ວັນທີ 16 ກໍລະກົດ ຜ່ານມາ, ໜ່ວຍງານຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ເມືອງປາກກະດິງ ແຂວງບໍລິຄຳໄຊ ໄດ້ນຳກຳລັງເຈົ້າໜ້າທີ່ວິຊາສະເພາະ ເຂົ້າປິດລ້ອມຈັບເປົ້າໝາຍຄະດີຢາເສບຕິດ ໃນສວນຢາງພາລາ ຢູ່ເຂດບ້ານຊ່ອນພັນໄຊ ເມືອງປາກກະດິງ ສາມາດຈັບໄດ້ ພ້ອມຂອງກາງຢາບ້າ 10 ຖົງ (ຖົງ 200 ເມັດ) ລວມມີຢາຈຳນວນ 1.979 ເມັດ.
ເຈົ້າໜ້າທີ່ ປກສ ເມືອງປາກກະດິງ ໃຫ້ຮູ້ວ່າ: ຜູ້ຖືກຫາ ຊື່ ທ້າວ ຄຳພີ ອາຍຸ 40 ປີ ຢູ່ບ້ານຫ້ວຍທອງ ເມືອງໄຊພູທອງ ແຂວງສະຫວັນນະເຂດ, ຜູ້ກ່ຽວມາຮັບຈ້າງກີດຢາງພາລາ ຢູ່ບ້ານຊ່ອນພັນໄຊ ເມືອງປາກກະດິງ ແຂວງບໍລິຄຳໄຊ ແລະ ໄດ້ມີການເຄື່ອນໄຫວລັກລອບຂາຍຢາບ້າ ຢູ່ສະຖານທີ່ພັກເຊົາ ໃນສວນຢາງພາລາ ພ້ອມທັງໃຊ້ເປັນບ່ອນມົ້ວສຸມເສບຢາບ້າອີກດ້ວຍ. ພາຍຫຼັງທີ່ໄດ້ຮັບລາຍງານຈາກແຫຼ່ງຂ່າວ ຈຶ່ງໄດ້ຂຶ້ນເປົ້າໝາຍຕິດຕາມ ຈຶ່ງຮູ້ວ່າໄດ້ຂໍ້ມູນຢ່າງລະອຽດ ກໍເຂົ້າຈັບທັນທີ່ ພ້ອມຂອງກາງ 1.979 ເມັດ ໄປດຳເນີນຄະດີ.
ປັດຈຸບັນ, ຄະດີຢາເສບຕິດດັ່ງກ່າວ. ເຈົ້າໜ້າທີ່ໜ່ວຍງານຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ເມືອງປາກກະດິງ ພວມດຳເນີນການສອບສວນ ຫາທີ່ມາຂອງຢາເສບຕິດ ເພື່ອຂຶ້ນແຜນຕິດຕາມຜູ້ທີ່ຖືກຊັດທອດ ໃນການພົວພັນຊື້ຂາຍຢາເສບຕິດນຳກັນ ມາດຳເນີນຄະດີຕາມກົດໝາຍ.
