ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງໄຊຍະບູລີ ໄດ້ຮັບແຈ້ງຂ່າວຈາກພົນລະເມືອງດີວ່າ ມີກຸ່ມຄົນບໍ່ດີກໍາລັງເຄື່ອນໄຫວຄ້າຂາຍຢາເສບຕິດຢູ່ເຂດບ້ານຫ້ວຍຊໍາອໍ້ ເມືອງໄຊຍະບູລີ
ຈຶ່ງໄດ້ນໍາໜ່ວຍງານວິຊາສະເພາະອອກເຄື່ອນໄຫວຕິດຕາມ ຮອດເວລາປະມານ 15 ໂມງຂອງວັນທີ່ 21 ກໍລະກົດ 2020 ຈຶ່ງສາມາດພົບເຫັນ ແລະ ເຂົ້າກັກຕົວ ທ້າວ ລີ ທໍ່ ອາຍຸ 28 ປີ ປະຊາຊົນບ້ານຫ້ວຍຊໍາອໍ້ ເມືອງໄຊຍະບູລີ ແຂວງໄຊຍະບູລີ ທີ່ຕົກເປັນເປົ້າໝາຍຕ້ອງສົງໄສ ພ້ອມຍຶດຂອງກາງ ຢາເສບຕິດປະເພດຢາບ້າ ຈໍານວນ 1.118 ເມັດ, ຖົງຢ່າງເປົ່າໃສ່ຢາບ້າ ຈໍານວນ 53 ຖົງ, ອຸປະກອບເສບຢາບ້າ 04 ອັນ, ອຸປະກອນເສບຢາຝີ່ນ 1 ອັນ ເງິນ 2.000.000 ກີບ ໂທລະສັບມືຖື 1 ເຄື່ອງ
ພ້ອມນີ້ ຍັງສາມາດກັກຕົວຜູ້ເສບຢາເສບຕິດໄດ້ 1 ຄົນຄື ທ້າວ ຊົງ ທໍ່ ອາຍຸ 28 ປີ ປະຊາຊົນບ້ານຫ້ວຍຊໍາອໍ້ ເມືອງໄຊຍະບູລີ ແຂວງໄຊຍະບູລີ ເຈົ້າໜ້າທີ່ຈື່ງໄດ້ນໍາຕົວຜູ້ກ່ຽວທັງສອງຄົນ ມາດໍາເນີນການສືບສວນ – ສອບສວນ ແລະ ລົງໂທດຕາມລະບຽບກົດໝາຍ.
