ນະຄອນຫຼວງວຽງຈັນ: ພັທ ຄໍາມະນີ ແກ້ວສີຫາ ຮອງພະແນກຕໍາຫຼວດ ປກສ ເມືອງໄຊທານີ ໃຫ້ສໍາພາດວ່າ: ໃນວັນທີ 27 ມິິຖຸນາ 2020, ເຈົ້າໜ້າທີ່ສືບສວນ-ສອບສວນ ຈຶ່ງສົມທົບກັບກອງນິຕິວິທະຍາ ພິສູດຫຼັກຖານ ນະຄອນຫຼວງວຽງຈັນ ແລະ ພາກສ່ວນທີ່ກ່ຽວຂ້ອງ ລົງກວດກາສະຖານທີ່ເກີດເຫດຕົວຈິງ.
ພາຍຫຼັງໄດ້ຮັບແຈ້ງຄວາມຈາກ ປກສ ກຸ່ມຫ້ວຍຈຽມ ເມືອງໄຊທານີ ວ່າມີເຫດການຄາດຕະກໍາຄົນເສຍຊີວິດ ຢູ່ບ້ານສົມສະໄໝ ເມືອງໄຊທານີ ຈຶ່ງຮູ້ໄດ້ວ່າ:
ຜູ້ເສຍຊີວິດຊື່ ນາງ ຈືລີ ອາຍຸ 47 ປີ ອາຊີບເຮັດນາ ຢູ່ບ້ານສົມສະໄໝ ເມືອງໄຊທານີ ຖືກແທງດ້ວຍມີດປາຍແຫຼມຍາວປະມານ 40 ຊັງຕີແມັດ ແທງເຂົ້າຕາມບໍລິເວນໜ້າທ້ອງເບື້ອງຂວາ, ໜ້າເອິກທັງສອງເບື້ອງ ລວມກັນທັງໝົດຈໍານວນ 8 ຈຸດ, ຈຶ່ງເຮັດໃຫ້ຜູ້ກ່ຽວເສຍຊີວິດຄາທີ່.
ສ່ວນຜູ້ລົງມືກໍ່ເຫດແມ່ນທ້າວ ປໍຈົວ ຢ່າງ ອາຍຸ 31 ປີ, ວ່າງງານ, ຢູ່ບ້ານສົມສະໄໝ ເມືອງໄຊທານີ ນະຄອນຫຼວງວຽງຈັນ; ເຊິ່ງເປັນນ້ອງຂອງຜົວຜູ້ເສຍຊີວິດ. ດັ່ງນັ້ນ, ເຈົ້າໜ້າທີ່ ປກສ ເມືອງໄຊທານີ ຈຶ່ງໄດ້ກັກຕົວ ທ້າວ ປໍຈົວ ຢ່າງ ມາດໍາເນີນການສືບສວນ-ສອບສວນ.
ຜ່ານການສືບສວນ-ສອບສວນ ທ້າວ ປໍຈົວ ຢ່າງ ໄດ້ຮັບສາລະພາບວ່າ: ສາເຫດທີ່ລົງມືກໍ່ເຫດຄາດຕະກໍາເອື້ອຍໃພ້ ຍ້ອນຕົນເອງຄຽດແຄ້ນໃຫ້ອ້າຍ ແລະ ເອື້ອຍໃພ້ ທີ່ໄດ້ນໍາຕົນໄປຝາກກັກຂັງ ຢູ່ຄ້າຍຄຸມຂັງ ປກສ ເມືອງໄຊທານີ 5 ຄັ້ງ, ຖືກດັດສ້າງ ຢູ່ດອນທ້າວ-ດອນນາງ 1 ຄັ້ງ ຍ້ອນເສບຢາບ້າ ແລະ ຖືກປ່ອຍຕົວ ໃນວັນທີ 15 ມີນາ 2020.
ເມື່ອອອກມາແລ້ວ ອ້າຍ ແລະ ເອື້ອຍໃພ້ ກໍບໍ່ໃຫ້ຢູ່ນໍາ ຍ້ອນບໍ່ຟັງຄວາມ ຈຶ່ງໄປຢູ່ນໍາອ້າຍອີກຄົນ ໄດ້ໄລຍະໜຶ່ງອ້າຍກໍບໍ່ໃຫ້ຢູ່ນໍາ ຈຶ່ງໄດ້ຄືນມາຂໍຢູ່ນໍາອ້າຍ-ເອື້ອຍໃພ້ຄືເກົ່າ ໃນລະຫວ່າງເດີນທາງໄດ້ແວ່ຊື້ຢາບ້ານໍາໝູ່ ຈໍານວນ 10 ເມັດ ເພື່ອໄວ້ເສບ ເມື່ອມາຮອດເຮືອນອ້າຍ-ເອື້ອຍໃພ້ ກໍບໍ່ໃຫ້ຢູ່ນໍາ, ຈິ່ງໄດ້ນອນພັກຢູ່ຖຽງນາຂອງຜູ້ເປັນອ້າຍໄດ້ 3 ຄືນ; ເຊິ່ງໃນຄືນທີ 3 ແມ່ນໄດ້ເສບຢາບ້າໄປຈໍານວນ 5 ເມັດ ພໍຕື່ນເຊົ້າມາ (ມື້ກໍ່ເຫດ) ໄດ້ໄປເຮືອນອ້າຍ-ເອື້ອຍໃພ້ ແລະ ນັ່ງກິນເຂົ້ານໍາກັນ, ຕົນຈຶ່ງເກີດການຜິດຖຽງກັນ ຈຶ່ງຄຽດໃຫ້ແລ້ວເກີດຄວາມໂມໂຫຄວບຄຸມຕົນເອງບໍ່ໄດ້ ຈິ່ງໄດ້ໃຊ້ມີດ ຢູ່ໃນເຮືອນຄົວມາແທງໃສ່ເອື້ອຍໃພ້ເສຍຊີວິດຄາທີ່.
