫຍ້າພຽງພໍ, ບໍ່ໄດ້ໃຊ້ແຮງງານຫລາຍ, ມີວິຊາການຈາກຫ້ອງການກະສິກຳເມືອງ ແບງ ລົງໃກ້ສິດຕິດແທດ, ຕິດຕາມ ແລະ ສັກຢາໃຫ້ງົວເປັນປົກກະຕິ ແຕ່ກໍປາສະຈາກຂໍ້ຫຍູ້ງຍາກບໍ່ໄດ້ ເປັນຕົ້ນແມ່ນງົວຫລຸດອອກຈາກສູນໄປກິນຜົນລະປຸກຂອງປະຊາຊົນເຮັດໃຫ້ເກີດຄວາມບໍ່ພໍໃຈ ເຖິງຢ່າງໃດກໍຕາມຕົນເອງຍັງມີທິດທາງແຜນການໃນການຂະຫຍາຍການລ້ຽງໃຫ້ກວ້າງຂວາງຕື່ມອີກ.
ເວົ້າລວມແລ້ວ ການລ້ຽງງົວເປັນອາຊີບ ໄດ້ສົ່ງຜົນເຮັດໃຫ້ຄອບຄົວຂອງຕົນເອງກາຍເປັນຄອບຄົວພົ້ນທຸກ, ມີຢູ່ມີກິນ, ມີບ່ອນຢູ່ຖາວອນ, ຫາກທຽບໃສ່ເມື່ອກ່ອນແລ້ວ ກຽນລ້ຽງງົວໄດ້ຊ່ວຍໃຫ້ຊີວິດມີການປ່ຽນແປງກ້າວຂື້ນເປັນຄອບຄົວທີ່ຫລຸດພົ້ນຈາກຄວາມທຸກຍາກເທື່ອລະກ້າວ.
ຂ່າວ: ຄານມະນີ ຮຽນດໍຈັນ
---------------
ຢ່າລືມກົດຕິດຕາມເພຈ All in LAOS
------------------------------
