ເຊກອງ: ໃນຕອນແລງວັນທີ 3 ສິງຫາ 2020 ນີ້, ກອງກວດກາປ່າໄມ້ ແຂວງເຊກອງ ຮ່ວມກັບ ຫ້ອງການກະສິກຳແລະປ່າໄມ້ ເມືອງລະມາມ ໄດ້ນຳເອົາງູເຫຼືອມຈຳນວນ 1 ໂຕ ປ່ອຍຄືນສູ່ທໍາມະຊາດ ຢູ່ທີ່ຫ້ວຍເຫ່ວ ເຂດບ້ານນາວາ ເມືອງລະມາມ ແຂວງເຊກອງ.ໂດຍມີຄະນະກອງກວດກາປ່າໄມ້ແຂວງ,ມີຫ້ອງການກະສິກຳແລະປ່າໄມ້ເມືອງລະມາມ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ສົມບູນ ທອງສະຫັວດ ຮອງຫົວໜ້າໜ່ວຍງານກວດກາສັດນ້ຳ-ສັດປ່າ ກອງກວດກາປ່າໄມ້ ພະແນກກະສິກຳແລະປ່າໄມ້ແຂວງເຊກອງໄດ້ເວົ້າວ່າ: ງູ ທີ່ນຳໄປປ່ອຍໃນຄັ້ງນີ້ມີຈຳນວນ 1 ໂຕ, ມີຄວາມຍາວ 3,30 ແມັດ, ນໍ້າໜັກ 25 ກິໂລກຣາມ, ທີ່ໄດ້ມາຈາກພະແນກການເງິນແຂວງເຊກອງ, ຊຶ່ງແມ່ນພະນັກງານ ໄດ້ພົບເຫັນຢູ່ຂ້າງຫໍພັກຂອງພະນັກງານພະແນກການເງິນແຂວງ ຈຶ່ງໄດ້ແຈ້ງເຈົ້າໜ້າທີ່ກ່ຽວຂ້ອງມາຈັບເອົາງູດັ່ງກ່າວ ເພື່ອໄປມອບໃຫ້ ພະແນກກະສິກຳແລະປ່າໄມ້ແຂວງ ໂດຍສະເພາະແມ່ນກອງກວດກາປ່າໄມ້ ເພື່ອນຳໄປປ່ອຍຄືນສູ່ທຳມະຊາດຢູ່ທີ່ຫ້ວຍເຫ່ວ ເຂດບ້ານນາວາ ເພື່ອໃຫ້ມີການແຜ່ພັນສືບຕໍ່ໄປ.
ຂ່າວ: ເພັດສົມພອນ ພົມມະສອນ
