ທ້າວ ດອນນາແພງ ອາຍຸ 25 ປີ ຢູ່ບ້ານຫົວຊຽງ ເມືອງໄຊທານີ ນະຄອນຫຼວງວຽງຈັນ ໄດ້ນຳເອົາຢາບ້າ ຈຳນວນ 2.000 ເມັດ ໄປຂາຍໃຫ້ຄົນສັ່ງຊື້ຢູ່ເສັ້ນທາງ ເຂດບ້ານໜອງພົງ ເມືອງຫາດຊາຍຟອງ.
ແຕ່ໄປບໍ່ຮອດຈຸດນັດໝາຍ ເພາະຖືກເຈົ້າໜ້າທີ່ແກ້ໄຂເຫດສຸກເສີນ 1191 ຕິດຕາມຈັບຕົວໄດ້ ໃນຂະນະທີ່ກຳລັງຂັບຂີ່ລົດຈັກຫຼົບໜີ. ຫຼັງຈາກທີ່ຜູ້ກ່ຽວຖິ້ມຢາບ້າຈຳນວນດັ່ງກ່າວໄວ້ແຄມທາງ.
ເຈົ້າໜ້າທີ່ເປີດເຜີຍວ່າ: ຜູ້ຖືກຫາລາຍນີ້ ຖືກຈັບຕົວໃນວັນທີ 8 ມິຖຸນາ ທີ່ຜ່ານມາ, ແລ້ວສົ່ງຜູ້ກ່ຽວ ພ້ອມຂອງກາງຖືກຈັບ ມັດ ເທົ່າກັບ 2.000 ເມັດ ໃຫ້ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງຫາດຊາຍຟອງ ດຳເນີນຄະດີຕາມກົດໝາຍ.
ຜ່ານການສອບສວນໃນເບື້ອງຕົ້ນ, ຜູ້ຖືກຫາ ຮັບສາລະພາບວ່າ: ໄດ້ເລີ່ມເຄື່ອນໄຫວພົວພັນຊື້-ຂາຍຢາບ້າ ມາແຕ່ເດືອນມັງກອນ 2020 ແລະ ໃນໄລ ຍະຜ່ານມາ, ຜູ້ກ່ຽວໄດ້ຕິດຕໍ່ຊື້ຢາບ້າມາຂາຍຈຳນວນຫຼາູ້ກ່ຽວ ຄັ້ງລະ 1 ມັດ ເທົ່າກັບ 2.000 ເມັດ. ຫຼັງຈາກທີ່ໄດ້ຢາບ້າມາແລ້ວ ກໍເອົາໄປຂາຍໃຫ້ຄົນທີ່ໂທລະສັບມາສັ່ງຊື້. ມາຮອດຕົ້ນເດືອນເມສາ 2020, ຜູ້ກ່ຽວໄດ້ເອົາຢາບ້າ ຈຳນວນ 5 ຖົງ ເທົ່າ ກັບ 1.000 ເມັດ ໄປຂາຍອີກ ໂດຍນັດຊື້ຂາຍຢາບ້າໃຫ້ກັນຢູ່ຕາມແຕມທາງ. ມາຮອດວັນທີ 8 ມິຖຸນາ ຜ່ານມາ, ເວລາປະມານ 14:30 ໂມງ ຊາຍຄົນດັ່ງກ່າວ ກໍໂທລະສັບມາສັ່ງຊື້ຢາບ້າອີກ ຈໍານວນ 1 ມັດ ໂດຍນັດສົ່ງຢາບ້າໃຫ້ກັນຢູ່ເສັ້ນທາງລະຫວ່າງເຂດບ້ານຈອມສີ ຫາ ບ້ານໜອງພົງ ເມືອງຫາດຊາຍຟອງ. ຈາກນັ້ນ, ຜູ້ກ່ຽວກໍໄດ້ເອົາຢາບ້າ 1 ມັດເທົ່າ ກັບ 2.000 ເມັດ ກຽມຈະອອກໄປຂາຍໃຫ້. ແຕ່ພໍຂີ່ລົດໄປຮອດເຂດບ້ານໜອງພົງ ກໍເຫັນເຈົ້າໜ້າທີ່ ຂັບຂີ່ລົດສວນທາງມາ, ຜູ້ກ່ຽວຈຶ່ງໂຍນຢາບ້າຖິ້ມໄວ້ຢູ່ແຄມທາງ ແລ້ວກໍຂີ່ລົດຈັກຫຼົບໜີ, ແຕ່ເຈົ້າໜ້າທີ່ ໄດ້ສັງເກດເຫັນຕອນຖິ້ມຢາບ້າ ແລະ ສາມາດຕາມຈັບໄປດຳເນີນຄະດີ ພ້ອມຂອງກາງດັ່ງກ່າວ.
ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງຫາດຊາຍຟອງ ໃຫ້ຮູ້ວ່າ: ປັດຈຸບັນ, ຄະດີດັ່ງກ່າວນີ້ ແມ່ນຢູ່ໃນຂັ້ນຕອນສອບສວນຂະຫຍາຍຜົນຫາທີ່ມາຂອງຢາບ້າ ທີ່ຜູ້ຖືກຫາລາຍນີ້ ນຳມາຂາຍ ເພື່ອຈະໄດ້ຂຶ້ນເປັນເປົ້າໝາຍ ຕິດຕາມຈັບຕົວ ມາດໍາເນີນຄະດີຕາມກົດໝາຍຕື່ມອີກ.
---------------
ຢ່າລືມກົດຕິດຕາມເພຈ All in LAOS
------------------------------
