ໃນຕອນເຊົ້າຂອງວັນທີ 30 ກໍລະກົດ 2020, ບັນດາການນຳ ພັກ-ລັດ ໂດຍມີທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ພ້ອມຄະນະ ແລະ ມວນຊົນ ອອກຕົນຍາດໂຍມ ຊາວແຂວງສະຫວັນນະເຂດ ຈຳນວນຫລວງຫລາຍ ໄດ້ຮ່ວມໃສ່ບາດ ຖວາຍສັງຄະທານ ພຣະສົງ 39 ອົງ ເພື່ອອຸທິດແດ່ພຣະເຈົ້າໄຊຍະເຊດຖາທິຣາດ ຜູ້ຊົງຄຸນຄວາມດີ ປະເທດຊາດ ພຸດທະສາສະໜາ ແລະ ວັດທະນະທຳລາວ.
ທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ ໄດ້ສະແດງຄວາມຮູ້ສືກດີໃຈ ພູມໃຈ ທີ່ເຫັນວ່າ ປະຊາຊົນຊາວພຸດ ແຂວງສະຫວັນນະເຂດ ກໍຄືຊາວນະຄອນໄກສອນ ພົມວິຫານ ທີ່ໄດ້ມາເຕົ້າໂຮມກັນໃສ່ບາດຢາດນ້ຳ ທຳບຸນກຸສົນຢ່າງຫລວງຫລາຍ ເພື່ອອຸທິດແດ່ພຣະເຈົ້າໄຊຍະເຊດຖາທິຣາດ ເປັນການສະແດງຄວາມຮູ້ບຸນຄຸນຂອງບັນພະບຸລຸດລາວເຮົາ.
ພາຍຫລັງ ສຳເລັດພິທີໃສ່ບາດແລ້ວ ຂະບວນແຫ່ຮູບຫລໍ່ທອງເຫລືອງ ພຣະເຈົ້າໄຊຍະເຊດຖາທິຣາດ ມະຫາຣາດ ໄດ້ສືບຕໍ່ເດີນທາງ ໄປຍັງນະຄອນປາກເຊ ແຂວງຈຳປາສັກ ຊຶ່ງໃນລະຫວ່າງທາງ ຈະຖືກຕ້ອນຮັບ ກາບໄຫວ້ ແລະ ທຳບຸນທຳທານ ຈາກມວນຊົນ ແລະ ອຳນາດການປົກຄອງ ເມືອງລະຄອນເພັງ ແຂວງສາລະວັນ.
---------------
ຢ່າລືມກົດຕິດຕາມເພຈ All in LAOS
------------------------------
