ວັນທີ 17 ກໍລະກົດ 2020 ຢູ່ທີ່ເຮືອນຂອງທ່ານ ນາງ ອໍລະດີ ພະພົມມະວົງສາ ພະນັກງານບຳນານ ເມືອງຄຳເກີດ ແຂວງບໍລິຄຳໄຊ ໄດ້ຈັດພິທີມອບ-ຮັບ ໂຄງການຕອບບຸນແທນຄຸນໃນການສ້ອມແປງເຮືອນໃຫ້ພະນັກງານອາວຸໂສບຳນານ, ເປັນປະທານໂດຍ ທ່ານ ທອງໄຂ ຄຳມະວົງ ກຳມະການພັກເມືອງ ເລຂາຄະນະບໍລິຫານງານຊາວໜຸ່ມເມືອງ, ມີບັນດາຫົວໜ້າ, ຄະນະ, ເລຂາພັກບ້ານ – ນາຍບ້ານ, ຄູ-ອາຈານ ຕະຫຼອດຮອດສະມາຊິກຊາວໜຸ່ມ ທັງຍິງ-ຊາຍ ເຂົ້າຮ່ວມ.
ທ່ານ ຄຳຈັນ ໄຊຍະກຸມມານ ຮອງເລຂາຊາວໜຸ່ມເມືອງຄຳເກີດ ໃຫ້ຮູ້ວ່າ: ໂດຍອີງໃສ່ການຕົກລົງເຫັນດີທາງຄະນະນຳຂອງເມືອງ ກໍ່ຄືຄະນະບໍລິຫານງານຊາວໜຸ່ມເມືອງ ທີ່ໄດ້ສ້າງຕັ້ງໂຄງການຕອບບຸນແທນຄຸນນີ້ຂື້ນ ເພື່ອເຮັດໃຫ້ອົງການຈັດຕັ້ງທຸກພາກສ່ວນ, ນັກທຸລະກິດ, ສະມາຊິກຊາວໜຸ່ມ, ເຍົາວະຊົນ ໄດ້ຮູ້ເຖີງຄຸນງາມຄວາມດີຂອງບັນພະບູລຸດ ຫຼື ຜູ້ທີ່ເຮັດການປະຕິວັດຜ່ານມາ ທີ່ເຄີຍຜ່ານຜ່າບັນຫານາໆປະການ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ກໍ່ຄືບ້ານເມືອງຂອງພວກເຮົາ.
ທ່ານ ຄຳຈັນ ໄຊຍະກຸມມານ ຍັງໃຫ້ຮູ້ອີກວ່າ: ການຈັດຕັ້ງປະຕິບັດໂຄງການ ແມ່ນເລີ່ມຈາກການລົງສຳຫລວດ ປະເມີນຄ່າສີ້ນເປືອງງ, ລະດົມທືນຈາກເພື່ອນມິດສະຫາຍ, ການຈັດຕັ້ງທີ່ມີນ້ຳໃຈໃນການອຸປະຖຳຄ້ຳຊູ ເພື່ອເປັນທຶນສົມທົບກັບໂຄງການຕອບບຸນແທນຄຸນ, ລົງມືຈັດຕັ້ງປະຕິບັດໜ້າວຽກ ໂດຍເລີ່ມຈາກການທາສີໃນ ແລະ ນອກເຮືອນ, ປູກະໂລ່, ໂບກຫ້ອງ, ໃສ່ແພດານ ລວມງົບປະມານໃນການສ້ອມແປງໃນຄັງນີ້ ທັງໝົດ 7.199.000 ກິບ ໂດຍມີແຮງງານນ້ອງໆຊາວໜຸ່ມ – ເຍົາວະຊົນ ຈາກ ມສ ນະຄອນໄຊ ແລະ ມສ ກິນນອນຊົນເຜົ່າ ຮ່ວມນຳ, ຫຼັງຈາກນັ້ນກໍ່ໄດ້ມອບໃບຍ້ອງຍໍໃຫ້ແກ່ ຜູ້ທີ່ໄດ້ອຸປະຖຳໃນຄັ້ງນີ້.
