26.1 C
Laos
Tuesday, October 26, 2021

ຮອງນາຍົກລັດຖະມົນຕີ ເຄື່ອນໄຫວຢ້ຽມຢາມເມືອງສະໜາມໄຊ ແຂວງອັດຕະປື

ຂ່າວເດັ່ນອາທິດນີ້

ໃນວັນທີ 26 ກໍລະກົດ 2020 ນີ້, ທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫລວງ ຂັ້ນສູນກາງ ພ້ອມຄະນະ ໄດ້ໄປຢ້ຽມຢາມ ແລະ ຕິດຕາມເບິ່ງຄວາມຄືບໜ້າໃນການຟື້ນຟູພື້ນຖານໂຄງລ່າງ, ການກໍ່ສ້າງທີ່ຢູ່ອາໄສ ແລະ ການຈັດສັນອາຊີບ ໃຫ້ພໍ່ແມ່ປະຊາຊົນ ເມືອງສະໜາມໄຊ ແຂວງອັດຕະປື ທີ່ໄດ້ຮັບຜົນກະທົບຈາກເຫດການຄູກັນນໍ້າ D ຂອງໂຄງການກໍ່ສ້າງເຂື່ອນໄຟຟ້າ ເຊປຽນ-ເຊນໍ້ານ້ອຍ ເມື່ອປີ 2018 ທີ່ຜ່ານມາ. ໂດຍໄດ້ຮັບການຕ້ອນຮັບຈາກ ທ່ານ ອຸ່ນຫລ້າ ໄຊຍະສິດ ຄະນະປະຈໍາພັກແຂວງ, ຮອງເຈົ້າແຂວງອັດຕະປື.

Image may contain: 5 people, people standing, mountain, outdoor and nature

ໂອກາດນີ້ ທ່ານ ຮອງນາຍົກລັດຖະມົນຕີ ໄດ້ເດີນທາງຢ້ຽມຢາມ, ຕິດຕາມເບິ່ງການຟື້ນຟູພື້ນໂຄງລ່າງ ເປັນຕົ້ນ ການສ້ອມແປງທາງ, ຂົວ, ຊົນລະປະທານ ຢູ່ໃນເທສະບານ ແລະ ບ້ານທີ່ໄດ້ຮັບຜົນກະທົບ, ເບິ່ງການບຸກເບີກເນື້ອທີ່ ທໍາການຜະລິດໃຫ້ປະຊາຊົນ ຢູ່ຈຸດບ້ານຕາມໍຢອດ ແລະ ການຈັດສັນ-ກໍ່ສ້າງທີ່ຢູ່ອາໄສໃໝ່ໃຫ້ ພໍ່ແມ່ປະຊາຊົນຢູ່ ຈຸດ ບ້ານທ່າແສງຈັນ ແລະ ຈຸດບ້ານດົງບາກ.

Image may contain: 8 people, people standing, sky, cloud and outdoor

ສໍາລັບການຟື້ນຟູພື້ນຖານໂຄງລ່າງ ເມືອງສະໜາມໄຊ ແມ່ນພວມດໍາເນີນຢ່າງເຄັ່ງຮ້ອນ ແລະ ສໍາເລັດໂດຍພື້ນຖານແລ້ວ ໂດຍສະເພາະ ແມ່ນການສ້ອມແປງທາງ ແລະ ຂົວແມ່ນສໍາເລັດ ສາມາດໄປມາສະດວກ, ສ່ວນການສ້ອມແປງຄອງຊົນລະປະທານ ພວມເລັ່ງສ້ອມແປງຄືນ ຄາດວ່າຈະສຳເລັດໃນໄວໆນີ້, ສ່ວນການບຸກເບີກເນື້ອທີ່ການຜະລິດໃຫ້ປະຊາຊົນ ມາຮອດປັດຈຸບັນ ສາມາດບຸກ ເບີກເນື້ອທີ່ ເພື່ອໃຫ້ປະຊາຊົນປູກມັນຕົ້ນ ໄດ້ທັງໝົດ 2.140 ເຮັກຕາ, ໃນນີ້ໄດ້ບຸກເບີກ ຢູ່ 4 ຈຸດຄື: ຈຸດ ບ້ານຕາມໍຢອດ, ຈຸດ ບ້ານດົງບາກ, ຈຸດ ບ້ານດອນບົກ ແລະ ຈຸດ ບ້ານປິນດົງ.
ສໍາລັບການຈັດສັນ ແລະ ກໍ່ສ້າງທີ່ຢູ່ອາໄສໃຫ້ພໍ່ແມ່ປະຊາຊົນ ແມ່ນພວມດໍາເນີນການກໍ່ສ້າງເຮືອນ 811 ຫລັງໃຫ້ປະຊາຊົນ 5 ບ້ານ ແລະ 1 ຄຸ້ມ, ໂດຍແບ່ງອອກເປັນ 4 ຈຸດ ຫລື 4 ບ້ານຈັດສັນໃໝ່ ຄື: ບ້ານດົງບາກໃໝ່ຫີນຄໍາ, ບ້ານດອນບົກ, ບ້ານຕາມໍຢອດ ແລະ ບ້ານທ່າແສງຈັນ.

ຂ່າວ: ແສງເພັດ ແຊ່ຈ່າວ

- Advertisement -
- Advertisement -

ເລື່ອງລາວຫຼ້າສຸດມື້ນີ້